اقراء شاہین اردو ہائی اسکول میں اعزازی تقریب کا انعقاد

جلگاؤں: 4؍اپریل (راست) اقراء شاہین اردو ہائی اسکول میں حال ہی میں ایک باوقار اعزازی تقریب کا انعقاد کیا گیا۔ اس موقع پر حال ہی میں منعقدہ ٹی ای ٹی (TET) امتحان میں کامیابی حاصل کرنے والے سید منظور الٰہی سر اور محسن سر کا اسکول کی جانب سے خصوصی اعزاز کیا گیا۔تقریب کے دوران دونوں اساتذہ کو شال اور گل دستہ پیش کر کے ان کی تعلیمی کامیابی کو سراہا گیا۔ ان کی اس کامیابی سے پورے اسکول میں خوشی کا ماحول دیکھنے میں آیا۔اسی کے ساتھ، اسکول کے ذاکر بشیر سر کو آل انڈیا اردو ٹیچرز ایسوسی ایشن کی جانب سے حاصل ہونے والے “آئیڈیل ٹیچر ایوارڈ” پر بھی خصوصی طور پر اعزاز سے نوازا گیا۔ ان کی شاندار تدریسی خدمات، لگن اور طلبہ کے لیے ان کی خدمات کے اعتراف میں اسکول انتظامیہ نے انہیں دلی مبارکباد پیش کی۔اس موقع پر پرنسپل ریاض شاہ بھی خصوصی طور پر موجود تھے۔ تقریب میں اسکول کے اساتذہ، طلبہ اور دیگر عملہ شریک رہا۔ سبھی نے معزز اساتذہ کے روشن مستقبل کے لیے نیک تمناؤں کا اظہار کیا اور ان کی خدمات کو قابلِ تقلید قرار دیا۔