سیرتِ خیرالبشر ﷺ

تحریر:مولانا فضیل اختر قاسمی بھیروی
متعلم شعبۂ تخصص فی الفقہ و الافتاء والقضاء دارالعلوم حیدرآباد

نوعِ انسانی کے لیے سب سے عظیم ترین سرمایہ، سب سے بیش بہا ورثہ اور سب سے قیمتی متاع اگر کوئی ہے تو وہ اسوۂ محمدی ﷺ ہے۔ تاریخ کے نشیب و فراز نے اگرچہ ہزاروں شخصیات کو اپنے دامن میں جگہ دی ہے، مگر ان میں سے اکثر کی عظمت عارضی، فکری تلاطم کی پیداوار اور زمانی و مکانی حدود کی اسیر تھی۔ محمد عربی ﷺ کی حیاتِ طیبہ وہ تابندہ خورشید ہے جو ازل سے ابد تک اپنی ضیاؤں سے معمور ہے۔
آپ ﷺ کی سیرت میں وہ ہمہ جہتی ہے جو کسی اور بشر کے نصیب میں نہ آئی۔ سیاست ہو یا دیانت، عبادت ہو یا قیادت، عدل ہو یا احسان، جہاد ہو یا اجتہاد ہر میدان میں آپ کی شخصیت ایک مکمل آئینۂ حق اور کامل میزانِ عدل ہے۔ آپ کی شب بیداریوں میں زہد کا فسوں ہے، آپ کے دن کے جہود میں سعیٔ بے پایاں کا تسلسل۔ آپ کی خطابت میں بلاغت کا جوہر ہے، آپ کی خاموشی میں حکمت کا جمال۔
سیرتِ نبویہ درحقیقت ایک جامع و مانع نصابِ حیات ہے، جس میں انسانیت کی ہمہ پہلو ضرورتوں کا علاج اور بشریت کے جملہ امراض کا مداوا پوشیدہ ہے۔ اس میں روحانیت کی رفعتیں بھی ہیں، تمدن کی تعمیر بھی، اخلاقی انضباط بھی اور معاشرتی تہذیب بھی۔ یہ ایک ایسی جامعیت ہے جس نے نہ صرف عرب کی جاہلیت کو تہذیب و تمدن کے عروج تک پہنچایا بلکہ پوری نوعِ انسانی کو انسانیت کے اعلیٰ مدارج سے روشناس کرایا۔
الغرض محمد رسول اللہ ﷺ کی سیرت ایک آئینۂ تمام نمایاں ہے جس میں ہر نسل اور ہر قوم اپنے لیے ہدایت و رہنمائی کے روشن نقوش پا سکتی ہے۔ آج بھی دنیا کی نجات، دلوں کی راحت اور عقلوں کی سلامتی اسی میں ہے کہ وہ اس چراغِ مصطفوی ﷺ سے اپنے ظلمت کدوں کو روشن کرے۔