چِراغ

تحریر: خان افراء تسکین (اورنگ آباد)

رات کی تاریکی گہری تھی، اور آسمان پر چھائے بادل چاند کی روشنی کو دبوچے ہوئے تھے۔ سرد ہوا کے جھونکے کھڑکیوں سے ٹکرا کر سناٹے کو مزید گہرا کر رہے تھے۔ درختوں کی سرسراہٹ، جیسے کوئی خاموش راز سنانے کی کوشش کر رہی ہو، اور زمین پر بچھی چادر پر بیٹھی وہ لڑکی، اپنی دنیا میں گم تھی۔ چِراغ کی مدھم لو ہوا کے دباؤ سے لرز رہی تھی، لیکن بجھنے کا نام نہ لے رہی تھی۔
نانا جان قریب آئے تو وہ لمحہ ٹھہر سا گیا۔ ان کے قدموں کی آہٹ نے سکوت کو توڑا۔ انہوں نے جھک کر محبت سے اس کے کندھے پر ہاتھ رکھا اور آہستہ سے کہا:
بیٹی، یہ چِراغ تمہیں کیا دکھا رہا ہے؟”
اس نے دھیرے سے اپنی نظریں چِراغ سے ہٹائیں، جیسے وہ کسی گہری سوچ سے باہر آ رہی ہو۔ کچھ لمحے چپ رہی، پھر سرد ہوا کے جھونکے میں کپکپاتی آواز میں بولی:
نانا جان، میں سوچ رہی ہوں کہ اتنی گھنی رات، اتنی خاموش اور سرد فضا میں، یہ چھوٹا سا چِراغ کیسے پورے کمرے کو روشن کیے ہوئے ہے۔ جیسے یہ روشنی کسی بڑے راز کی گواہ ہو۔”
نانا جان مسکرائے۔ ان کی عمر رسیدہ آنکھوں میں تجربے کی روشنی چمکی۔ انہوں نے دھیرے سے کہا:
بیٹی، یہ چِراغ محض ایک چراغ نہیں۔ یہ امید کا استعارہ ہے۔ زندگی کی اندھیری راتوں میں، ایسا ہی ایک چِراغ ہمیں راستہ دکھاتا ہے۔ یہ سکھاتا ہے کہ روشنی چاہے کتنی ہی مدھم ہو، اگر ایمان کا تیل اس میں جلتا رہے، تو کوئی اندھیرا اسے نہیں بجھا سکتا۔”
ہوا کی شدت کچھ اور بڑھ گئی، مگر چِراغ کی لو برقرار رہی، جیسے وہ نانا جان کے الفاظ کی تصدیق کر رہی ہو۔ لڑکی نے کچھ دیر سوچا، پھر نرمی سے کہا:
نانا جان، کیا زندگی میں واقعی ایسا چِراغ ہوتا ہے؟ ایسا جو کبھی بجھ نہ سکے؟”
نانا جان نے محبت بھری نظروں سے اسے دیکھا اور کہا:
ہاں، بیٹی۔ یہ چِراغ ہمارے دلوں میں ہوتا ہے۔ کبھی یہ ہمارے خواب ہوتے ہیں، کبھی ہمارے اپنے، اور کبھی وہ لوگ جن سے ہم محبت کرتے ہیں۔ ہمیں بس یہ سیکھنا ہے کہ اس چِراغ کو کیسے جلائے رکھیں، اور اپنی زندگی کی روشنی کو کبھی مدھم نہ ہونے دیں۔”
ہوا میں ایک خاص سرسراہٹ تھی، جیسے رات بھی ان کی باتوں سے متاثر ہو رہی ہو۔ چِراغ کی لرزتی لو، زندگی کے تسلسل کی علامت بن چکی تھی۔ وہ مسکرائی اور بولی:
نانا جان، یہ چِراغ مجھے سکھا رہا ہے کہ زندگی کی روشنی اندھیروں میں ہی زیادہ نمایاں ہوتی ہے۔ شاید یہی وجہ ہے کہ ہر رات ہمیں ایک نئی صبح کی خبر دیتی ہے۔”
نانا جان نے سر ہلاتے ہوئے کہا:
بالکل، بیٹی۔ یہ روشنی ہمیشہ تمہاری راہنمائی کرے گی، بس تمہیں اس پر یقین رکھنا ہوگا۔”
رات کی سرد ہوا اب دھیمی پڑ چکی تھی، جیسے ماحول نے سکون کا لبادہ اوڑھ لیا ہو۔ لڑکی نے چِراغ کی لو کو دیکھتے ہوئے دل ہی دل میں عہد کیا کہ وہ اپنے زندگی کے چِراغ کو کبھی بجھنے نہیں دے گی۔ رات کی گہری تاریکی میں اب اسے ایک نئی روشنی کا احساس ہو چکا تھا، اور اس روشنی نے اس کے دل کو جگمگا دیا تھا۔