ناندیڑ: پرانے مونڈھا تا وی آئی پی روڈ تجاوزات کے خلاف مشترکہ کارروائی

ناندیڑ: 6؍جون (نمائندہ اعتبار) شہر میں بڑھتی ہوئی ٹریفک جام کی صورتحال پر قابو پانے اور شہریوں کو آمد و رفت کی بہتر سہولت فراہم کرنے کے مقصد سے ناندیڑ واگھالہ شہر میونسپل کارپوریشن کے انسدادِ تجاوزات دستے نے ہفتہ 06 جون 2026ء کو شہر کے مرکزی علاقے پرانے مونڈھا سے سرکاری ریسٹ ہاؤس تک کے اہم راستے پر بڑے پیمانے پر تجاوزات مخالف کارروائی انجام دی۔ اس مہم کے دوران سڑکوں پر قائم غیر مجاز ٹپریاں، شیڈز، دکانوں کے آگے بنائے گئے اضافی چبوترے اور غیر قانونی سائن بورڈز مکمل طور پر ہٹا دیے گئے۔پرانے مونڈھا علاقے سے وزیرآباد، کلامندر، شیواجی نگر، آئی ٹی آئی چوک اور وی آئی پی روڈ پر واقع ریسٹ ہاؤس تک سڑک کے دونوں جانب موجود تمام کچے اور پکے تجاوزات جے سی بی اور پوکلین مشینوں کی مدد سے منہدم کیے گئے۔ اس مرکزی شاہراہ پر تاجروں اور ہاتھ گاڑی چلانے والوں کی جانب سے بڑے پیمانے پر تجاوزات قائم کیے جانے کے باعث روزانہ شدید ٹریفک جام پیدا ہو رہا تھا۔ کارروائی کے بعد سڑک مکمل طور پر کشادہ اور صاف ہوگئی ہے۔کارروائی کے دوران امن و امان کی صورتحال برقرار رکھنے کے لیے مقامی پولیس انتظامیہ کی جانب سے سخت پولیس بندوبست تعینات کیا گیا تھا۔ میونسپل کارپوریشن کے عملے نے سڑک میں رکاوٹ بننے والا سامان، لوہے کے کاؤنٹرز اور دیگر غیر مجاز بورڈز ضبط کرکے میونسپل دفتر میں جمع کرا دیے۔یہ کارروائی میونسپل کمشنر ڈاکٹر مہیش کمار ڈوئی پھوڑے، پولیس سپرنٹنڈنٹ ابھیناش کمار اور ایڈیشنل کمشنر گریش کدم کی رہنمائی میں ڈپٹی کمشنر ایس۔ اجیت پال سنگھ سندھو کی قیادت میں غیر مجاز تعمیرات و انسدادِ تجاوزات محکمہ اور پولیس انتظامیہ کی مشترکہ ٹیم نے انجام دی۔ اس کارروائی میں پولیس انسپکٹر منڈے، سٹی ٹریفک برانچ کے پولیس سب انسپکٹر ساکلے، کوٹ تیرتھ والے، ٹوئنگ گاڑی انچارج نوہاٹے، پولیس اہلکار گھاڈگے، سونٹکے، چاٹے، پولیس حوالدار کیندرے اور ان کی ٹیم کے علاوہ انسدادِ تجاوزات شعبے کے اسسٹنٹ کمشنر راون سونسلے، علاقائی آفیسر رمیش چورے، گوتم کوڈوے، تجاوزات مخالف دستے کے سربراہ دتہ کلیانکر سمیت میونسپل کارپوریشن کے 30 ملازمین اور پولیس محکمہ کے 20 اہلکار شریک تھے۔میونسپل انتظامیہ نے خبردار کیا ہے کہ شہر کی اہم سڑکوں اور بازاروں کو تجاوزات سے پاک رکھنے کے لیے یہ مہم آئندہ بھی مسلسل جاری رہے گی۔ تاجروں اور شہریوں سے اپیل کی گئی ہے کہ وہ از خود اپنے تجاوزات ہٹا لیں۔ انتظامیہ نے واضح کیا ہے کہ اگر کارروائی کے بعد دوبارہ اسی مقام پر غیر قانونی تعمیرات یا کاروبار قائم کرنے کی کوشش کی گئی تو متعلقہ افراد کے خلاف فوجداری مقدمات درج کیے جائیں گے۔