زبان کے رنگ سے بیماریوں کا پتہ لگانے والا AI ماڈل تیار

میلبورن:20؍اگست:آسٹریلیا اور عراق کے ماہرین نے ایسی اے آئی ٹیکنالوجی تیار کی ہے جو زبان کو دیکھ کر بیماریوں کی تشخیص کرسکتی ہے۔عراق اور آسٹریلیا کے محققین کا کہنا ہے کہ انہوں نے ایک ایسا کمپیوٹر الگورتھم تیار کیا ہے جو کسی شخص کی زبان کے رنگ کا تجزیہ کر کے اس شخص کی 98 فیصد درستگی کے ساتھ طبی حالت کا پتہ لگا سکتا ہے۔ بغداد کی مڈل ٹیکنیکل یونیورسٹی اور یونیورسٹی آف ساوتھ آسٹریلیا میں محققین اور سینئر مصنف علی النجی کا کہنا تھا کہ عام طور پر ذیابیطس کے شکار لوگوں کی زبان پیلی ہوتی ہے۔ کینسر کے مریضوں کی جامنی زبان جس میں موٹی چکنائی کی کوٹنگ ہوتی ہے اور شدید فالج کے مریضوں کی غیر معمولی شکل کی سرخ زبان ہوتی ہے۔ دوسری جانب سفید زبان خون کی کمی کی نشاندہی کر سکتی ہے جن لوگوں کو COVID-19کے سنگین معاملات درپیش ہوتے ہیں ان کی زبان گہری سرخ ہونے کا امکان ہوتا ہے۔اسی طرح انڈیگو یا بنفشی رنگ کی زبان عروقی اور معدے کے مسائل یا دمہ کی نشاندہی کرتی ہے۔