ڈاکٹر ذاکر حسین پرائمری اسکول سیلو کے صدر مدرس الحاج محمد عبداللیم صوفی کو ریاستی سطح کا بیسٹ ٹیچر ایوارڈ

سیلو: 8؍نومبر (ابرار بیگ) آزاد ہندوستان کے پہلے وزیر تعلیم مولانا ابوالکلام آزاد کے یومِ پیدائش کے موقع پر ’مسلم ویلفیئر ایسوسی ایشن‘ کی جانب سے دیا جانے والا ’اسٹیٹ بیسٹ ٹیچر ایوارڈ-2026‘ سیلو شہر کے ڈاکٹر ذاکر حسین پرائمری اسکول کے صدر مدرس الحاج محمد عبداللیم محمد عبدالقیوم کو دیا جائے گا۔ تعلیمی میدان میں ان کی شاندار خدمات کا اعتراف کرتے ہوئے ایوارڈ سلیکشن کمیٹی نے اس اعزاز کے لیے ان کا انتخاب کیا ہے۔ اس شاندار کامیابی پر انہیں مبارکباد پیش کی جا رہی ہے۔ یہ ایوارڈ آنے والی 15 نومبر بروز اتوار کو صبح 10:30 بجے اورنگ آباد میں واقع مولانا آزاد ریسرچ سینٹر، ٹی وی سینٹر روڈ، مجنوں ہل کے مقام پر ایک پُروقار تقریب میں تفویض کیا جائے گا۔اس ایوارڈ تقریب کی صدارت مسلم ویلفیئر ایسوسی ایشن کے ڈائریکٹر مولانا آزاد کریں گے۔ اس کے علاوہ مراٹھواڑہ ٹیچرز کانسٹی ٹیونسی کے معزز سابق رکن اسمبلی وکرم کالے اور دیہی ترقی و پنچایت راج منترالیہ، بمبئی کے جوائنٹ سکریٹری اور فلمی اداکار انیل مورے کی خصوصی موجودگی اور مسلم ویلفیئر ایسوسی ایشن کے قومی صدر سلیم سارنگ کے ہاتھوں یہ ایوارڈ عطا کیا جائے گا۔ ایوارڈ سلیکشن کمیٹی کے صدر محمد یونس انصاری، استقبالیہ صدر پروفیسر ڈاکٹر رضوان خان اور تقریب کے کنوینر عظمت خان اور ان کے رفقا نے انتظامات سنبھالے ہیں۔صدر مدرس محمد عبداللیم صوفی سر کی اس کامیابی پر سیلو شہر اور اطراف کے علاقوں میں ان پر مبارکبادوں کی بوچھاڑ ہو رہی ہے۔