تمام سرکاری خدمات سو فیصد آن لائن کرکے انتظامیہ کو مزید شفاف بنائیں: ریاستی خدمات حقوق کمشنر ڈاکٹر کرن جادھو کی ہدایت

ناندیڑ :12؍اکتوبر(نمائندہ اعتبار)مؤثر، شفاف اور تیز رفتار انتظامیہ کے لیے تمام سرکاری خدمات کو سو فیصد آن لائن کیا جائے۔ آن لائن خدمات کے ذریعے دفتری کام کاج پر مؤثر نگرانی رکھنا آسان ہوتا ہے۔ شہریوں کو شفاف خدمات فراہم کرنا انتظامیہ کی سماجی اور اخلاقی ذمہ داری ہے۔ یہ ہدایات چھترپتی سمبھاجی نگر ڈویژن کے ریاستی خدمات حقوق کمشنر ڈاکٹر کرن جادھو نے دیں۔وہ ضلع کلکٹر دفتر کے پلاننگ بھون میں منعقدہ اجلاس سے خطاب کر رہے تھے۔ اجلاس میں مہاراشٹر قانونِ حقِ خدماتِ عامہ کے تحت نوٹیفائی کی گئی خدمات پر عمل درآمد کا جائزہ لیا گیا۔ اس موقع پر ضلع کلکٹر راہل کرڈیلے، سپرنٹنڈنٹ آف پولیس ڈاکٹر نیلاب روہن، ڈپٹی کلکٹر اجئے شندے، رہائشی ڈپٹی کلکٹر کرن امبیکر اور ضلع پریشد کے ڈپٹی چیف ایگزیکٹیو آفیسر ڈی۔ بی۔ گری سمیت مختلف محکموں کے افسران موجود تھے۔ڈاکٹر جادھو نے کہا کہ شہریوں کو نوٹیفائی شدہ سرکاری خدمات مقررہ مدت کے اندر ملنا ضروری ہے۔ اس معاملے میں ناندیڑ ضلع کی کارکردگی اچھی ہے اور ضلع کو ریاست میں پہلا مقام حاصل کرنے کے لیے کوششیں کرنی چاہئیں۔انہوں نے بتایا کہ جنوری سے دسمبر 2026 ءکے دوران بہترین ’آپلے سرکار‘ سیوا کیندر، بہترین گرام پنچایت سطح کے ’آپلے سرکار‘ سیوا کیندر اور میونسپل کارپوریشن کے بہترین خدماتی مراکز کو ڈویژنل اور ریاستی سطح پر ایوارڈ دے کر اعزاز سے نوازا جائے گا۔ انہوں نے تمام متعلقہ محکموں کو ان ایوارڈز کے لیے بہترین کارکردگی کا مظاہرہ کرنے کی ہدایت بھی دی۔ڈاکٹر جادھو نے ہدایت دی کہ قانونِ حقِ خدماتِ عامہ کے تحت موصول ہونے والی درخواستیں زیر التوا نہ رہیں، اس کے لیے محکموں کے سربراہان باقاعدگی سے جائزہ لیں اور ضروری پیروی کریں۔ مقررہ مدت میں خدمات فراہم نہ کیے جانے کے سبب فرسٹ اپیلیٹ افسران کے پاس دائر ہونے والے معاملات کی سماعت کرکے انہیں وقت پر نمٹایا جائے۔انہوں نے مزید کہا کہ فرسٹ اپیلیٹ افسران اپنے ماتحت نامزد افسران کی کارکردگی کا سالانہ جائزہ لیں۔ اس کے علاوہ اپیل دائر کرنے والے درخواست گزاروں کو درخواست یا دستاویزات میں موجود خامیوں سے آگاہ کیا جائے اور مناسب رہنمائی فراہم کی جائے۔دیہی علاقوں کے شہریوں کو سرکاری خدمات تیزی سے فراہم کرنے کے لیے گاؤں کی سطح پر کام کرنے والے افسران کے لیے ایک متعین طریقۂ کار تیار کیا جائے۔ ان افسران کے پاس موصول ہونے والی درخواستوں کو فوری طور پر نمٹانے کے لیے باقاعدگی سے جائزہ بھی لیا جائے۔اس موقع پر ضلع کلکٹر راہل کرڈیلے نے کہا کہ ناندیڑ ضلع میں شفاف اور تیز رفتار خدمات فراہم کرتے ہوئے ریاست کے تین سرفہرست اضلاع میں جگہ بنانے کی کوشش کی جائے گی۔ انہوں نے یہ بھی بتایا کہ ’آپلے سرکار‘ سیوا کیندروں کے عمل کو مکمل کرکے نئے خدماتی مراکز کو شناختی نمبر فراہم کیے جائیں گے۔اجلاس میں مختلف محکموں کے افسران نے اپنے اپنے محکموں کی کارکردگی کا جائزہ پیش کیا۔