ناندیڑ:21 جون کو پولیس پریڈ گراؤنڈ میں بین الاقوامی یومِ یوگا

ناندیڑ:16 جون(نمائندہ اعتبار) دنیا بھر میں ہر سال 21 جون کو ’’بین الاقوامی یومِ یوگا‘‘ بڑے جوش و خروش کے ساتھ منایا جاتا ہے۔ اس سال بھی ضلع ناندیڑ میں ایک عظیم الشان یوگا پروگرام کا انعقاد کیا جا رہا ہے۔یہ پروگرام 21 جون بروز اتوار صبح 7 بجے وزیرآباد کے پولیس پریڈ گراؤنڈ میں منعقد ہوگا۔ اس کا اہتمام ضلع انتظامیہ، پولیس انتظامیہ، ضلع کھیل افسر دفتر، محکمہ تعلیم، ضلع یوگا ایسوسی ایشن اور لوک مت گروپ کے اشتراک سے کیا جا رہا ہے۔اس پروگرام میں مختلف شعبہ ہائے زندگی سے تعلق رکھنے والے شہری، طلبہ، نوجوان، کھلاڑی، یوگا کے شوقین افراد، سماجی تنظیمیں نیز مختلف محکموں کے افسران اور ملازمین شرکت کریں گے۔ ایڈیشنل کلکٹر ڈاکٹر رتندیپ گائیکواڑ نے عوام سے بڑی تعداد میں پروگرام میں شرکت کی اپیل کی ہے۔پروگرام کی کامیاب تنظیم کے لیے آج کلکٹر آفس میں ایک جائزہ و تیاری اجلاس منعقد کیا گیا۔ اجلاس میں مختلف محکموں کی ذمہ داریاں طے کی گئیں اور پروگرام کی منصوبہ بندی، سہولیات اور باہمی رابطے کے امور پر تفصیلی تبادلۂ خیال کیا گیا۔اس موقع پر ڈپٹی کلکٹر (جنرل) اجئے شندے، سیکنڈری ایجوکیشن آفیسر مادھو سلگر، ضلع کھیل آفیسر جئے کمار ٹیمبھرے، ضلع یوتھ آفیسر محترمہ کنکٹے، کھیل آفیسر بالاجی شرسی کر، لوک مت گروپ کی نمائندہ سپنا بھاگوت، یوگ ودیا دھام کے یوگا آچاریہ، ضلع یوگا ایسوسی ایشن کے نمائندے اور ضلع میں یوگا کے فروغ کے لیے کام کرنے والی مختلف تنظیموں کے نمائندگان موجود تھے۔اجلاس سے خطاب کرتے ہوئے ایڈیشنل کلکٹر ڈاکٹر گائیکواڑ نے ہدایت دی کہ تمام متعلقہ محکمے باہمی ہم آہنگی کے ساتھ باریک بینی سے منصوبہ بندی کریں۔ انہوں نے یہ بھی کہا کہ پروگرام کے دوران الیکشن کمیشن آف انڈیا کی نافذ ضابطۂ اخلاق کی مکمل پابندی کی جائے۔یوگا کا پیغام دیہی سطح تک پہنچانے کے لیے محکمہ تعلیم کو خصوصی اقدامات کرنے کی ہدایت دی گئی۔ اسی کے تحت سیکنڈری ایجوکیشن آفیسر کی جانب سے ضلع کی تمام اسکولوں کو یومِ یوگا منانے اور طلبہ کی زیادہ سے زیادہ شرکت کو یقینی بنانے کے لیے مراسلہ ارسال کرنے کا فیصلہ کیا گیا۔اس کے علاوہ معذور اور خصوصی ضروریات رکھنے والے شہریوں کے لیے الگ اور آسان سہولیات فراہم کرنے پر بھی زور دیا گیا۔ میدان میں نشستوں، پینے کے پانی، طلبہ و شرکاء کے بیٹھنے کے انتظام، داخلے اور دیگر ضروری سہولیات کے سلسلے میں محکمہ کھیل کو ضروری ہدایات جاری کی گئیں۔اجلاس میں شریک یوگا آچاریوں اور یوگا تنظیموں کے نمائندوں نے یومِ یوگا کو مزید مؤثر اور وسیع بنانے کے لیے مختلف تجاویز پیش کیں۔ اس موقع پر یہ بھی بتایا گیا کہ پروگرام کی کامیابی اور زیادہ سے زیادہ عوامی شرکت کو یقینی بنانے کے لیے لوک مت گروپ بیداری مہم اور رابطہ کاری کے ذریعے تعاون فراہم کرے گا۔