جَلگاؤں میں قدیم و نایاب اشیاء، سکّوں اور نوٹوں کی شاندار نمائش

جَلگاؤں: 20؍ستمبر(راست) عبدالمجید زکریا بیبا فیملی اور اقراء ایچ۔ جے۔ تھیم کالج آف آرٹس اینڈ سائنس، مہرون، جَلگاؤں کے مشترکہ زیرِ اہتمام ’قدیم و نایاب اشیاء، سکّے اور نوٹ‘ کے موضوع پر ایک شاندار نمائش کا انعقاد کیا گیا ہے۔ یہ نمائش 19، 20 اور 21 ستمبر 2026 کو اقراء ایچ۔ جے۔ تھیم کالج، مہرون، جَلگاؤں میں منعقد کی جا رہی ہے۔نمائش کا افتتاح دھنَاجی نانا مہاودیالیہ، فیض پور کے شعبۂ تاریخ کے پروفیسر جناب ماروتی جادھو صاحب کے دستِ مبارک سے عمل میں آیا۔ تقریب کی صدارت اقراء تعلیمی ادارے کے صدر ڈاکٹر عبد الکریم سالار نے کی۔اس موقع پر صدارتی خطاب کرتے ہوئے ڈاکٹر عبد الکریم سالار نے کہا کہ قدیم سکے، نوٹ اور تاریخی اشیاء محض مجموعے کا حصہ نہیں بلکہ ہماری تاریخ، تہذیب و ثقافت اور سماجی و معاشی تبدیلیوں کے جیتے جاگتے دستاویزات ہیں۔ اس طرح کی نمائشوں کے ذریعے نئی نسل کو اپنے تاریخی ورثے سے قریب سے واقف ہونے اور اسے محفوظ رکھنے کی ترغیب ملتی ہے۔تقریب میں جناب ایڈووکیٹ ارون دھانڈے، حاجی قادر ٹِکّی، اعجاز ملک، جناب منوج چودھری (ڈپٹی میئر، جَلگاؤں سٹی میونسپل کارپوریشن)، جناب سریش پانڈے، جناب دتاتریہ تُکارام چودھری اور جناب جگتراؤ پاٹل بطورِ خصوصی مہمان موجود تھے۔تقریب کی نظامت اقراء ایچ۔ جے۔ تھیم کالج کے پرنسپل جناب وقار احمد سر نے کی، جبکہ جناب زبیر سر نے اظہارِ تشکر پیش کیا۔نمائش میں مختلف ادوار سے تعلق رکھنے والے نایاب و قدیم سکے، پرانے نوٹ، ڈاک ٹکٹ اور دیگر تاریخی اشیاء پیش کی گئی ہیں۔ کلیکٹر عبدالمجید زکریا بیبا، جَلگاؤں کے اس نایاب ذخیرے کے ذریعے طلبہ اور شہریوں کو تاریخ اور ثقافتی ورثے کو قریب سے دیکھنے اور سمجھنے کا موقع حاصل ہو رہا ہے۔عبدالمجید زکریا بیبا نے تمام طلبہ، والدین اور شہریوں سے اپیل کی ہے کہ وہ اس تاریخی اور منفرد نمائش کا زیادہ سے زیادہ تعداد میں دورہ کریں۔ انہوں نے کہا کہ اس نمائش کے ذریعے قدیم سکّوں، نوٹوں، ڈاک ٹکٹوں اور دیگر نایاب اشیاء کے ساتھ ساتھ ملک کی تاریخ اور ثقافتی ورثے سے قریب سے واقف ہونے کا بہترین موقع حاصل ہوگا۔نمائش کے اوقات صبح 10 بجے سے شام 6 بجے تک ہیں۔ منتظمین نے تاریخ اور ثقافت سے دلچسپی رکھنے والے تمام افراد سے اپیل کی ہے کہ وہ اس قیمتی اور نایاب ذخیرے کا مشاہدہ کرنے کے لیے ضرور تشریف لائیں۔