لمحوں کی قدر کرو: زندگی انتظار کا نام نہیں

تحریر:مسعود محبوب خان (ممبئی)
09422724040

زندگی اللہ تعالیٰ کی عطا کردہ ایک نہایت قیمتی نعمت، ایک مختصر مگر حسین سفر اور بے شمار امکانات سے عبارت ایک ایسی امانت ہے، جس کا ہر لمحہ اپنی جگہ منفرد، اہم اور ناقابلِ تلافی ہے۔ یہ زندگی، یہ عمر، یہ وقت، یہ جوانی، یہ بے فکری کے دن اور اپنوں کی قربت میں گزرنے والے خوش گوار لمحات بار بار میسر نہیں آتے۔ زندگی کا سب سے بڑا المیہ شاید یہی ہے کہ انسان جب زندگی کے کسی خوب صورت مرحلے میں ہوتا ہے تو اسے اس کی قدر و قیمت کا پوری طرح احساس نہیں ہوتا، لیکن جب وہ مرحلہ بیت جاتا ہے تو انسان ماضی کی دہلیز پر کھڑا ہوکر ان لمحوں کو یاد کرتا ہے اور سوچتا ہے کہ کاش! ان دنوں کو مزید خوب صورتی، محبت، شکر گزاری اور زندہ دلی کے ساتھ گزارا ہوتا۔ حقیقت یہ ہے کہ زندگی صرف سانس لینے، ذمّہ داریاں نبھانے، مصروفیات میں الجھے رہنے اور مستقبل کی منصوبہ بندی کرتے رہنے کا نام نہیں، بلکہ زندگی کا اصل حسن اس کے ہر لمحے کو شعور، مقصد، محبت اور مسرت کے ساتھ جینے میں پوشیدہ ہے۔
وقت ایک ایسے تیز رفتار دریا کی مانند ہے جو اپنی روانی میں مسلسل آگے بڑھتا رہتا ہے۔ اس کی لہروں میں گزر جانے والے لمحے کبھی واپس نہیں آتے۔ دولت کھو جائے تو دوبارہ کمائی جا سکتی ہے، مکان چھن جائے تو پھر تعمیر ہوسکتا ہے، کاروبار میں نقصان ہو تو محنت سے اس کی تلافی ممکن ہے، حتیٰ کہ بعض ٹوٹے ہوئے رشتے بھی محبت اور خلوص سے دوبارہ استوار کیے جاسکتے ہیں، لیکن وقت ایک ایسی دولت ہے جس کا ایک لمحہ بھی ہاتھ سے نکل جائے تو دنیا کی کوئی طاقت اسے واپس نہیں لا سکتی۔ انسان کی زندگی کا ہر دن اس کے وجود سے کم ہوتا چلا جاتا ہے، مگر عجیب بات ہے کہ ہم اسی زندگی کو بہتر مستقبل کی تلاش میں اس طرح صرف کر دیتے ہیں جیسے ہمارے پاس وقت کی کوئی کمی ہی نہ ہو۔ ہم سوچتے ہیں کہ جب حالات سازگار ہوں گے، جب معاشی پریشانیاں ختم ہو جائیں گی، جب ذمّہ داریوں کا بوجھ کم ہوگا، جب تمام خواب پورے ہو جائیں گے، تب زندگی کو بھرپور انداز میں جئیں گے۔ مگر زندگی کسی ایک بہترین دن کے انتظار میں نہیں رکتی؛ وہ اپنی تمام تر مصروفیات، آزمائشوں، خوشیوں اور ادھورے پن کے ساتھ مسلسل گزرتی رہتی ہے۔ اور پھر ایک دن احساس ہوتا ہے کہ جس خوش گوار مستقبل کے انتظار میں ہم نے اپنا حال قربان کیا تھا، وہ مستقبل بھی ماضی کا حصہ بن چکا ہے۔
زندگی کا ایک اہم ترین اور حسین ترین مرحلہ جوانی ہے۔ یہ محض عمر کا ایک عدد یا جسمانی توانائی کا نام نہیں، بلکہ یہ خوابوں کی پرواز، ارادوں کی پختگی، حوصلوں کی بلندی، تجربات کی جستجو اور کچھ کر گزرنے کے جذبے کا زمانہ ہے۔ جوانی وہ موسمِ بہار ہے جس میں انسان کے اندر امکانات کی بے شمار کلیاں پھوٹتی ہیں، ذہن نئے خیالات کو جنم دیتا ہے، دل بڑے خواب دیکھتا ہے اور قدم ناممکن دکھائی دینے والی منزلوں کی طرف بڑھنے کا حوصلہ رکھتے ہیں۔ یہ وہ عمر ہے جب انسان اپنی شخصیت کو سنوار سکتا ہے، اپنی صلاحیتوں کو نکھار سکتا ہے، علم و ہنر حاصل کرسکتا ہے، نئے راستے تلاش کرسکتا ہے اور اپنے مستقبل کی بنیادیں مضبوط کرسکتا ہے۔ مگر افسوس کہ بعض لوگ اس قیمتی زمانے کو بے مقصد مصروفیات، غیر ضروری فکروں، دوسروں سے موازنے، حسد، احساسِ کمتری اور لوگوں کو خوش رکھنے کی مسلسل کوششوں میں ضائع کر دیتے ہیں۔ انہیں یہ احساس نہیں ہوتا کہ جوانی کا اصل حسن کسی دوسرے کی زندگی کی نقل کرنے میں نہیں، بلکہ اپنی صلاحیتوں کو پہچاننے، اپنی منزل متعین کرنے اور اپنی زندگی کو بامقصد بنانے میں ہے۔
اپنی زندگی کو دوسروں کے معیار پر مت پرکھو۔ ہر انسان کا سفر الگ ہے، ہر شخص کی آزمائش مختلف ہے، ہر ایک کے حالات، وسائل، صلاحیتیں اور منزلیں جداگانہ ہیں۔ کسی کی کامیابی دیکھ کر اپنی ناکامی کا احساس پال لینا، کسی کی خوش حالی دیکھ کر اپنی زندگی کو حقیر سمجھنا اور کسی کے ظاہری مقام و مرتبے سے متاثر ہوکر اپنی ذات سے بے اطمینانی اختیار کر لینا دانش مندی نہیں۔ یاد رکھو! ہر مسکراتا ہوا چہرہ اندرونی سکون کی علامت نہیں ہوتا، ہر کامیاب دکھائی دینے والا انسان بے فکری کی زندگی نہیں گزارتا اور ہر بلند مقام تک پہنچنے والے شخص کے راستے میں آسانیاں ہی آسانیاں نہیں ہوتیں۔ سوشل میڈیا اور معاشرتی نمود و نمائش کے اس دور میں دوسروں کی زندگی کا خوب صورت رخ دیکھ کر اپنی زندگی کا موازنہ کرنا ایک عام نفسیاتی الجھن بن چکی ہے۔ لوگ دوسروں کی خوشیوں کو دیکھتے ہیں، مگر ان کے پیچھے چھپی جدوجہد، قربانیوں، محرومیوں اور مشکلات کو نہیں دیکھ پاتے۔ اس لیے اپنی زندگی کو دوسروں کی ظاہری کامیابیوں کے پیمانے پر مت ناپو، بلکہ اپنی صلاحیتوں، اپنے حالات اور اپنے مقاصد کے مطابق آگے بڑھو۔ تمہاری اصل کامیابی یہ نہیں کہ تم کسی دوسرے سے آگے نکل جاؤ، بلکہ یہ ہے کہ تم گزشتہ کل کے اپنے آپ سے بہتر انسان بن جاؤ۔
زندگی کی خوب صورتی بڑے بڑے کارناموں، مہنگے لباس، وسیع مکانات، طویل سفروں اور غیر معمولی آسائشوں کی محتاج نہیں۔ اس کا حقیقی حسن اکثر ان چھوٹی چھوٹی خوشیوں میں چھپا ہوتا ہے جنہیں ہم اپنی روزمرہ کی مصروفیات میں معمولی سمجھ کر نظر انداز کر دیتے ہیں۔ صبح کی تازہ ہوا، بارش کی پہلی بوند، شام کی ٹھنڈی روشنی، چائے کے ایک کپ پر کسی عزیز سے ہونے والی بے تکلف گفتگو، دوستوں کے ساتھ ہنسی کے چند لمحے، والدین کی دعائیں، بہن بھائیوں کی شرارتیں، بچوں کی معصوم مسکراہٹیں اور اپنوں کے درمیان بے ساختہ گزرنے والا وقت؛ یہ سب زندگی کے وہ انمول تحفے ہیں جن کی قیمت کسی بازار میں ادا نہیں کی جاسکتی۔ انسان اکثر بڑی خوشیوں کی تلاش میں ان چھوٹی نعمتوں کو فراموش کردیتا ہے، حالاں کہ یہی چھوٹے چھوٹے لمحے مل کر زندگی کی سب سے خوب صورت یادیں تشکیل دیتے ہیں۔ اس لیے خوشی کو ہمیشہ کسی بڑے واقعے، بڑی کامیابی یا غیر معمولی موقع سے وابستہ نہ کرو۔ کبھی کبھی زندگی کا سب سے حسین لمحہ وہ ہوتا ہے جس میں کوئی خاص واقعہ پیش نہیں آتا، بس دل مطمئن ہوتا ہے، چہرے پر مسکراہٹ ہوتی ہے اور اردگرد اپنے موجود ہوتے ہیں۔
اپنوں کے ساتھ وقت گزارنا بھی زندگی کی ان نعمتوں میں سے ہے جن کی قدر اکثر اس وقت ہوتی ہے جب وقت ہمارے ہاتھ سے نکل چکا ہوتا ہے۔ ہم روزگار، کاروبار، تعلیم، مستقبل اور معاشرتی ذمّہ داریوں میں اس قدر مصروف ہو جاتے ہیں کہ والدین کے پاس بیٹھنے، ان کی باتیں سننے، ان کے تجربات سے فائدہ اٹھانے اور ان کے ساتھ چند بے تکلف لمحات گزارنے کے لیے بھی وقت نہیں نکال پاتے۔ ہمیں لگتا ہے کہ ابھی بہت وقت ہے، یہ سب لوگ ہمیشہ ہمارے آس پاس رہیں گے، مگر وقت کی حقیقت اس کے برعکس ہے۔ والدین کی عمر بڑھ رہی ہے، بچّے بڑے ہورہے ہیں، دوست اپنی اپنی ذمّہ داریوں میں مصروف ہورہے ہیں اور خاندان کے افراد زندگی کی مختلف راہوں پر آگے بڑھ رہے ہیں۔ آج جو لوگ ہمارے ساتھ بیٹھ کر ہنستے، باتیں کرتے اور خوشیاں بانٹتے ہیں، ممکن ہے کل وہ ہمارے ساتھ نہ ہوں۔ اس لیے رشتوں کو صرف ضرورت کے وقت یاد نہ کرو، بلکہ ان کے لیے وقت نکالو۔ کسی کا حال پوچھ لو، کسی کی خاموشی کو سمجھ لو، کسی کے دکھ میں شریک ہو جاؤ اور کبھی بلا کسی غرض کے اپنے عزیزوں کے ساتھ بیٹھ کر زندگی کے معمولی مگر حسین لمحات سے لطف اندوز ہو۔ کیونکہ بالآخر انسان کے پاس دولت و شہرت سے زیادہ قیمتی وہ یادیں رہ جاتی ہیں جو اس نے اپنے پیاروں کے ساتھ محبت اور خلوص سے تخلیق کی ہوتی ہیں۔
زندگی کو بھرپور انداز میں جینے کا مطلب یہ ہرگز نہیں کہ انسان اپنی ذمّہ داریوں کو فراموش کردے، ہر خواہش کے پیچھے بے سوچے سمجھے دوڑ پڑے یا ہر لمحہ تفریح اور آسائش میں گزار دے۔ حقیقی زندگی وہ ہے جس میں سنجیدگی بھی ہو اور زندہ دلی بھی، محنت بھی ہو اور مسرت بھی، منصوبہ بندی بھی ہو اور حال سے لطف اندوز ہونے کا شعور بھی۔ اپنے خوابوں کی تعبیر کے لیے محنت کرو، اپنے مقاصد کے حصول کے لیے جدوجہد کرو، اپنی صلاحیتوں کو بروئے کار لاؤ، اپنے کردار کو سنوارو اور اپنی زندگی کو کسی بامعنی مقصد سے وابستہ کرو، لیکن اس سارے سفر میں اپنے آپ کو اتنا تھکا مت دو کہ زندگی کی خوب صورتی محسوس کرنے کی صلاحیت ہی باقی نہ رہے۔ کامیابی کی تلاش میں صحت، سکون، رشتے، محبت اور ذہنی آسودگی کو قربان کر دینا دانش مندی نہیں۔ زندگی ایک توازن کا نام ہے؛ انسان کو مستقبل کے لیے محنت ضرور کرنی چاہیے، مگر اس محنت کی قیمت اپنے حال کی تمام خوشیاں قربان کرکے ادا نہیں کرنی چاہیے۔
اسی طرح بے جا فکروں اور غیر ضروری اندیشوں کو اپنی زندگی پر حاوی نہ ہونے دو۔ کچھ لوگ ایسے ہوتے ہیں جو کسی واقعے کے پیش آنے سے پہلے ہی اس کے ممکنہ نتائج سے خوف زدہ رہتے ہیں، کسی کے رویّے سے پہلے ہی دکھی ہو جاتے ہیں، کسی ناکامی کے امکان سے پہلے ہی ہمت ہار بیٹھتے ہیں اور لوگوں کی رائے کے خوف سے اپنی حقیقی شخصیت کو چھپاتے رہتے ہیں۔ وہ اپنی زندگی کا بڑا حصہ ان باتوں پر صرف کر دیتے ہیں جن پر ان کا کوئی اختیار نہیں ہوتا۔ حالاں کہ عقل مندی یہ ہے کہ انسان ان معاملات پر اپنی توانائی صرف کرے جنہیں وہ اپنی کوشش، حکمت اور کردار سے بہتر بنا سکتا ہے۔ جو بات گزر چکی، اسے بار بار سوچ کر اپنے حال کو بوجھل نہ کرو؛ جو ابھی پیش نہیں آئی، اس کے خوف سے اپنی خوشیوں کو پامال نہ کرو؛ اور جو تمہارے اختیار میں نہیں، اسے اپنے ذہنی سکون کا دشمن نہ بننے دو۔ زندگی میں ہر مسئلے کا فوری حل ممکن نہیں ہوتا، ہر سوال کا جواب دستیاب نہیں ہوتا اور ہر خواہش کی تکمیل انسان کے اختیار میں نہیں ہوتی۔ بعض اوقات صبر، بعض اوقات خاموشی، بعض اوقات انتظار اور بعض اوقات حالات کو قبول کر لینا ہی سب سے بڑی دانش مندی ہوتی ہے۔
اپنے خوابوں کو زندہ رکھو، کیونکہ خواب ہی انسان کے اندر آگے بڑھنے کی تحریک پیدا کرتے ہیں۔ زندگی میں کوئی ایسی منزل ضرور ہونی چاہیے جس کے حصول کے لیے انسان صبح اٹھنے کا حوصلہ پائے، اپنی صلاحیتوں کو بروئے کار لائے اور مشکلات کے باوجود سفر جاری رکھے۔ البتہ خواب صرف دیکھنے سے حقیقت نہیں بنتے؛ ان کے لیے محنت، مستقل مزاجی، نظم و ضبط، قربانی اور اللہ تعالیٰ پر توکل بھی ضروری ہے۔ ناکامی سے خوف زدہ ہوکر اپنے قدم روک لینا زندگی کی سب سے بڑی محرومیوں میں سے ایک ہے۔ ناکامی دراصل اختتام نہیں، بلکہ تجربے اور اصلاح کا ایک مرحلہ ہے۔ اگر کسی کوشش میں کامیابی نہیں ملی تو اس کا مطلب یہ نہیں کہ تم میں صلاحیت نہیں، بلکہ ممکن ہے تمہیں اپنی حکمتِ عملی تبدیل کرنے، اپنی مہارت بہتر بنانے یا کسی نئے راستے کا انتخاب کرنے کی ضرورت ہو۔ اپنی رفتار دوسروں سے مت ملاؤ؛ کوئی جلد منزل پر پہنچتا ہے، کوئی دیر سے، مگر اہم بات یہ ہے کہ انسان اپنے مقصد سے مخلص رہے اور اپنے سفر کو جاری رکھے۔
زندگی کی حقیقی معنویت اس وقت مزید روشن ہو جاتی ہے جب انسان اپنے وجود کو صرف اپنی ذات تک محدود رکھنے کے بجائے دوسروں کے لیے بھی خیر و بھلائی کا ذریعہ بناتا ہے۔ کسی ضرورت مند کی مدد کرنا، کسی پریشان حال کو حوصلہ دینا، کسی غم زدہ کے چہرے پر مسکراہٹ لانا، کسی بھٹکے ہوئے کو درست راستہ دکھانا، کسی طالب علم کی رہنمائی کرنا اور کسی بے سہارا انسان کے لیے آسانی پیدا کرنا بھی زندگی کو بھرپور انداز میں جینے کے خوب صورت طریقے ہیں۔ اسلام ہمیں زندگی کی قدر، وقت کی اہمیت، نیک اعمال میں سبقت اور انسانی خدمت کا درس دیتا ہے۔ قرآنِ مجید میں اللہ تعالیٰ نے زمانے کی قسم کھا کر انسان کو وقت کی اہمیت سے آگاہ کیا اور واضح فرمایا کہ انسان خسارے میں ہے، سوائے ان لوگوں کے جو ایمان لائے، نیک اعمال کرتے رہے، ایک دوسرے کو حق کی تلقین کرتے رہے اور صبر کی نصیحت کرتے رہے۔ (سورۃ العصر) یہ مختصر سورت دراصل ایک مکمل ضابطۂ حیات پیش کرتی ہے کہ زندگی کا سرمایہ صرف گزرے ہوئے دنوں کی تعداد نہیں، بلکہ ان دنوں میں انجام دیے گئے نیک اعمال، مثبت کردار اور انسانیت کے لیے کیے گئے مفید کام ہیں۔
یہ بھی یاد رکھنا چاہیے کہ جوانی کی بے فکری اور زندگی کی رنگینی ہمیشہ باقی نہیں رہتی۔ آج جس جسم میں توانائی ہے، کل اس میں تھکن ہوسکتی ہے؛ آج جن آنکھوں میں خوابوں کی چمک ہے، کل ان میں ماضی کی یادوں کی نمی اتر سکتی ہے؛ آج جن راستوں پر قدم تیزی سے اٹھتے ہیں، کل وہی راستے آہستہ آہستہ طے کرنے پڑ سکتے ہیں۔ بہار کا موسم ہمیشہ نہیں رہتا، پھول مرجھاتے ہیں، درختوں سے پتے جھڑتے ہیں اور موسم اپنی کروٹ بدل لیتے ہیں۔ بالکل اسی طرح جوانی بھی زندگی کی ایک عارضی بہار ہے۔ اس کی قدر اسی وقت ممکن ہے جب انسان اس کے دوران اپنی صلاحیتوں کو نکھارے، اچھے تعلقات قائم کرے، خوب صورت یادیں بنائے، علم حاصل کرے، نیکیوں کا سرمایہ جمع کرے اور اپنے وجود کو کسی تعمیری مقصد کے لیے وقف کرے۔ بڑھاپے میں انسان کو اکثر ان چیزوں کا افسوس نہیں ہوتا جو وہ حاصل نہ کرسکا، بلکہ ان لمحوں کا بھی افسوس ہوتا ہے جنہیں وہ بے مقصد گزار بیٹھا، ان رشتوں کا جنہیں وقت نہ دے سکا اور ان خوشیوں کا جنہیں غیر ضروری فکروں کی نذر کردیا۔
لہٰذا زندگی کو کل کے نام پر گروی مت رکھو۔ مستقبل کی فکر ضرور کرو، مگر اس فکر میں اپنے آج کو برباد نہ کرو۔ منصوبے بناؤ، مگر ان منصوبوں کے انتظار میں موجودہ لمحوں کی خوب صورتی سے محروم نہ رہو۔ محنت کرو، مگر مسکرانا نہ بھولو۔ کامیابی حاصل کرو، مگر اپنے پیاروں کو پیچھے نہ چھوڑو۔ خواب دیکھو، مگر اپنی موجودہ نعمتوں کی قدر بھی کرو۔ لوگوں سے محبت کرو، مگر اپنی ذات کی عزت اور ذہنی سکون کو بھی اہمیت دو۔ اپنی غلطیوں سے سیکھو، ناکامیوں سے حوصلہ حاصل کرو اور زندگی کے ہر نئے دن کو ایک نئے امکان کے طور پر قبول کرو۔ ہر صبح یہ احساس لے کر اٹھو کہ آج کا دن اللہ تعالیٰ کی عطا کردہ ایک نئی مہلت ہے، جسے بہتر اعمال، مثبت سوچ، محبت، خدمت اور تعمیری جدوجہد سے خوب صورت بنایا جاسکتا ہے۔
یاد رکھو! زندگی بار بار نہیں ملتی، جوانی ہمیشہ نہیں رہتی اور وقت کسی کے انتظار میں نہیں ٹھہرتا۔ آج جو لمحہ تمہارے ہاتھ میں ہے، وہی تمہارا حقیقی سرمایہ ہے۔ اسے نفرتوں، حسد، موازنے، بے جا فکروں، پچھتاووں اور دوسروں کو خوش کرنے کی لاحاصل کوششوں میں ضائع مت کرو۔ اپنے دل کو محبت سے آباد رکھو، اپنی سوچ کو مثبت بناؤ، اپنے خوابوں کو مقصد سے جوڑو، اپنے رشتوں کو خلوص سے سنبھالو، اپنی زندگی کو نیکی اور خدمت سے مزین کرو اور ہر اس نعمت پر شکر ادا کرو جو تمہیں میسر ہے۔ کبھی کھل کر مسکراؤ، کبھی بے ساختہ ہنسو، کبھی اپنے عزیزوں کے ساتھ بیٹھ کر پرانی یادیں تازہ کرو، کبھی کسی نئی منزل کی طرف قدم بڑھاؤ اور کبھی تنہائی میں اپنے ربّ کی عطا کردہ نعمتوں پر غور کرکے دل کو شکر گزاری سے بھر لو۔
کیونکہ زندگی کا اصل حسن صرف طویل عمر پانے میں نہیں، بلکہ عمر کے ہر لمحے کو بامقصد، بامعنی، محبت آمیز اور قابلِ قدر بنانے میں ہے۔ وقت گزر جانے کے بعد صرف یادیں باقی رہ جاتی ہیں، مگر وہی یادیں انسان کے ماضی کو خوب صورت بناتی ہیں جن میں محبت، خلوص، جدوجہد، مسکراہٹیں اور نیکیوں کی خوشبو شامل ہو۔ اس لیے زندگی کو صرف گزارو مت، اسے شعور کے ساتھ جیو؛ صرف دن پورے مت کرو، دنوں کو خوب صورت بناؤ؛ صرف مستقبل کے خواب مت دیکھو، اپنے آج کو بھی ان خوابوں کے قابل بناؤ۔ کیونکہ جو وقت آج تمہارے پاس ہے، وہی تمہاری زندگی ہے، اور جو خوشی آج تمہارے دل میں اتر سکتی ہے، اسے کل کے انتظار میں ضائع کر دینا زندگی کے ساتھ سب سے بڑی ناانصافی ہے۔
✒️ Masood M. Khan (Mumbai)
📧masood.media4040@gmail.com