غزہ جنگ کی وجہ سے2024 میں اسرائیل کو 6.6 فیصد بجٹ خسارے کا سامنا

یروشلم:15؍جنوری:اسرائیل میں 2024 کے بجٹ کے ایک نظرثانی شدہ مسودے سے ظاہر ہوتا ہے کہ رواں سال کے دوران بجٹ خسارہ جی ڈی پی کے 2.25 فیصد سے بڑھ کر 6.6 فیصد ہونے کی توقع ہے۔اتوار کو حکومتی وزرا ایک نظرثانی شدہ بجٹ پر بحث شروع کریں گے جس میں غزہ میں اسرائیل کی جنگ کی مالی اعانت کے لیے اہم اخراجات شامل ہوں گے۔ اس پر پیر کی صبح ووٹنگ متوقع ہے۔بجٹ کے مسودے کے مطابق حماس کے خلاف سات اکتوبر 2023 سے جاری جنگ 1.4 فیصد پوائنٹس کے متوقع نقصانات کے بعد رواں سال کے لیے اقتصادی ترقی میں 1.1 فیصد پوائنٹس کی کمی کا باعث بنے گی۔جنگ کے مالی اثرات کا تخمینہ 2023-2024 کی مدت میں تقریبا 150 بلین شیکل (40.25 بلین) لگایا گیا ہے۔ امکان ہے کہ سال 2024 کی پہلی سہ ماہی میں شدید لڑائی ختم ہو جائے گی۔