درگاہ حضرت سید علاؤ الدین بابا میں نالیوں کا گندا پانی داخل، درگاہ کا تقدس پامال

سیلو :12؍اکتوبر(ابرار بیگ)سیلو شہر کے رحمان نگر علاقے میں واقع درگاہ حضرت سید علاؤ الدین بابا (چھلاوا درگاہ) میں نالیوں کا گندا اور آلودہ پانی داخل ہونے کی وجہ سے درگاہ کا تقدس متاثر ہو رہا ہے۔سیلو بلدیہ انتظامیہ کی جانب سے دیگر تمام برادریوں کے چھوٹے بڑے مذہبی مقامات پر کروڑوں روپے کے فنڈز خرچ کر کے ان کی خوبصورتی اور تزئین و آرائش کا کام کیا جا رہا ہے، لیکن رحمان نگر میں واقع مسلم کمیونٹی کی اس درگاہ پر ایک روپیہ بھی خرچ نہیں کیا گیا۔ اس کے برعکس، علاقے میں نالیوں کی باقاعدہ صفائی نہ ہونے کے باعث نالیوں کا بدبودار اور گندا پانی درگاہ کے اندر داخل ہو رہا ہے، جس سے اس پاک جگہ کی بے حرمتی ہو رہی ہے۔مسلم برادری کے افراد نے تنبیہ کی ہے کہ اگر سیلو بلدیہ انتظامیہ نے اس مسئلے پر جلد از جلد اقدام نہیں کیا اور نالیوں کی صفائی کا مناسب انتظام نہیں کیا، تو درگاہ کے اطراف سے جمع ہونے والا گندا پانی اور کچرا سیلو بلدیہ کے چیف آفیسر کے دفتری کمرے میں ڈال دیا جائے گا۔