رنگِ سخن کے زیرِ اہتمام ماہانہ شعری و ادبی نشست کا کامیاب انعقاد

ناندیڑ: 8؍ جون ( راست):۔ اردو زبان و ادب کے فروغ اور شعری روایات کی پاسداری کے لیے سرگرمِ عمل ’کوثر اکیڈمی‘ اور ’اسماک پبلیکیشن‘ ناندیڑ کے باہمی اشتراک اور ’رنگِ سخن‘ کے زیرِ اہتمام، دوسری شاندار ماہانہ شعری و ادبی نشست کا انعقاد عمل میں آیا۔ یہ پروقار تقریب راج اردو اسکول، محمدیہ کالونی میں منعقد ہوئی، جس میں شہر کے مقتدر ادباء، شعراء اور شائقینِ اردو نے بڑی تعداد میں شرکت کر کے محفل کو رونق بخشی۔ اس پُروقار ادبی محفل کی صدارت معروف اور کہنہ مشق شاعر، ماہرِ عروض جناب شفیع احمدؔ شفیع نے فرمائی، جبکہ نشست کی نظامت کے فرائض جناب سہیل ؔاحمد صدیقی نے نہایت خوش اسلوبی، برجستگی اور ادبی چاشنی کے ساتھ انجام دیے، جس نے محفل کے ربط اور تسلسل کو بخوبی برقرار رکھا۔ نشست کے دوران مقامی اور بیرونی مہمان شعراء نے اپنے فکر انگیز اور سحر طراز کلام سے سامعین کو محظوظ کیا اور بھرپور داد و تحسین وصول کی۔ محفل میں محمد دانشؔ، اطہر کلیم احمد، غالب آسیؔ، ظہیر الدین بابرؔ، سہیلؔ احمد صدیقی، منظورؔ ہاشمی، الطاف احمد ثانی ؔ، وحید اللہ عطاؔ حیدرآبادی، محمود علی سحرؔ اور تمیز احمد پروازؔ جیسے شہر کے نامور اور ابھرتے ہوئے شعراء نے اپنا خوبصورت کلام پیش کیا۔ اس نشست کی ایک اور خاص بات بیرونی مہمان شعراء کی شرکت تھی، جنہوں نے اپنے مخصوص انداز اور معیاری کلام سے حاضرین کے قلوب کو گرمایا۔ ان میں کلیم کسکؔ، ڈاکٹر منیب حنفیؔ اور صدرِ مشاعرہ شفیع احمدؔ شفیع شامل تھے۔ ان تمام شعراء کی غزلوں اور نظموں نے ادبی ذوق کی تسکین کا بہترین سامان فراہم کیا اور سامعین کو دیر تک سحر زدہ رکھا۔ محفل کے باقاعدہ اختتام پر جناب سید رشیداللہ حسینی نے تمام مہمان شعراء، شائقینِ ادب اور معاونین کا تہہِ دل سے شکریہ ادا کیا، جن کی بھرپور شرکت اور دلچسپی سے یہ دوسری ماہانہ نشست ایک یادگار تقریب میں تبدیل ہو گئی۔ اس شعری و ادبی نشست کی شاندار کامیابی اور بہترین اور منظم انتظامات کے پیچھے مقامی نوجوانوں اور منتظمین کی انتھک محنت شامل تھی۔ اس پروگرام کو کامیاب بنانے میں محمد دانش، فردین خان، ذیشان انصاری اور سید عبدالنعیم نے کلیدی اور فعال کردار ادا کیا۔ شہر کے ادبی حلقوں میں اس کامیاب ماہانہ نشست کی بھرپور ستائش کی جا رہی ہے اور منتظمین کی اس کاوش کو اردو ادب کی ترویج و ترقی کے لیے ایک نہایت خوش آئند قدم قرار دیا جا رہا ہے۔