خادم الحرمین الشریفین کی مسلمانوں کو عید الاضحی کی مبارکباد، حجاج کرام کی خدمت عظیم اعزاز

ریاض:27؍مئی:خادم الحرمین الشریفین شاہ سلمان بن عبدالعزیز نے سعودی عوام اور امت مسلمہ کو عید الاضحی المبارک کے پرمسرت موقع پر مبارکباد پیش کی ہے اور اللہ سبحانہ و تعالی سے دعا کی ہے کہ وہ اس عید کو امت مسلمہ اور پوری دنیا کے لیے خیر، سلامتی اور استحکام کا باعث بنائے۔شاہ سلمان نے سوشل میڈیا پلیٹ فارم ایکس پر اپنے آفیشل اکانٹ کے ذریعے جاری کردہ پیغام میں کہا کہ ہم اللہ عزوجل کے شکر گزار ہیں جس نے ہمیں حرمین شریفین کی خدمت اور اپنے گھر کے حجاج کرام کی دیکھ بھال کا شرف بخشا۔ انہوں نے دعا کی کہ اللہ تعالی حجاج کرام کا حج، ان کی قربانیاں اور عبادات قبول فرمائے۔سعودی فرمانروا نے مزید کہا کہ عید الاضحی کی آمد پر ہم اپنے اس مبارک وطن کیعوام اور امت مسلمہ کو اس موقع پر مبارکباد پیش کرتے ہیں اور اللہ سبحانہ و تعالی کے حضور دعا گو ہیں کہ وہ اسے ہماری امت اور پوری دنیا کے لیے خیر، امن اور استحکام کی عید بنائے۔خادم الحرمین الشریفین نے اپنے تہنیتی پیغام کے اختتام پر فرمایا کہ آپ سب کو ہر سال یہ خوشیاں دیکھنا نصیب ہوں اور آپ خیر و عافیت سے رہیں”۔