سڑک کنارے کسانوں سے روبرو ہوئے ریاستی وزیرِ زراعت

ملکاپور: 23/ ستمبر ( محمد احسان سر) حالیہ دنوں میں ہونے والی بارش کے باعث کپاس، سویا بین اور دیگر فصلوں کی صورتحال کا جائزہ لینے کے لیے ریاستی وزیرِ زراعت و ضلع واشم کے نگراں وزیر دتاتریہ ماما بھرنے نے 19 ستمبر کو کارنجہ تعلقہ کے کھیڑی بُدرُک علاقے کا دورہ کیا. اس موقع پر انہوں نے سڑک کنارے ہی کسانوں سے براہِ راست گفتگو کرتے ہوئے فصلوں کی موجودہ صورتحال، بارش سے پیدا ہونے والے مسائل اور کسانوں کی توقعات کے بارے میں تفصیلی معلومات حاصل کیں.
کارنجہ ، مرتِضی پور شاہراہ پر واقع کھیڑی بُدرُک کے قریب بڑی تعداد میں کسان وزیرِ زراعت سے ملاقات کے لیے موجود تھے. وزیرِ زراعت نے کسانوں کی بات توجہ سے سنی اور ان کی جانب سے پیش کی گئی مختلف تجاویز اور مسائل کے بارے میں متعلقہ افسران سے معلومات حاصل کیں. اس دوران انہوں نے تاخیر سے پہنچنے پر افسوس کا اظہار بھی کیا.
دورے کے دوران وزیرِ زراعت نے کپاس اور سویا بین کی فصلوں کا موقع پر معائنہ کیا اور بارش کے نتیجے میں فصلوں پر پڑنے والے اثرات کا جائزہ لیا. انہوں نے کسانوں سے فصلوں کی حالت، درپیش مشکلات اور متوقع حکومتی امداد کے بارے میں براہِ راست معلومات حاصل کیں. اس موقع پر زرعی کمشنر، ضلع کلکٹر، تحصیلدار، تعلقہ زرعی افسر سمیت متعلقہ محکموں کے افسران موجود تھے. کسانوں کی جانب سے مختلف مطالبات اور تجاویز پیش کیے گئے، جن پر متعلقہ افسران سے صورتحال کی تفصیلات حاصل کرتے ہوئے ضروری کارروائی کے لیے ہدایات دی گئیں. وزیرِ زراعت نے اس بات پر زور دیا کہ کسانوں کو حکومتی اسکیموں کے ذریعے ضروری مدد فراہم کرنے کے لیے انتظامیہ اور متعلقہ محکموں کے درمیان مؤثر تال میل کے ساتھ کام کیا جائے. فصلوں کی صورتحال اور کسانوں کے مسائل سے متعلق ضروری معلومات بھی زرعی محکمہ کے افسران نے موقع پر جمع کیں. وزیرِ زراعت کے اس براہِ راست کسان رابطے کے دوران مقامی کسانوں کو اپنی مشکلات، فصلوں کی صورتحال اور توقعات حکومتی نمائندے کے سامنے براہِ راست رکھنے کا موقع ملا اور امداد کا بھرپور یقین دلایا.