اہل ووٹرز کے لیے سنہری موقع، نام درج کرانے اور غلطیاں درست کرانے کی سہولت

ممبئی:27؍جولائی:مہاراشٹر ریاست میں ووٹر فہرستوں کی خصوصی جامع نظرِ ثانی (Special Intensive Revision – SIR) کا عمل جاری ہے۔ اس کے تحت موجودہ ووٹر فہرست میں شامل تمام رائے دہندگان کو ہدایت دی جاتی ہے کہ وہ 8 اگست 2026 تک گنتی (Enumeration) فارم مکمل طور پر پُر کرکے، اس پر دستخط کرنے کے بعد گھر گھر آنے والے متعلقہ بوتھ لیول آفیسر (BLO) کے حوالے کریں۔ جن ووٹروں نے فارم پُر کرکے دستخط کے ساتھ جمع کرا دیا ہوگا، ان کے نام 17 اگست 2026 کو شائع ہونے والی ابتدائی (مسودہ) ووٹر فہرست میں شامل کیے جائیں گے۔جن اہل ووٹروں کے نام مذکورہ ابتدائی ووٹر فہرست میں موجود نہیں ہوں گے یا جو نئے ووٹر ہوں گے، انہیں 17 اگست 2026 سے 16 ستمبر 2026 تک فارم نمبر 6 (اعلان نامہ اور ضروری دستاویزات کے ساتھ) جمع کروا کر اپنا نام ووٹر فہرست میں شامل کرانے کی سہولت حاصل ہوگی۔ موصولہ درخواستوں کی جانچ رجسٹریشن آفیسر برائے رائے دہندگان کے ذریعے کی جائے گی اور اہل افراد کے نام حتمی ووٹر فہرست میں شامل کیے جائیں گے۔اس ایک ماہ کے عرصے (دعووں اور اعتراضات کی مدت) کے دوران ووٹر اپنے نام کے اندراج یا ریکارڈ میں ترمیم کے لیے بالترتیب فارم نمبر 6 یا فارم نمبر 8 جمع کرا سکتے ہیں۔ اسی طرح متعلقہ اسمبلی حلقے کا کوئی بھی ووٹر، ووٹر فہرست میں درج کسی نام کو حذف کرانے کے لیے فارم نمبر 7 کے ذریعے اعتراض درج کرا سکتا ہے۔واضح رہے کہ ووٹر فہرست میں نام شامل کرانے، معلومات میں ترمیم کرانے یا نام حذف کرانے کے لیے درخواست دیتے وقت اگر کوئی شخص غلط اعلان یا جھوٹا بیان دیتا ہے تو عوامی نمائندگی ایکٹ، 1950 کی دفعہ 31 کے مطابق اسے ایک سال تک قید، جرمانہ یا دونوں سزائیں دی جا سکتی ہیں۔حتمی ووٹر فہرست 19 اکتوبر 2026 کو شائع کی جائے گی۔مزید یہ کہ عوامی نمائندگی ایکٹ، 1950 کی دفعہ 22 اور 23 کے تحت حتمی ووٹر فہرست کی اشاعت کے بعد بھی ووٹر فہرست میں ترمیم یا نئے اہل ووٹر کا نام شامل کرایا جا سکتا ہے۔ لہٰذا، حتمی ووٹر فہرست جاری ہونے کے بعد بھی کوئی بھی اہل شخص مقررہ فارم نمبر 6 کے ذریعے اپنا نام ووٹر فہرست میں شامل کرانے کی درخواست دے سکتا ہے۔ووٹر فہرست کی اصلاح ایک مسلسل جاری رہنے والا عمل (Continuous Updation) ہے، اور دفعہ 23(3) کے مطابق ایسی اصلاحات کسی بھی انتخاب کے لیے کاغذاتِ نامزدگی داخل کرنے کی آخری تاریخ تک کرائی جا سکتی ہیں۔ لہٰذا تمام شہری اس بات کا خصوصی طور پر نوٹ لیں۔