صفائی کا پیغام لے کر 69 سالہ یشونت کنہرے کا مہاراشٹر دورہ

ناندیڑ:12؍اپریل ( نمائندہ اعتبار) مہاتما جوتی با پھولے جینتی کے موقع پر ناندیڑ کے بابانگر میں واقع مہاتما پھولے ہائی اسکول میں کل خراج عقیدت کے پروگرام کا انعقاد کیا گیا۔ اس موقع پر پمپری-چنچوڑ، پونے سے آئے ہوئے 69 سالہ یشونت کنہرے نے طلبہ کو صفائی کی اہمیت سمجھاتے ہوئے ان کی رہنمائی کی۔ پروگرام میں پرنسپل محترمہ ایس۔ آر۔ کدم اور نائب پرنسپل اے۔ آر۔ کلیانکرے نے ان کا رسمی استقبال کیا۔کنہرے نے پلاسٹک سے نجات، آلودگی پر قابو، ہیلمیٹ کا استعمال، کار کی سیٹ بیلٹ کا استعمال، درخت لگاؤ-درخت بچاؤ، پلاسٹک بوتل اور تھرماکول کے نقصانات جیسے مختلف موضوعات پر طلبہ سے بات چیت کی۔ انہوں نے چارٹس کے ذریعے اپنی بات کو مؤثر انداز میں پیش کیا اور طلبہ سے صفائی سے متعلق نعرے بھی کہلوائے۔69 سال کی عمر میں بھی وہ موٹر سائیکل پر مہاراشٹرا کے 36 اضلاع کا دورہ کر کے صفائی کا پیغام لے کر عوام میں بیداری پیدا کر رہے ہیں۔ ان کے ناندیڑ دورے کے موقع پر اسکول میں منعقدہ خصوصی پروگرام ’’صفائی کی عادت اور صفائی کی تربیت‘‘ میں طلبہ و اساتذہ نے بڑی تعداد میں شرکت کی۔ اس موقع پر اسکول کے تمام اساتذہ، غیر تدریسی عملہ اور طلبہ موجود تھے۔