ناندیڑ شہر میں ٹریفک کی روانی برقرار رکھنے کے لیے تجاوزات اور غیر قانونی پارکنگ کے خلاف خصوصی مہم

ناندیڑ:6؍جولائی ( نامہ نگار)شہر کے اہم شاہراہوں کے دونوں جانب ہونے والی تجاوزات اور سڑکوں پر غیر قانونی طور پر گاڑیاں پارک کیے جانے کے باعث ٹریفک جام کی صورتحال پیدا ہو رہی ہے، جس سے عام شہریوں کو شدید دشواریوں کا سامنا کرنا پڑ رہا ہے۔ اس پس منظر میں پولیس سپرنٹنڈنٹ ڈاکٹر نیلابھ روہن کی رہنمائی میں سٹی ٹریفک برانچ کی جانب سے تجاوزات کے خاتمے اور ٹریفک کو منظم رکھنے کے لیے خصوصی مہم شروع کی گئی ہے۔6 جولائی 2026ء کو پولیس انسپکٹر (ٹریفک) ماروتی منڈے کی قیادت میں ریلوے اسٹیشن، چھترپتی شیواجی مہاراج چوک، وزیرآباد چوک، ترنگا چوک اور گوردھن گھاٹ پل کے اطراف کے مرکزی راستوں پر خصوصی کارروائی انجام دی گئی۔اس مہم میں سٹی ٹریفک برانچ کے افسران و اہلکاروں، ایک آر سی پی (RCP) ٹیم اور ناندیڑ میونسپل کارپوریشن کے عملے نے حصہ لیا۔ کارروائی کے دوران سڑکوں پر قائم تجاوزات ہٹائی گئیں، جبکہ ہاتھ گاڑیاں، پھل فروشوں کی ریڑھیاں، ٹپریاں اور دیگر رکاوٹیں بھی ہٹا دی گئیں۔اس کے علاوہ غلط طریقے سے گاڑیاں پارک کرنے والے ڈرائیوروں کے خلاف موٹر وہیکل ایکٹ اور مہاراشٹر پولیس ایکٹ کے تحت ضابطے کے مطابق جرمانہ عائد کیا گیا۔ اس کارروائی کے دوران مجموعی طور پر 64 مقدمات درج کیے گئے اور 54 ہزار روپے جرمانہ وصول کیا گیا۔پولیس نے ناندیڑ شہر کے تمام شہریوں سے اپیل کی ہے کہ وہ ٹریفک میں رکاوٹ پیدا کرنے والی تجاوزات نہ کریں اور نہ ہی سڑکوں پر غیر قانونی طور پر گاڑیاں پارک کریں۔ تمام شہری ٹریفک قوانین پر سختی سے عمل کریں، کیونکہ آئندہ بھی قواعد کی خلاف ورزی کرنے والوں کے خلاف سخت قانونی کارروائی جاری رکھی جائے گی۔