ناندیڑ شہر میں عوامی مقامات پر ہنگامہ آرائی اور امنِ عامہ میں خلل ڈالنے والے 11 افراد کے خلاف کارروائی

ناندیڑ :20؍جون(نمائندہ اعتبار)پولیس سپرنٹنڈنٹ ناندیڑ ابیناش کمار کی ہدایت پر ناندیڑ شہر میں عوامی مقامات پر رونما ہونے والے جرائم کی روک تھام کے لیے قائم کردہ ’’ناندیڑ سٹی اسٹریٹ سیفٹی ڈرائیو‘‘ کے تحت خصوصی ٹیم نے کارروائی کرتے ہوئے عوامی امن میں خلل ڈالنے والے 11 افراد کے خلاف مہاراشٹر پولیس ایکٹ کی دفعات 110/117 کے تحت کارروائی کی ہے۔ایڈیشنل پولیس سپرنٹنڈنٹ سورج گرو کے رہنمائی میں ٹیم انچارج این۔ جی۔ پومنالکر اور چارلی پولیس عملے نے 19 جون 2026 کو شہر کے مختلف علاقوں میں گشت کے دوران یہ کارروائیاں انجام دیں۔بھاگیہ نگر پولیس حدود میں چھترپتی چوک اور سمرت چوک کے علاقے میں چار افراد شراب نوشی کرکے عوامی امن میں خلل ڈالتے ہوئے پائے گئے، جن کے خلاف دفعہ 110/117 کے تحت کارروائی کی گئی۔ اس کے علاوہ علاقے میں شراب کی دکانوں، وائن شاپس اور ہوٹلوں کی جانچ کی گئی اور اسکولوں، کالجوں اور کوچنگ مراکز کے اطراف بھی معائنہ کیا گیا۔ناندیڑ دیہی پولیس حدود میں ڈھولے کارنر کے مقام پر ایک شخص شراب کے نشے میں عوامی سکون میں خلل ڈالتے ہوئے پایا گیا، جس کے خلاف بھی مذکورہ دفعات کے تحت کارروائی کی گئی۔ ساتھ ہی شراب کی دکانوں، ہوٹلوں اور تعلیمی اداروں کے اطراف نگرانی کی گئی۔اتوارہ پولیس حدود میں پرانے مونڈھا علاقے میں ایک شخص شراب نوشی کے بعد عوامی امن میں خلل ڈالتے ہوئے پایا گیا، جس پر قانونی کارروائی عمل میں لائی گئی۔ اس موقع پر علاقے کی شراب کی دکانوں، وائن شاپس اور تعلیمی اداروں کا بھی معائنہ کیا گیا۔دریں اثنا دامنی پاتھک نے برقی چوک اور صرافہ بازار کے علاقے میں پانچ افراد کو شور و غل اور ہنگامہ آرائی کرتے ہوئے پایا، جس پر ان کے خلاف اتوارہ پولیس اسٹیشن میں مہاراشٹر پولیس ایکٹ کی دفعات 110/117 کے تحت کارروائی کی گئی۔ دامنی پاتھک نے اسکولوں، کالجوں اور کوچنگ مراکز کا بھی دورہ کیا۔پولیس سپرنٹنڈنٹ ابیناش کمار نے شہریوں سے اپیل کی ہے کہ عوامی مقامات پر شراب نوشی نہ کریں اور نہ ہی اس کے لیے جگہ فراہم کریں۔ عوامی امن میں خلل ڈالنے والوں کے خلاف سخت قانونی کارروائی کی جائے گی۔