کلکٹر آفس میں معلومات کے حق کا دن جوش و خروش کے ساتھ منایا گیا

ناندیڑ:29؍ستمبر(نمائندہ اعتبار)مہاراشٹر حکومت کے فیصلہ کے مطابق معلومات کے حق ایکٹ 2005 ءکی وسیع پیمانے پر تشہیر اور مؤثر عمل درآمد کے لیے ہر سال 28؍ستمبر کو ریاستی سطح پر’’معلومات کے حق کا دن‘‘ منایا جاتا ہے۔انٹرنیشنل رائٹ ٹو انفارمیشن ڈے کے موقع پر کلکٹر آفس میں منعقدہ ٹریننگ ورکشاپ میں معلومات کے حق کے قانون کے ماہر اور وکیل ڈاکٹر بھیم راؤ ہاٹکر نے رہنمائی کی۔ اپنے خطاب میں انہوں نے اس بات پر زور دیا کہ معلومات کے حق ایکٹ کے تحت موصول ہونے والی درخواستوں کی کارروائی افسران اور ملازمین کو حساسیت، شفافیت اور تیزی کے ساتھ انجام دینا نہایت ضروری ہے۔معلومات کے حق کے قانون کے ذریعے عام شہریوں میں بیداری پیدا کرنے کے لیے انتظامی سطح پر ہر سال مختلف پروگرام منعقد کیے جاتے ہیں۔ اس سال 28؍ستمبر کو سرکاری تعطیل ہونے کی وجہ سے، حکومت کی ہدایت کے مطابق، پیر 29؍ستمبر کو کلکٹر آفس میں معلومات کے حق کا دن منایا گیا۔ڈاکٹر ہاٹکر نے معلومات کے حق کے قانون کی تشکیل، وقتاً فوقتاً ہونے والی ترمیمات، اور اس کے نتیجہ میں سماج اور انتظامیہ کی سوچ میں آنے والی تبدیلیوں پر تفصیل سے روشنی ڈالی۔ انہوں نے کہا کہ معلومات کا حق ہر شہری کا بنیادی حق ہے، لہٰذا اس کے احترام کے ساتھ افسران و ملازمین کو چاہیے کہ وہ درخواستوں کو فرض شناسی کے ساتھ نمٹائیں۔ورکشاپ کے بعد افسران اور ملازمین کے سوالات کے جوابات دیے گئے۔ اس موقع پر ڈپٹی کلکٹر اجے شندے، تحصیلدارشنکر لاڈ، تحصیلدار وکاس بیرادر، نائب تحصیلدار جیا اننم وار، لیگل آفیسر آنند مالاکولیکر سمیت مختلف محکموں کے افسران و ملازمین بڑی تعداد میں موجود تھے۔