’ہر گھر ترنگا‘ مہم میں دفاتر سمیت شہری بھی شریک ہوں: کلکٹر راہل کڑیلے

ناندیڑ:11؍اگست ( شیخ عمران)حکومت کی ہدایت کے مطابق ضلع میں ’’ہر گھر ترنگا‘‘مہم چلائی جارہی ہے۔ اس مہم کا آخری مرحلہ 13 سے 15 اگست کے دوران منعقد کیا گیا ہے۔ اس موقع پر ضلع کلکٹر راہل کڑیلے نے اپیل کی ہے کہ اس مدت میں ضلع کے ہر گھر، تمام سرکاری دفاتر اور نجی اداروں پر ترنگا پرچم لہرایا جائے۔کلکٹر نے بتایا کہ اس دوران ہر گھر اور ہر دفتر پر قومی پرچم لہرانا مقصد ہے۔ اس سلسلے میں متعلقہ محکموں اور دفاتر کی کارروائی کا جائزہ آج کلکٹر آفس میں کلکٹر راہل کڑیلے کی صدارت میں منعقدہ اجلاس میں لیا گیا، جس میں مختلف محکموں کے تعلقہ اور ضلعی سطح کے افسران شریک ہوئے۔’’ہر گھر ترنگا‘‘مہم کے تحت مختلف پروگرام اور سرگرمیوں کے انعقاد کے بارے میں مرکز اور محکمہ ثقافتی امور کی جانب سے ہدایات دی گئی ہیں۔ ضلع کلکٹر نے ہدایت دی کہ ضلع کے تمام دفاتر کے سربراہان اس مہم کو جوش و خروش کے ساتھ کامیاب بنانے کے لیے مختلف پروگرام اور سرگرمیاں انجام دیں۔ اس موقع پر یہ بھی ہدایت دی گئی کہ ضلع کے اہم سرکاری مقامات، آبی ذخائر اور تاریخی ورثہ مقامات پر ترنگے کی روشنی اور صفائی کی جائے۔مزید معلومات، رضاکارانہ رجسٹریشن، سیلفی اپ لوڈ کرنے اور تفصیلات حاصل کرنے کے لیے شہری [https://harghartiranga.com](https://harghartiranga.com) ویب سائٹ پر وزٹ کریں۔