ناندیڑ میں بڑا کریک ڈاؤن: 703 غیر قانونی ہتھیار ضبط، ملزم فرار

ناندیڑ:23؍مئی (نمائندہ اعتبار) ضلع میں بڑھتی ہوئی جرائم کی سرگرمیوں پر قابو پانے کے لیے لوکل کرائم برانچ نے ایک بڑی کارروائی کرتے ہوئے غیر قانونی ہتھیار فروخت کرنے والے ایک شخص کے قبضے سے کُل 703 غیر قانونی ہتھیار ضبط کر لیے ہیں۔ اس کارروائی میں 14 لاکھ 4 ہزار 300 روپئے مالیت کا سامان برآمد کیا گیا ہے۔پولیس کے مطابق لوکل کرائم برانچ کو گرو دوارہ چوک کے 300 سالانہ شاپنگ پلازہ میں واقع ایک دکان میں غیر قانونی طور پر ہتھیاروں کی فروخت کی خفیہ اطلاع ملی تھی۔ اس اطلاع کی بنیاد پر پولیس انسپکٹر اتل بھوسلے کی رہنمائی میں ٹیم نے چھاپہ مار کارروائی انجام دی۔ کارروائی کے دوران رنجیت سنگھ رام سنگھ سردار (ساکن نندی گرام سوسائٹی، ناندیڑ) کی دُکان سے 470 تلواریں، 209 خنجر؍چاقو اور 24 فائٹر پنچ سمیت کُل 703 غیر قانونی ہتھیار ضبط کیے گئے۔ ضبط شدہ ہتھیاروں کی کل مالیت 14,04,300 روپئے بتائی گئی ہے۔اس معاملے میں وزیرآباد پولیس اسٹیشن میں مقدمہ نمبر 238/2026کے تحت انڈین آرمس ایکٹ کی متعلقہ دفعات کے تحت کیس درج کیا گیا ہے۔ ملزم موقع سے فرار ہو گیا ہے اور اس کی تلاش کے لیے پولیس کی خصوصی ٹیم روانہ کر دی گئی ہے۔اس کارروائی کو سب ڈویژنل پولیس آفیسر کرن بھانڈے کی نگرانی میں پولیس انسپکٹر اتل بھوسلے، پولیس سب انسپکٹر ملند سونکامبلے، پولیس اہلکار روی شنکر بامنے، عمر شیخ، ملند نارباگ، گیانوبا کَوَٹھے وکر، اظہرالدین شیخ، انل بیرادار، راج ونت سنگھ بنگئی، دھمنند جادھو، شیتل سولنکے اور ماروتی منڈھے نے انجام دیا۔واضح رہے کہ اس معاملہ کا ملزم فرار ہے، جبکہ اس معاملہ میں ایک وسیع تر سپلائی چین کارفرما ہو سکتی ہے۔یعنی وہ نیٹ ورک جو ان سرگرمیوں کو پروان چڑھاتا ہے۔سب سے پہلے یہ سمجھنا ضروری ہے کہ ایسے جرائم انفرادی نہیں ہوتے بلکہ ایک منظم زنجیر کا حصہ ہوتے ہیں۔ اس زنجیر میں سپلائر، ڈیلر، خریدار، مالی معاونین اور بعض اوقات اندرونی سہولت کار بھی شامل ہوتے ہیں۔پولیس جدید ٹیکنالوجی جیسے ڈیجیٹل سرویلنس، ڈیٹا اینالیسس اور کمیونیکیشن ٹریکنگ کے ذریعے ان نیٹ ورکس کے روابط اور مالی لین دین کو بہ آسانی بے نقاب کرسکتی ہے۔ اس لیے اس معاملہ میں پولیس انتظامیہ کی اصل کامیابی صرف ملزم کی گرفتاری میں نہیں بلکہ اس پورے نیٹ ورک کو بے نقاب کرنے اور اسے جڑ سے ختم کرنے میں مضمر ہے۔ اگر جدید ٹیکنالوجی اور مربوط حکمتِ عملی کو مؤثر انداز میں استعمال کیا جائے تو ایسے منظم جرائم کا قلع قمع ممکن ہے، ورنہ ایک ملزم کے فرار ہونے کے بعد دوسرا اس کی جگہ لینے میں دیر نہیں لگائے گا۔