سی بی کھیڑگی کالج کی طالبہ قومی سطح پر مہاراشٹر کی نمائندگی کرے گی

چپلون: 19؍نومبر(راست)یہاں منعقدہ 2026-2025 کی ریاستی سطح کی ایتھلیٹکس مقابلوں میں سی.بی کھیڑگی کالج نے اپنی شاندار کارکردگی کا سلسلہ برقرار رکھتے ہوئے ایک اور قابلِ فخر کامیابی اپنے نام پر درج کر لی ہے۔ کالج کی بارہویں جماعت کی ہونہار طالبہ کُمہاری جوتی یلّپا بنّے نے اَنڈر–19 کراس کنٹری مقابلے میں بہترین کارکردگی کا مظاہرہ کرتے ہوئے قومی سطح کے مقابلوں کے لیے کوالیفائی کر لیا ہے۔
کمہاری جوتی کی یہ کامیابی اُس کی محنت، لگن، مستقل مزاجی اور کھیل کے تئیں گہری وابستگی کا نتیجہ ہے۔ ریاست بھر کے بہترین کھلاڑیوں کے درمیان شاندار دوڑ پیش کر کے اُس نے اپنی الگ پہچان بنائی اور کالج کے ساتھ ساتھ اکلکوٹ شہر کا نام بھی روشن کیا ہے۔
اب جوتی ہرِیانہ میں ہونے والے قومی مقابلوں میں مہاراشٹر کی نمائندگی کرے گی، جہاں اُس سے مزید اعلیٰ اور یادگار کارکردگی کی توقع کی جا رہی ہے۔ کوچز کا یقین ہے کہ اُس کی موجودہ تیاری اور مضبوط کھیل کے اعتماد کے ساتھ وہ قومی سطح پر بھی نمایاں مقام حاصل کرے گی۔
کمہاری جوتی کی اس شاندار کامیابی پر اکلکوٹ ایجوکیشن سوسائٹی کے چیئرمین جناب بسلِنگپّا کھیڑگی، سیکریٹری جناب سُبھاش جی دھرنے، پرنسپل ڈاکٹر جی۔ ایس۔ دھبّالے، نائب پرنسپل سوف. ویدیہی ویدیا اور نگران این۔ ایس۔ برہم شیٹّی نے مبارکباد پیش کی۔ اس کامیابی میں اس کے کھیل اساتذہ جناب سہیل شیخ، ڈاکٹر ڈی۔ ایم۔ بِراجدار، اور جناب سدھیر راٹھوڑ کی رہنمائی انتہائی اہم رہی۔
کالج میں کُمہاری جوتی کا پُرجوش انداز میں استقبال کیا گیا اور پوری کالج فضاء خوشی و مسرت سے معمور نظر آئی۔