پی ایم مودی وارانسی سے 14 مئی کو پرچہ نامزدگی داخل کریں گے

وارانسی، 8 مئی۔وزیر اعظم نریندر مودی 14 مئی کو اتر پردیش کی وارانسی لوک سبھا سیٹ کے لیے تیسری بار پرچہ نامزدگی داخل کریں گے۔ اس سے پہلے پی ایم مودی 13 مئی کو اپنے پارلیمانی حلقے میں روڈ شو کریں گے۔ ضلعی حکام کے مطابق روڈ شو شروع کرنے سے پہلے پی ایم مودی لنکا میں بنارس ہندو یونیورسٹی (بی ایچ یو) کے مین گیٹ پر مدن موہن مالویہ کے مجسمے کو خراج عقیدت پیش کریں گے۔ روڈ شو کاشی وشوناتھ کوریڈور پر ختم ہوگا۔ روڈ شو میں لاکھوں لوگوں کی شرکت متوقع ہے۔ بی جے پی لیڈر دلیپ پٹیل نے کہا کہ پی ایم مودی کا پانچ کلومیٹر لمبا روڈ شو آسی، سونار پورہ، جنگم باڑی، گوڈولیا اور بانس پھاٹک سے ہوتا ہوا وشوناتھ کوریڈور پہنچے گا۔ اس دوران پی ایم مودی کا شاندار استقبال کیا جائے گا۔ روڈ شو کو تاریخی بنانے کے لیے کارکنوں کو ذمہ داریاں سونپی جا رہی ہیں۔ وارانسی وزیر اعظم نریندر مودی کا گڑھ ہے۔ انہوں نے 2014 اور 2019 میں دو بار اس نشست پر کامیابی حاصل کی۔