कया अप भी अपने न्यूज़ पेपर की वेब साईट बनाना चाहते है या फिर न्यूज़ पोर्टल बनाना चहाते है तो कॉल करें 9860450452 / 9028982166 /9595154683

ایک نکاح ایسا بھی!جہاں سنت زندہ ہوتی ہے وہاں رحمتوں کے دروازے کھلتے ہیں!

از قلم: وثیق الرحمٰن رشیدی

معاشرے کی اصلاح محض تقریروں، وعظ و نصیحت اور تحریروں سے نہیں ہوتی، بلکہ اس وقت حقیقی تبدیلی آتی ہے جب کوئی شخص خود اپنی عملی زندگی میں اصلاح کا نمونہ پیش کرتا ہے۔ آج ہمارے معاشرے میں شادی بیاہ کی تقریبات اسراف، نمود و نمائش، غیر ضروری اخراجات اور بے شمار فضول رسم و رواج کی نذر ہوچکی ہیں۔ نکاح جیسا مقدس اور بابرکت عمل، جسے آسانی، سادگی اور عافیت کا ذریعہ ہونا چاہیے تھا، اسے ہم نے اپنی خود ساختہ روایات کے ذریعے مشکل اور مہنگا بنا دیا ہے۔ ایسے ماحول میں اگر کوئی خاندان سنتِ نبوی ﷺ کی روشنی میں سادگی کے ساتھ نکاح کی تقریب منعقد کرتا ہے تو وہ محض ایک شادی نہیں کرتا، بلکہ پورے معاشرے کو ایک خاموش مگر نہایت مؤثر پیغام دیتا ہے۔
رسول اللہ ﷺ کا ارشادِ گرامی ہے:
خَيْرُ النِّكَاحِ أَيْسَرُهُ
ترجمہ: بہترین نکاح وہ ہے جو سب سے زیادہ آسان ہو۔
گزشتہ روز میری اہلیہ کے اہلِ خانہ کے لیے بھی ایسا ہی ایک یادگار، مسرت انگیز اور روح پرور موقع تھا، جب میری اہلیہ کی عزیز از جان ہمشیرہ عظمیٰ فاطمہ کا نکاح قصبہ گلاوٹھی سے تعلق رکھنے والے علم و عمل کے پیکر، صاحبِ نسبت اور باوقار شخصیت مفتی شعیب قاسمی صاحب کے ساتھ طے پایا۔
عظمیٰ فاطمہ وہ خوش نصیب بیٹی ہیں جنہیں میرٹھ کی معروف دینی و علمی شخصیت حضرت مولانا محمد انوار صاحب قاسمی کی شفقت و تربیت حاصل ہے، اور جو مفتی عطاء الرحمٰن، مفتی ذکاء الرحمٰن قاسمی اور قاری رضا الرحمٰن کی عزیز بہن ہیں۔ بلاشبہ یہ ایک ایسا علمی و دینی خانوادہ ہے جس کی شناخت علم، دینداری اور دینی خدمات سے وابستہ ہے۔
ایک داماد کی حیثیت سے میرے لیے یہ موقع دوہری خوشی اور قلبی اطمینان کا باعث تھا کہ خاندان کی ایک عزیز بیٹی کے نئے سفرِ زندگی کا آغاز کسی پُرتعیش ہال، غیر ضروری سجاوٹ یا نمود و نمائش سے نہیں، بلکہ اللہ تعالیٰ کے گھر، مسجد کی پاکیزہ فضا سے ہوا۔
ظہر کی نماز کے بعد ازہرِ ہند دارالعلوم دیوبند کے مایہ ناز استاذ حضرت مولانا مفتی محمود صاحب نے مسنون خطبۂ نکاح اور اپنے ایمان افروز کلمات کے ساتھ اس مبارک عقد کی تکمیل فرمائی۔ مسجد کا پُرسکون ماحول، بزرگوں کی دعائیں، عزیز و اقارب کی موجودگی، چہروں پر خوشی اور دلوں میں خلوص؛ ہر منظر اپنی جگہ ایک الگ روحانی کیفیت لیے ہوئے تھا۔ نہ شور و غل، نہ بے جا تکلفات، نہ غیر ضروری اخراجات؛ بس سادگی، وقار، محبت اور سنت کی خوب صورت پاسداری!
واقعی، بعض تقریبات اپنی ظاہری شان و شوکت سے نہیں بلکہ اپنے مقصد، پاکیزگی اور طرزِ انعقاد سے یادگار بنتی ہیں۔ یہ نکاح بھی انہی خوش نصیب مواقع میں سے ایک تھا، جس نے یہ احساس تازہ کردیا کہ خوشیوں کو بابرکت بنانے کے لیے دولت کی فراوانی نہیں، بلکہ سنت کی پیروی اور نیتوں کی پاکیزگی درکار ہوتی ہے۔
گھر کی کسی لاڈلی بیٹی یا بہن کو رخصت کرنا یقیناً جذبات سے لبریز لمحہ ہوتا ہے۔ ایک طرف برسوں کی محبت، اپنائیت اور یادیں ہوتی ہیں تو دوسری طرف اس کے نئے سفرِ زندگی کے لیے نیک تمنائیں اور دعائیں۔ لیکن جب بیٹی کا رشتہ کسی دیندار، باعلم اور باوقار خاندان میں طے پائے تو دل کو ایک خاص اطمینان نصیب ہوتا ہے کہ زندگی کی اس اہم امانت کو ایک اچھے اور قابلِ اعتماد خاندان کے سپرد کیا جا رہا ہے۔
تاہم یہ حقیقت ہمیشہ پیشِ نظر رہنی چاہیے کہ ازدواجی زندگی کی کامیابی نہ بڑے مکانوں سے وابستہ ہے، نہ قیمتی تحائف اور ظاہری آسائشوں سے؛ بلکہ اس کی اصل بنیاد باہمی اعتماد، احترام، برداشت، ایثار، حسنِ اخلاق اور ایک دوسرے کے جذبات کی قدر کرنے میں پوشیدہ ہے۔
قرآنِ کریم نے میاں بیوی کے رشتے کی عظمت کو ایک نہایت دل نشیں مثال کے ذریعے بیان فرمایا ہے:
هُنَّ لِبَاسٌ لَّكُمْ وَأَنْتُمْ لِبَاسٌ لَّهُنَّ
ترجمہ: وہ تمہارے لیے لباس ہیں اور تم ان کے لیے لباس ہو۔
لباس جس طرح انسان کے جسم کو ڈھانپتا، اسے زینت بخشتا اور موسم کی شدت سے محفوظ رکھتا ہے، اسی طرح میاں بیوی کو بھی ایک دوسرے کے لیے محبت، تحفظ، سکون اور عزت کا ذریعہ بننا چاہیے۔ اختلافات زندگی کا حصہ ہیں، مگر کامیاب وہی رشتے ہوتے ہیں جہاں انا کے بجائے محبت، شکایت کے بجائے برداشت اور ضد کے بجائے سمجھ داری کو ترجیح دی جاتی ہے۔
اس موقع پر یہ کہنا بھی ضروری سمجھتا ہوں کہ نکاح کو آسان بنانا صرف ایک خاندان کی ذمہ داری نہیں، بلکہ پوری ملت اور معاشرے کا اجتماعی فریضہ ہے۔ والدین، علماء، سماجی رہنماؤں اور باشعور افراد کو آگے بڑھ کر ایسی تقریبات کو فروغ دینا چاہیے جو سنت کے مطابق ہوں۔ ہمیں یہ سمجھنا ہوگا کہ شادی کی کامیابی مہمانوں کی تعداد، کھانوں کی اقسام، جہیز کی فراوانی اور تقریب کی چمک دمک سے نہیں، بلکہ نکاح کے بعد قائم ہونے والے محبت و اعتماد کے رشتے سے متعین ہوتی ہے۔
آئیے! ہم نکاح کو مشکل نہیں، آسان بنائیں؛ رسم و رواج کو نہیں، سنت کو زندہ کریں؛ دکھاوے کو نہیں، برکت کو ترجیح دیں۔ کیونکہ جس گھر میں سنت کی روشنی ہوتی ہے، وہاں زندگی کے سفر میں رحمتوں اور برکتوں کی امید بھی بڑھ جاتی ہے۔
آخر میں اللہ رب العزت کے حضور دعا ہے کہ وہ عظمیٰ فاطمہ اور مفتی شعیب قاسمی صاحب کے اس نئے سفر کو خوشیوں، محبتوں، عافیتوں اور بے شمار برکتوں سے معمور فرمائے۔ دونوں کو ایک دوسرے کے لیے سکونِ قلب، راحتِ جاں اور بہترین رفیقِ حیات بنائے، نظرِ بد اور ہر طرح کی آزمائش سے محفوظ رکھے اور ان کے گھر کو دین و ایمان، محبت و مودت اور رحمت و سکون کا گہوارہ بنائے۔
اللہ تعالیٰ دونوں خاندانوں کے درمیان محبت و تعلق کو مزید مستحکم فرمائے اور اس نکاح کو دوسروں کے لیے بھی سادگی، سنت اور برکت کا ایک خوب صورت نمونہ بنائے۔
آمین یا رب العالمین!

Misbah Cloth Center Advertisment

Shaikh Akram

Shaikh Akram S/O Shaikh Saleem Chief Editor Aitebar News, Nanded (Maharashtra) Mob: 9028167307 Email: akram.ned@gmail.com

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے