SIR 2026: نوٹس ملتے ہی کیا کریں؟ وہ تمام باتیں جو ہر ووٹر کو معلوم ہونی چاہئیں

(خصوصی رپورٹ | ناندیڑ، مہاراشٹر)

مہاراشٹر میں جاری Special Intensive Revision (SIR) 2026 کے دوران متعدد ووٹروں کو معلومات کی تصدیق (Verification) کے لیے نوٹس جاری کیے جا سکتے ہیں۔ ایسے میں بہت سے شہریوں کے ذہن میں یہ سوال پیدا ہو رہا ہے کہ نوٹس کیوں جاری کی جاتی ہے؟ کون جاری کرتا ہے؟ ووٹر تک کیسے پہنچتی ہے؟ اس کا جواب کیسے دینا ہوتا ہے؟ سماعت (Hearing) کیسے ہوتی ہے؟ اور کن دستاویزات کے ساتھ حاضر ہونا ضروری ہے؟ پیشِ خدمت ہے مکمل رہنمائی۔
نوٹس کیوں جاری کی جاتی ہے؟
اگر انتخابی ریکارڈ کی جانچ کے دوران کسی ووٹر کی معلومات، شناخت یا دستاویزات کی مزید تصدیق ضروری سمجھی جائے تو متعلقہ انتخابی افسر کی جانب سے نوٹس جاری کی جاتی ہے۔
نوٹس کون جاری کرتا ہے؟
نوٹس Electoral Registration Officer (ERO) جاری کرتا ہے، جبکہ اسے متعلقہ ووٹر تک پہنچانے کی ذمہ داری Booth Level Officer (BLO) کی ہوتی ہے۔
نوٹس ووٹر تک کیسے پہنچتی ہے؟
BLO نوٹس براہِ راست ووٹر کے گھر پہنچاتا ہے۔ نوٹس وصول کرنے کے بعد ووٹر سے دستخط شدہ Acknowledgement Slip حاصل کی جاتی ہے، جسے BLO انتخابی دفتر میں جمع کراتا ہے۔
نوٹس میں کیا درج ہوتا ہے؟
مہاراشٹر میں استعمال ہونے والا نوٹس دیگر ریاستوں کے نوٹس سے معمولی فرق رکھ سکتا ہے، تاہم عام طور پر اس میں درج ذیل معلومات شامل ہوتی ہیں:
– نوٹس نمبر
– QR Code
– ووٹر کا نام
– EPIC (Voter ID) نمبر
– اسمبلی حلقہ اور حلقہ نمبر
– پولنگ پارٹ نمبر
– سیریل نمبر
– مکمل پتہ
– Enumeration Form (EAF) موصول ہونے کی تفصیل
اہم بات:
نوٹس نمبر سے معلوم ہوتا ہے کہ نوٹس کس مقصد کے لیے جاری کی گئی ہے، اس لیے نوٹس کو ابتدا سے آخر تک غور سے ضرور پڑھیں۔
نوٹس کا دوسرا صفحہ کیوں اہم ہے؟
نوٹس کے دوسرے صفحے پر قانونی ہدایات اور ضروری معلومات درج ہوتی ہیں، جنہیں ہر ووٹر کے لیے پڑھنا اور سمجھنا ضروری ہے۔
غلط معلومات دینا جرم ہے:
اگر کوئی شخص جان بوجھ کر غلط معلومات فراہم کرے یا جعلی دستاویزات پیش کرے تو اس کے خلاف بھارتیہ نیائے سنہیتا (BNS) کی متعلقہ قانونی دفعات کے تحت کارروائی کی جا سکتی ہے۔
اسی طرح ووٹر لسٹ میں نام شامل کروانے، حذف کروانے یا کسی بھی قسم کی ترمیم کے لیے جان بوجھ کر جھوٹا بیان یا غلط اعلان کرنا Representation of the People Act, 1950 کی دفعہ 31 کے تحت جرم ہے، جس پر قانون کے مطابق قید، جرمانہ یا دونوں سزائیں ہو سکتی ہیں۔
سماعت (Hearing) کے وقت کیا کریں؟
– مقررہ تاریخ اور وقت پر ضرور حاضر ہوں۔
– تمام اصل اور مستند دستاویزات اپنے ساتھ لے جائیں۔
– صرف درست اور مکمل معلومات فراہم کریں۔
– کسی بھی قسم کی جعلی یا غلط دستاویز ہرگز پیش نہ کریں۔
عام طور پر قابلِ قبول دستاویزات:
– آدھار کارڈ
– پیدائش کا سرٹیفکیٹ
– پاسپورٹ
– اسکول لیونگ سرٹیفکیٹ
– آٹھویں، دسویں یا بارہویں کی مارک شیٹ یا سرٹیفکیٹ
– ڈومیسائل سرٹیفکیٹ
– SC/ST/OBC ذات کا سرٹیفکیٹ
– حکومت، PSU، بینک، ڈاک خانہ یا LIC کی جانب سے جاری پرانے سرکاری ریکارڈ
– NPR یا دیگر سرکاری رجسٹر میں اندراج
– خاندانی رجسٹر
– زمین کی الاٹمنٹ یا ملکیت سے متعلق سرکاری دستاویزات
– سابقہ SIR سے متعلق قابلِ قبول انتخابی ریکارڈ
نوٹ: حتمی طور پر قابلِ قبول دستاویزات کا فیصلہ متعلقہ انتخابی حکام اور موجودہ سرکاری ہدایات کے مطابق ہوگا۔
عوام کے لیے اہم پیغام:
اگر آپ کو SIR 2026 کے تحت نوٹس موصول ہو تو ہرگز پریشان نہ ہوں۔ نوٹس کو اچھی طرح پڑھیں، مقررہ تاریخ اور وقت پر سماعت میں ضرور حاضر ہوں، تمام اصل دستاویزات اپنے ساتھ لے جائیں اور صرف درست معلومات فراہم کریں۔ آپ کا تعاون ہی آپ کے معاملے کے بروقت اور آسان حل میں مددگار ثابت ہوگا۔
’’اینامولی کے بعض معمولی معاملات میں، بی ایل او کو پنچنامہ (Panchnama) تیار کرنے کا اختیار دیا جائے گا، تاکہ تصدیق کے بعد متعلقہ ووٹر کا نام SIR کی فہرست میں شامل کیا جا سکے۔‘‘
منجانب:
محمد اظہر خان
ناگرک سویدھا کیندر
جماعتِ اسلامی ہند، ناندیڑ