ناندیڑ میں تجاوزات اور غیر قانونی پارکنگ کے خلاف خصوصی مہم

ناندیڑ: 2 ستمبر(نمائندہ اعتبار) شہر میں ٹریفک کی روانی کو برقرار رکھنے اور شہریوں کو ٹریفک جام کی پریشانی سے نجات دلانے کے لیے ناندیڑ شہر ٹریفک برانچ، وزیرآباد کی جانب سے تجاوزات اور غیر قانونی پارکنگ کے خلاف خصوصی مہم شروع کی گئی ہے۔ اس مہم کے تحت ایک ہی دن میں 68 کارروائیاں کرتے ہوئے مجموعی طور پر 65,350 روپئے جرمانہ وصول کیا گیا۔ناندیڑ شہر کی اہم سڑکوں پر بڑھتی ہوئی تجاوزات اور غیر قانونی طور پر گاڑیاں پارک کیے جانے کے باعث ٹریفک جام کی صورتحال پیدا ہورہی تھی، جس سے عام شہریوں کو شدید مشکلات کا سامنا کرنا پڑ رہا تھا۔ اسی پس منظر میں پولیس سپرنٹنڈنٹ ڈاکٹر نیلابھ روہن کی رہنمائی میں شہر ٹریفک برانچ کی جانب سے تجاوزات کے خاتمے اور ٹریفک نظام کو بہتر بنانے کے لیے خصوصی مہم چلائی جارہی ہے۔اسی سلسلے میں 2 ستمبر 2026 ءکو شہر ٹریفک برانچ، وزیرآباد کے پولیس انسپکٹر کی قیادت میں سنیہ نگر پولیس کالونی سے راج کارنر، دونوں جانب، ہوتے ہوئے شنکر راؤ چوہان چوک تک اہم شاہراہوں پر خصوصی مشترکہ کارروائی کی گئی۔ اس کارروائی میں شہر ٹریفک برانچ کے افسران و اہلکار، RCP دستہ اور ناندیڑ میونسپل کارپوریشن کا عملہ شریک تھا۔کارروائی کے دوران سڑکوں کے کنارے قائم تجاوزات کو ہٹایا گیا۔ اس کے علاوہ ہاتھ گاڑیوں، پھل فروشوں، ٹھیلوں اور ٹریفک میں رکاوٹ پیدا کرنے والے دیگر مقامات کو بھی خالی کرایا گیا۔ غلط طریقے سے گاڑیاں پارک کرنے اور ٹریفک میں رکاوٹ پیدا کرنے والوں کے خلاف 68 کیس درج کرتے ہوئے 65,350 روپئے جرمانہ وصول کیا گیا۔ٹریفک پولیس نے شہریوں سے اپیل کی ہے کہ وہ عوامی سڑکوں پر تجاوزات نہ کریں اور ایسی جگہوں پر گاڑیاں پارک نہ کریں جہاں ٹریفک میں رکاوٹ پیدا ہوتی ہو۔ اس کے علاوہ والدین، طلبہ اور شہریوں سے اپیل کی گئی ہے کہ وہ نابالغ بچوں کو گاڑی چلانے کے لیے نہ دیں، ٹرپل سیٹ سفر سے گریز کریں اور ٹریفک کے تمام قوانین کی سختی سے پابندی کریں۔پولیس کے مطابق یہ خصوصی مہم آئندہ بھی باقاعدگی سے جاری رہے گی اور ٹریفک قوانین کی خلاف ورزی کرنے والوں کے خلاف مزید سخت کارروائی کی جائے گی۔