ناندیڑ: نمسکار چوک سے ایم جی ایم کالج روڈ تک تجاوزات کے خلاف میونسپل کارپوریشن کی سخت کارروائی

ناندیڑ:22؍مئی ( نمائندہ اعتبار) ناندیڑواگھالہ شہر میونسپل کارپوریشن کی جانب سے آج شہر میں بڑے پیمانے پر تجاوزات ہٹاؤ مہم چلائی گئی۔ شہر کے اہم راستے نمسکار چوک سے ایم جی ایم کالج تک ٹریفک میں رکاوٹ بننے والی تمام غیر قانونی تعمیرات کو اس کارروائی کے دوران منہدم کر دیا گیا۔یہ سڑک محکمہ تعمیرات عامہ کے ذریعہ نئے سرے سے تجویز کی گئی ہے اور محکمہ اراضی ریکارڈ کی فراہم کردہ نقشہ بندی کے مطابق میونسپل کارپوریشن اور پولیس محکمہ نے مشترکہ طور پر یہ مہم انجام دی۔ اس کارروائی سے کافی عرصہ سے زیر التواء ٹریفک اور سڑک کی چوڑائی کے مسئلہ کے حل میں بڑی مدد ملے گی۔اسی طرح نمسکار چوک سے ایم جی ایم کالج روڈ پر واقع قدرتی نالے پر کیے گئے تجاوزات بھی ہٹا کر نالے کو مکمل طور پر صاف اور کشادہ کر دیا گیا۔ اس مرکزی نالے پر بڑے پیمانے پر غیر قانونی تعمیرات ہونے کی وجہ سے پانی کے بہاؤ میں رکاوٹ پیدا ہو رہی تھی اور علاقے میں پانی جمع ہونے کی شکایات بڑھ رہی تھیں۔ 2 جے سی بی مشینوں، میونسپل ٹیم اور پولیس کے سخت بندوبست میں یہ کارروائی مکمل کی گئی۔ اس سے نہ صرف نالے کا بہاؤ بہتر ہوگا بلکہ ٹریفک جام میں بھی کمی آئے گی۔اس مہم کے دوران نمسکار چوک، آئی ٹی آئی کارنر سے لے کر ایم جی ایم کالج تک پوری سڑک کو تجاوزات سے پاک کیا گیا۔ ناتھ نگر پٹی سے ایم جی ایم کالج روڈ کے دونوں جانب قائم غیر قانونی شیڈز، ہاتھ گاڑیاں، سائن بورڈز اور دکانوں کی توسیعی تعمیرات کو منہدم کر کے سامان ضبط کیا گیا۔ کسی بھی ناخوشگوار واقعہ سے بچنے کے لیے پولیس کی کڑی نگرانی میں یہ مہم چلائی گئی۔یہ کارروائی میونسپل کمشنر ڈاکٹر مہیش کمار ڈوئی پھوڑے ، پولیس سپرنٹنڈنٹ ابیناش کمار اور ایڈیشنل کمشنر گریش کدم کی رہنمائی میں ڈپٹی کمشنر اجیت پال سنگھ سندھو کی قیادت میں ایگزیکٹو انجینئر دلیپ تاکلیکر، غیر قانونی تعمیرات و تجاوزات محکمہ اور پولیس کی مشترکہ ٹیم نے انجام دی۔میونسپل انتظامیہ نے واضح کیا ہے کہ آئندہ اگر کسی نے دوبارہ اس علاقے میں تجاوزات یا غیر قانونی تعمیر کی کوشش کی تو اس کے خلاف فوجداری مقدمات درج کیے جائیں گے اور سخت قانونی کارروائی کی جائے گی۔ یہ مہم شہر کے دیگر علاقوں میں بھی اسی طرح جاری رکھی جائے گی۔