لمب گاؤں پولیس کی بڑی کارروائی، غیر قانونی طور پر منتقل کیے جا رہے گائے کی نسل کے 10 جانور بازیاب

ناندیڑ: 21 ؍ستمبر (نمائندہ اعتبار) ناندیڑ ضلع میں گائے کی نسل کے جانوروں کی غیر قانونی نقل و حمل کے خلاف جاری خصوصی مہم کے تحت لمب گاؤں پولیس نے بڑی کارروائی کرتے ہوئے 10 زندہ بیلوں کو بازیاب کرایا۔ پولیس نے جانوروں کی منتقلی کے لیے استعمال کی جانے والی 2 بولیرو پک اَپ گاڑیوں اور ایک سوئفٹ ڈیزائر کار سمیت مجموعی طور پر 25 لاکھ 55 ہزار روپئے مالیت کا مال ضبط کیا ہے۔ اس معاملے میں 6 افراد کے خلاف مقدمہ درج کیا گیا ہے۔پولیس سپرنٹنڈنٹ ناندیڑ ڈاکٹر نیلابھ روہن کی ہدایت پر اور ایڈیشنل پولیس سپرنٹنڈنٹ ارچنا پاٹل اور سورج گُرو کی رہنمائی میں یہ کارروائی انجام دی گئی۔ پولیس کے مطابق لمب گاؤں پولیس اسٹیشن کے افسران اور اہلکار رات کے گشت پر مامور تھے، اسی دوران انہیں اطلاع ملی کہ پورنا سے ناندیڑ کی جانب گائے کی نسل کے جانوروں کو غیر قانونی طور پر ذبح کے لیے منتقل کیا جا رہا ہے۔ اطلاع ملتے ہی پولیس نے نالیشور پھاٹا، لمب گاؤں کے قریب ناکہ بندی کرکے کارروائی کا منصوبہ بنایا۔ناکہ بندی کے دوران پولیس کو 2 مشتبہ بولیرو پک اَپ گاڑیاں آتی ہوئی نظر آئیں۔ اہلکاروں نے دونوں گاڑیوں کو روک کر تلاشی لی تو ان میں 10 بیل انتہائی تنگ جگہ میں، مختصر رسیوں سے باندھ کر اور گنجائش سے زیادہ تعداد میں بھرے ہوئے پائے گئے۔ پولیس کے مطابق جانوروں کی نقل و حمل کے لیے ضروری اجازت نامہ یا ویٹرنری سرٹیفکیٹ بھی موجود نہیں تھا۔پولیس نے پنچوں کی موجودگی میں دونوں گاڑیوں سے 5، 5 بیل برآمد کیے۔ پہلی بولیرو پک اَپ میں موجود 5 بیلوں کی تخمینی قیمت 2 لاکھ 25 ہزار روپئے اور دوسری گاڑی میں موجود 5 بیلوں کی قیمت 2 لاکھ 30 ہزار روپئے بتائی گئی ہے۔ اس کے علاوہ جانوروں کے ساتھ آنے والی سوئفٹ ڈیزائر کار کو بھی ضبط کیا گیا، جس کی تخمینی قیمت 8 لاکھ روپئے بتائی گئی ہے۔ اس طرح پولیس نے جانوروں اور گاڑیوں سمیت مجموعی طور پر 25 لاکھ 55 ہزار روپئے کا مال ضبط کیا۔اس معاملے میں ذبیح اللہ خان ظہیراللہ خان، شہباز جعفر قریشی (عمر 22 سال)، اکبر خان (عمر 30 سال)، محمد محفوظ محمد غوث(عمر 21 سال)، عمر سلیم قریشی (عمر 27 سال) اور سید شہباز رہبر (عمر 24 سال) کے خلاف لمب گاؤں پولیس اسٹیشن میں مقدمہ درج کیا گیا ہے۔ پولیس نے پولیس ہیڈ کانسٹیبل پردیپ گردن مارے کی شکایت پر جرم نمبر 136/2026 کے تحت جانوروں پر ظلم کی روک تھام کے قانون، مہاراشٹر تحفظِ حیوانات ایکٹ اور موٹر وہیکل ایکٹ کی متعلقہ دفعات کے تحت کارروائی کی ہے۔یہ کارروائی لمب گاؤں پولیس اسٹیشن کے اسسٹنٹ پولیس انسپکٹر بودھنکر، پولیس سب انسپکٹر سید اور ان کی ٹیم کے اہلکاروں پردیپ گردن مارے، مورے، ساتارے، قاضی، ہوم گارڈ ناگورے اور مورے نے انجام دی۔ پولیس حکام نے ٹیم کی کارکردگی کو اہم قرار دیا ہے۔