اردو میڈیم کی خالی تدریسی آسامیوں کا مطالبہ ، ساجد خان کی پہل کو تین عوامی نمائندوں کی تائید

ناندیڑ:11؍اکتوبر ( نامہ نگار) مہاراشٹر میں اساتذہ بھرتی 2025 ءکے دوسرے مرحلے میں اردو میڈیم کی تمام خالی تدریسی آسامیوں کو شامل کرنے کا مطالبہ سامنے آیا ہے۔ شیوسینا کے یوتھ شہر صدرناندیڑ شمال ، شعبۂ اقلیتی امور، ساجد خان نے اس اہم مسئلے پر پہل کرتے ہوئے نائب وزرائے اعلیٰ ایکناتھ شندے اور سنیترا تائی پوار کو مکتوب پیش کیا ہے۔ اس مکتوب میں اردو میڈیم کے اسکولوں میں خالی تدریسی آسامیوں کی تفصیلات جمع کرنے، ان کی جانچ کرنے اور تمام اہل آسامیوں کو پاوتر (PAVITRA) پورٹل پر اپ لوڈ کرنے کا مطالبہ کیا گیا ہے۔ساجد خان کی اس پہل کو تحریری طور پر ناندیڑ کے رکن اسمبلی بالاجی کلیانکر، رکن اسمبلی آنند پاٹل تڑکے بونڈھارکر اور ہیمَنت پاٹل کی تائید حاصل ہوئی ہے۔ تینوں عوامی نمائندوں کی حمایت سے اردو میڈیم کی خالی تدریسی آسامیوں کا مسئلہ حکومت کے سامنے مؤثر انداز میں پیش کرنے کی کوشش کی گئی ہے۔
پہلے مرحلے میں اردو میڈیم کی صرف 176 آسامیاں:
مکتوب میں اس بات کی جانب توجہ دلائی گئی ہے کہ اساتذہ بھرتی 2025 کے پہلے مرحلے میں ریاست بھر کی تقریباً 30,209 تدریسی آسامیوں کا اشتہار جاری کیا گیا تھا، لیکن ان میں اردو میڈیم کی صرف 176 آسامیوں کو شامل کیا گیا۔ دوسری جانب ضلع پریشد کے اردو میڈیم اسکولوں میں بڑی تعداد میں تدریسی عہدے خالی ہونے کے باوجود متعدد آسامیوں کی تفصیلات پاوتر پورٹل پر اپ لوڈ نہیں کی گئیں۔مکتوب کے مطابق اس صورتِ حال سے اردو میڈیم کے اہل امیدواروں کو روزگار کے مساوی مواقع حاصل کرنے میں دشواری پیش آ رہی ہے، جبکہ اسکولوں میں اساتذہ کی کمی طلبہ کی تعلیم کو بھی متاثر کر سکتی ہے۔ اسی لیے خالی آسامیوں کی مکمل تفصیلات جمع کرکے ان کی تصدیق اور بھرتی کے عمل میں شمولیت کو ضروری قرار دیا گیا ہے۔
کیا ہیں اہم مطالبات؟
1. ضلع پریشد کے تحت اردو میڈیم کے تمام اسکولوں میں خالی تدریسی آسامیوں کی فوری معلومات جمع کرکے ان کی تصدیق کی جائے۔
2. اردو میڈیم کی تمام خالی آسامیوں کے لیے میڈیم اور مضمون کے لحاظ سے روستر (Roster) کی کارروائی جلد مکمل کی جائے۔
3. روستر کی کارروائی مکمل ہونے کے باوجود پاوتر پورٹل پر اپ لوڈ نہ کی گئی آسامیوں کو فوری طور پر اپ لوڈ کیا جائے۔
4. پہلے مرحلے میں کم تعداد میں آسامیوں کی تفصیلات اپ لوڈ ہونے کی صورت میں باقی خالی آسامیوں کو اساتذہ بھرتی 2025 کے دوسرے مرحلے میں شامل کیا جائے۔
5. پاوتر پورٹل پر غلط میڈیم کے تحت درج آسامیوں کی جانچ کرکے انہیں اردو میڈیم کے تحت درست کیا جائے۔
6. ضلع میں اردو میڈیم کے اساتذہ کی حقیقی ضرورت کو مدنظر رکھتے ہوئے اس بات کو یقینی بنایا جائے کہ کوئی بھی خالی آسامی بھرتی کے عمل سے محروم نہ رہے۔
7. اساتذہ بھرتی 2025 کے دوسرے مرحلے کو جلد شروع کرنے کے لیے حکومت کی جانب سے ضروری اقدامات کیے جائیں۔
8. اردو میڈیم کی خالی آسامیوں سے متعلق تازہ ترین معلومات حکومت اور متعلقہ محکمہ کے سامنے فوری طور پر پیش کی جائیں تاکہ امیدواروں کو دوسرے میڈیم کے امیدواروں کی طرح مساوی مواقع مل سکیں۔
مکتوب میں اس بات پر زور دیا گیا ہے کہ اردو میڈیم کے امیدواروں کو دوسرے میڈیم کے امیدواروں کی طرح مساوی مواقع فراہم کیے جائیں اور اساتذہ کی خالی آسامیوں کو انتظامی خامیوں یا نامکمل دستاویزات کی وجہ سے بھرتی کے عمل سے باہر نہ رکھا جائے۔ساجد خان نے اس مسئلے کو نائب وزرائے اعلیٰ کے سامنے پیش کرتے ہوئے اردو میڈیم کے طلبہ کے تعلیمی مفادات اور اہل امیدواروں کے روزگار کے مواقع کو تحفظ فراہم کرنے کی ضرورت اجاگر کی ہے۔ بالاجی کلیانکر، آنند پاٹل تڑکے بونڈھارکر اور ہیمَنت پاٹل کی تحریری تائید کو اس مطالبے کے لیے اہم پیش رفت قرار دیا جا رہا ہے۔اب توجہ اس بات پر مرکوز ہے کہ حکومت اس معاملے میں کیا اقدامات کرتی ہے اور اساتذہ بھرتی 2025 کے دوسرے مرحلے میں اردو میڈیم کی باقی خالی تدریسی آسامیوں کو شامل کرنے کے مطالبے پر کب فیصلہ لیا جاتا ہے۔اس مطالبے کے لیے مثبت پہل کرنے پر ساجد خان، یوتھ شہر صدر، شعبۂ اقلیتی امور، ناندیڑ شمال نے کابینی وزیر کے درجے کے حامل ہیمَنت پاٹل ، ناندیڑ شمال کے رکن اسمبلی بالاجی کلیانکر اور ناندیڑ جنوب کے رکن اسمبلی آنند پاٹل بھونڈھارکر کا تہہ دل سے شکریہ ادا کیا۔انہوں نے اقلیتی طبقے کے مسائل پر سنجیدگی سے توجہ دیتے ہوئے اردو میڈیم کے اہل امیدواروں کو انصاف دلانے کے لیے نائب وزیر اعلیٰ ایکناتھ شندے اور محترمہ سنیترا پوار سے مکتوب کے ذریعے مطالبہ کرنے پر تینوں رہنماؤں کا خصوصی شکریہ ادا کیا۔ساجد خان نے اس اعتماد کا اظہار بھی کیا کہ اردو میڈیم کی خالی تدریسی آسامیوں کو پاوتر پورٹل پر اپ لوڈ کروانے اور اہل امیدواروں کو روزگار کے مواقع فراہم کرنے کے لیے یہ کوشش آئندہ بھی جاری رہے گی۔