مہاراشٹر حکومت کا بڑا ایکشن، غیر قانونی آئی وی ایف و سونوگرافی سنٹرس پر ایس آئی ٹی کی نظر

ممبئی: یکم جولائی:مہاراشٹر حکومت نے بغیر اجازت کام کرنے والے آئی وی ایف اور سونوگرافی سنٹرز کے خلاف بڑی کارروائی کرنے کا فیصلہ کیا ہے۔ صحت عامہ کے محکمے کے وزیر پرکاش ابیتکر نے اسمبلی میں اعلان کیا کہ ایسے غیر قانونی مراکز کے خلاف کارروائی کے لیے ایک ایس آئی ٹی تشکیل دی جائے گی۔ یہ ٹیم ریاست بھر میں چھاپے مارے گی اور قواعد کی خلاف ورزی کرنے والے مراکز کے خلاف سخت کارروائی کرے گی۔ یہ جانکاری سماج وادی پارٹی کے ایم ایل اے ابو اعظمی کی جانب سے اسمبلی میں اٹھائے گئے ایک سوال کے جواب میں دی گئی۔ وزیر نے کہا کہ ریاستی حکومت ایسے معاملات کو مزید سنجیدگی سے لینے کی تیاری کر رہی ہے۔ انہوں نے مزید کہا کہ مہاراشٹرا کنٹرول آف آرگنائزڈ کرائم ایکٹ پر بھی سنجیدگی سے غور کیا جا رہا ہے تاکہ آئی وی ایف اور سونوگرافی سنٹرس کے جرائم جو بغیر اجازت کے کام کر رہے ہوں کو اس ایکٹ کے دائرے میں لایا جائے۔ انہوں نے کہا کہ حکومت آئندہ اسمبلی اجلاس تک اس سلسلے میں ضروری قانون سازی کے لیے کوشاں ہے، تاکہ ایسے معاملات میں ملوث افراد کے خلاف مزید سخت قانونی کارروائی کی جاسکے۔ پرکاش ابیتکر نے کہا کہ ریاست میں غیر ضروری طور پر بڑی تعداد میں آئی وی ایف اور سونوگرافی مراکز کھولے جا رہے ہیں۔ ان میں سے بہت سے مراکز ضروری اجازتوں کے بغیر کام کر رہے ہیں اور عام مریضوں کے خلاف فراڈ کے کیسز مسلسل سامنے آ رہے ہیں۔ انہوں نے واضح کیا کہ ریاست بھر میں ایسے مراکز کی نگرانی کے لیے ایک خصوصی تحقیقاتی ٹیم تشکیل دی جائے گی۔ ٹیم کا بنیادی مقصد غیر مجاز مراکز کی نشاندہی کرنا، ان کے خلاف کارروائی کرنا، مریضوں کے خلاف فراڈ کو روکنا اور لوگوں کے مفادات کا تحفظ کرنا ہوگا۔ مہاراشٹر حکومت کا ماننا ہے کہ اس اقدام سے صحت کی دیکھ بھال کی خدمات میں شفافیت میں اضافہ ہوگا، غیر قانونی طور پر چلنے والے مراکز کو روکا جائے گا، اور علاج کے خواہاں مریضوں کا اعتماد مضبوط ہوگا۔