کھڑکپورہ قتل معاملے کے پانچ ملزمان محض چار گھنٹوں میں گرفتار

ناندیڑ :21؍جون (نمائندہ اعتبار) وزیرآباد پولیس اسٹیشن کی حدود میں واقع کھڑکپورہ میں پیش آئے قتل کے معاملے کا محض چار گھنٹوں میں سراغ لگاتے ہوئے لوکل کرائم برانچ اور وزیرآباد پولیس نے پانچ ملزمان کو گرفتار کر لیا۔ اس برق رفتار کارروائی پر پولیس محکمہ کی مختلف سطحوں پر ستائش کی جا رہی ہے۔موصولہ اطلاعات کے مطابق کھڑکپورہ کے ساکن شیخ شمیم شیخ اسحاق نے 2023ء کے ایک مقدمے میں شکایت درج کرائی تھی، جس کی رنجش میں ملزمان نے ان پر پستول سے فائرنگ کی۔ اس کے علاوہ تلوار اور چاقو سے حملہ کرکے انہیں قتل کر دیا گیا۔ اس معاملے میں وزیرآباد پولیس اسٹیشن میں جرم نمبر 302/2026 کے تحت بھارتیہ نیائے سنہتا کی دفعات 103(1)، 3(5) اور اسلحہ قانون کی مختلف دفعات کے تحت مقدمہ درج کیا گیا ہے۔واقعہ کی سنگینی کو مدنظر رکھتے ہوئے سپرنٹنڈنٹ آف پولیس ابیناش کمار کی رہنمائی میں مقامی کرائم برانچ کے پولیس انسپکٹر اتل بھوسلے اور وزیرآباد کے پولیس انسپکٹر اجیت کمار کی قیادت میں خصوصی ٹیمیں تشکیل دی گئیں۔ تفتیش کے دوران 62 مقامات کے سی سی ٹی وی فوٹیج کی جانچ کی گئی۔ اس کے علاوہ مشتبہ افراد کے موبائل نمبروں کا تکنیکی تجزیہ کرکے ملزمان کا سراغ لگایا گیا۔تکنیکی تحقیقات اور خفیہ معلومات کی بنیاد پر پولیس نے (1) مرزا شبیر بیگ غفار بیگ (عمر: 39 سال، ساکن کھڑک پورہ، ناندیڑ)، (2) رشیکیش انیل گھُلے (عمر: 23 سال، ساکن شنکر نگر، تروڈا خرد، ناندیڑ)، (3) سید سفیان سید ضمیر (عمر: 19 سال، ساکن دیگلور ناکہ، ناندیڑ)، (4) مادھو بھگوان کامبلے (عمر: 21 سال، ساکن راہول کالونی، تروڈا بزرگ، ناندیڑ)، (5) مشتاق احمد اسحاق احمد (عمر: 21 سال، ساکن آسرا نگر، ناندیڑ) ، نامی پانچ ملزمان کو حراست میں لیا۔یہ کارروائی سپرنٹنڈنٹ آف پولیس ابیناش کمار، ایڈیشنل سپرنٹنڈنٹ پولیس ارچنا پاٹل اور سورج گرو، سب ڈویژنل پولیس آفیسر رامیشور ویجنے کی رہنمائی میں انجام دی گئی۔ کارروائی میں لوکل کرائم برانچ کے پولیس انسپکٹر اتل بھوسلے، وزیرآباد پولیس اسٹیشن کے پولیس انسپکٹر اجیت کمبھار، اسسٹنٹ پولیس انسپکٹر روی واہولے، وٹھل گھوگرے، پولیس سب انسپکٹر ملیند سونکامبلے، مہیش کورے، ناگناتھ تکڑے اور سائناتھ پویڈ سمیت مقامی کرائم برانچ اور وزیرآباد پولیس کے اہلکار شامل تھے۔پولیس کی اس مستعد کارروائی کے باعث ایک سنگین جرم کا قلیل مدت میں پردہ فاش ہوا، جس پر شہریوں میں اطمینان کا اظہار کیا جا رہا ہے۔