ناندیڑ لوکل اتھارٹی حلقۂ انتخاب کے انتخابات میں بی جے پی کے امرناتھ راجورکر کامیاب

ناندیڑ:22؍جون ( نمائندہ اعتبار) مہاراشٹر قانون ساز کونسل کے ناندیڑ لوکل اتھارٹی حلقۂ انتخاب کے انتخابات میں بھارتیہ جنتا پارٹی کے امیدوار امرناتھ راجورکر کو کامیاب قرار دیا گیا۔ کامیاب امیدوار امرناتھ راجورکر کو انتخابی فیصلہ آفیسر راہل کرڈیلے کے ہاتھوں کامیابی کا سرٹیفکیٹ پیش کیا گیا۔انتخابات میں ڈالے گئے ووٹوں کی گنتی آج یہاں ضلع کلکٹر آفس کے احاطے میں واقع نیوجن بھون میں انجام دی گئی۔ ووٹوں کی گنتی کے بعد انتخابی فیصلہ آفیسر نیز ضلع کلکٹر راہل کرڈیلے نے اعلان کیا کہ امرناتھ راجورکر نے 339 ووٹ حاصل کرتے ہوئے کامیابی حاصل کی۔ اس موقع پر انتخابی مبصر ڈاکٹر مادھوی کھوڑے-چورے بھی موجود تھیں۔ناندیڑ قانون ساز کونسل کے انتخابی میدان میں بھارتیہ جنتا پارٹی کے امیدوار امرناتھ راجورکر، آزاد امیدوار کرشنا ناگیش پاٹل اور پرشانت انگولے سمیت کل 3 امیدوار تھے۔ اس انتخاب کے لیے منعقدہ رائے دہی میں ضلع کے آٹھ پولنگ مراکز پر 452 میں سے 451 ووٹروں نے اپنے حقِ رائے دہی کا استعمال کیا تھا۔ ان ووٹوں کی گنتی آج نیوجن بھون کے کابینیٹ ہال میں سخت حفاظتی انتظامات کے درمیان پُرامن اور منظم انداز میں انجام دی گئی۔ووٹوں کی گنتی سے قبل انتخابی فیصلہ آفیسر نیز ضلع کلکٹر راہل کرڈیلے نے گنتی کے عمل کے بارے میں گنتی کے آفیسران اور ملازمین کو ضروری ہدایات دیں۔ اس موقع پر امیدواران اور گنتی کے نمائندے بھی موجود تھے۔ تین میزوں پر گنتی کے آفیسران، معاون آفیسران اور ملازمین نے ووٹوں کی گنتی انجام دی۔ اس گنتی میں 428 ووٹ درست قرار پائے۔ ان میں سے امرناتھ راجورکر کو 339 ووٹ حاصل ہوئے، جبکہ آزاد امیدوار کرشنا ناگیش پاٹل کو 84 اور پرشانت وراج انگولے کو 5 ووٹ ملے۔ ووٹوں کی گنتی میں 23 ووٹ باطل قرار دیے گئے۔ووٹوں کی گنتی کے بعد انتخابی فیصلہ آفیسر راہل کرڈیلے نے بھارتیہ جنتا پارٹی کے امیدوار امرناتھ راجورکر کو کامیاب قرار دیا۔ اس موقع پر انتخابی مبصر ڈاکٹر مادھوی کھوڑے-چورے کے علاوہ ووٹوں کی گنتی کے عمل میں شریک آفیسران، ایڈیشنل ضلع کلکٹر ڈاکٹر رتندیپ گائیکواڑ، ریسیڈنٹ ڈپٹی کلکٹر کرن امبیکر، ڈپٹی کلکٹر (جنرل) اجئے شندے، ڈپٹی کلکٹر (انتخابات) راجکمار مانے، ڈپٹی کلکٹر (روہیو) ہنومنت کولیکر، سب ڈویژنل آفیسر ڈاکٹر سچن کھلال، بھوکر کے سب ڈویژنل آفیسر پروین میگشیٹی، دیگلور کے سب ڈویژنل آفیسر انوپ پاٹل، تحصیلدار سنجے وارکڑ سمیت مختلف محکموں کے آفیسران اور ملازمین موجود تھے۔ووٹوں کی گنتی کے عمل اور لوکل اتھارٹی انتخابات کی تمام کارروائی پُرامن اور منظم انداز میں مکمل کرنے کے لیے تعاون کرنے والے آفیسران، ملازمین اور مختلف شعبوں سے وابستہ افراد کا ڈپٹی کلکٹر (انتخابات) راجکمار مانے نے شکریہ ادا کیا۔