شہر میں غیر مجاز ہورڈنگس اور بینرس کے خلاف سخت کارروائی سے متعلق مشترکہ اجلاس

ناندیڑ:15؍مئی (نمائندہ اعتبار) ناندیڑ شہر میں غیر مجاز ہورڈنگس کے خلاف سخت کارروائی کرنے کے مقصد سے ضلع کلکٹر آفس کے پلاننگ ہال میں تمام سیاسی جماعتوں کے قائدین، عوامی نمائندوں اور انتظامی افسران کا ایک اہم مشترکہ اجلاس منعقد ہوا۔اس اجلاس میں میئر محترمہ کویتا سنتوش مولے، ضلع کلکٹر راہل کڑدیلے، پولیس سپرنٹنڈنٹ ابیناش کمار، میونسپل کمشنر ڈاکٹر مہیش کمار ڈوئی پھوڑے، ریذیڈنٹ ڈپٹی کلکٹر کرن امبیکر، پولیس سب ڈویژنل آفیسر وینجنے، پرشانت شندے، نائب میئر دیپک سنگھ راوت، اسٹینڈنگ کمیٹی کے صدر وریندر سنگھ گاڑیوالے، خواتین و اطفال بہبود کمیٹی کی صدر سدیچھا سونی پاٹل، ایڈیشنل کمشنر گریش کدم، ایڈیشنل کمشنر نلیش سنکیوار، ڈپٹی کمشنر ایس۔ اجیت پال سنگھ سندھو، تمام سیاسی جماعتوں کے قائدین اور مختلف سماجی تنظیموں کے نمائندے موجود تھے۔اجلاس کے آغاز میں میونسپل کارپوریشن کی جانب سے ریاستی حکومت کی ہدایات اور ہائی کورٹ میں داخل مفادِ عامہ کی عرضی نمبر 155/2011 میں 31 جنوری 2017ء کو جاری کردہ احکامات کے مطابق آسمانی تشہیری بورڈز اور اشتہاری ضوابط و کنٹرول کے نظام سے متعلق تفصیلی پریزنٹیشن پیش کی گئی۔شہر میں بڑھتی ہوئی بینربازی کو روکنے کے لیے میونسپل کارپوریشن اور پولیس محکمہ مشترکہ طور پر غیر مجاز ہورڈنگس کے خلاف کارروائی کرے گا۔ کارروائی کے دوران میونسپل ملازمین کو مکمل پولیس تحفظ فراہم کرنے کا یقین پولیس سپرنٹنڈنٹ نے دلایا۔ اس کے علاوہ بغیر اجازت ہورڈنگ لگانے والوں اور متعلقہ افراد کے خلاف براہِ راست فوجداری مقدمات (FIR) درج کیے جائیں گے۔قانونی ہورڈنگس کا بھی حفاظتی نقطۂ نظر سے فوری اسٹرکچرل آڈٹ کرنے کے احکامات دیے گئے۔ شہر میں میونسپل کارپوریشن کی جانب سے مجموعی طور پر 167 مجاز اشتہاری بورڈ فراہم کیے گئے ہیں۔ اسی کے مطابق غیر مجاز بڑے ہورڈنگس پر جرمانہ عائد کرنے کی پالیسی تیار کی جائے گی۔اجلاس میں میونسپل کمشنر ڈاکٹر مہیش کمار ڈوئی پھوڑے نے اپنا مؤقف پیش کرتے ہوئے واضح کیا کہ شہر میں ہورڈنگس پر پابندی نہیں بلکہ صرف غیر مجاز ہورڈنگس پر پابندی عائد ہے۔ انہوں نے بتایا کہ میونسپل کارپوریشن نے ہورڈنگس کے لیے آن لائن اجازت کا نظام فراہم کیا ہے، جس کے تحت 48 گھنٹوں کے اندر اجازت نامہ جاری کیا جائے گا۔اسی طرح تمام افراد کے لیے کم از کم 3 دن تک بینر اور ہورڈنگ لگانے کی اجازت ہوگی اور یہ سہولت انتہائی کم نرخوں پر دستیاب رہے گی۔ کمشنر نے بتایا کہ ڈیجیٹل اسکرینس کا معاملہ بھی میونسپل کارپوریشن کے زیرِ غور ہے اور بینر و ہورڈنگس کی اجازت مقررہ وقت میں شفاف طریقے سے دی جائے گی۔پولیس سپرنٹنڈنٹ ابیناش کمار نے بھی اس کی تائید کرتے ہوئے کہا کہ میونسپل کارپوریشن اور پولیس انتظامیہ مشترکہ طور پر غیر مجاز ہورڈنگس کے خلاف کارروائی کے لیے پوری طرح تیار ہیں۔ضلع کلکٹر راہل کڑدیلے نے کہا کہ غیر مجاز ہورڈنگس اور بینرس کی وجہ سے شہر کا بدنما ہونا اچھی بات نہیں ہے۔ انہوں نے کہا کہ میونسپل کارپوریشن کی جانب سے تیار کردہ پالیسی جامع ہے اور سیاسی قائدین و شہریوں کو اس پر عمل کرنا ضروری ہے۔میئر محترمہ کویتا سنتوش مولے نے کہا کہ ناندیڑ شہر کو غیر مجاز بینرس سے پاک بنانے کے لیے ’’سب کے لیے یکساں انصاف، یکساں قانون‘‘ کی پالیسی اختیار کرنا ضروری ہے۔اجلاس میں موجود سیاسی جماعتوں کے نمائندوں نے مطالبہ کیا کہ حکمراں اور اپوزیشن جماعتوں میں تفریق کیے بغیر سب کے لیے یکساں اصول اپناتے ہوئے کارروائی کی جائے۔ ساتھ ہی تمام جماعتی قائدین سے اپنے کارکنان کو غیر مجاز فلیکس نہ لگانے کی اپیل کرنے کا مطالبہ بھی کیا گیا۔اس موقع پر موجود سماجی تنظیموں کے نمائندوں نے شہر کی بدنمائی روکنے اور شہریوں کی حفاظت کے لیے انتظامیہ کو مکمل تعاون دینے کا یقین دلایا۔