حاجی محمد پاڈیلا پرائمری اسکول کی طالبات کی ضلعی سطح پر نمایاں کامیابی

پربھنی :4؍مئی( ضلع نامہ نگار اعتبار نیوز محمد سرور شریف ) الفیض فاؤنڈیشن جلگاؤں کی جانب سے طلبہ کے اندر مقابلہ جاتی امتحانات میں دلچپسی پیدا کرنے اور قبل از وقت پرائمری سطح سے ہی مقابلہ جاتی امتحانات میں طلبہ کو تیار کرنے کے لیے مشن یو پی ایس سی کے تحت ریاستی سطح پر یو پی ایس سی کے طرز پر امتحانات کہ انعقاد کیا جاتا ہے۔اس سال بھی 6 اپریل 2025 کو امتحان منعقد ہوا۔ریاست گیر سطح پر تمام ہی اردو مدارس کے طلبہ نے اس میں شرکت کی۔شہر پربھنی میں مشن یو پی ایس سی کے تحت لیے جانے والے امتحانات و دیگر انتظامات شہر پربھنی میں قائم کردہ سینٹر فار ایجوکیشنل ایکسیلینس پربھنی (CEE) کی زیر نگرانی میں انجام پاتا ہے۔ اس سال ریاستی سطح پر مشن یو پی ایس سی کے تحت لیے گئے امتحانات کے نتائج آچکے ہیں۔ جس میں حاجی محمد پاڈیلا پرائمری اسکول پربھنی کی جماعت ہفتم کی ہونہار طالبات نے مشن یو پی ایس میں اپنی کڑی محنت اور پرعزم حوصلہ کی بناء پرنمایاں کامیابی حاصل کی۔جس میں جماعت ہفتم کی طالبہ ثانیہ فاطمہ افتخار خطیب نے ضلعی سطح پر پہلا مقام حاصل کیا ہے اور اسی طرح مدرسہ ہذا کی جماعت ہفتم کی طالبہ عرشیہ فرزین عنایت اللہ خان نے ضلعی سطح پر تیسرا مقام حاصل کیا۔مدرسہ ہذا کی ان طالبات کی بہترین اور نمایاں کامیابی پر دی میمن مرچنٹس اسو سی ایشن کےصدرافضل سیٹھ پاڈ یلا ، سیکریٹری غلام محمد مٹھو اور صدر مدرس محمد خالد عبدالحفیظ اور تمام اساتذہ اور سرپرست نے دونوں طالبات کی اس کامیابی کو خوب سراہا مبارک باد پیش کی مستقبل کے لیے نیک خواہشات کا اظہار کرتے ہوئے دعاؤں سے نوازا۔