بھوکر : نئی عدالتی عمارت سے سب کو انصاف ملے گا: – جسٹس نوتن سوریہ ونشی

پروگرام میں سابق وزیر اعلیٰ و رکن پارلیمان اشوک راؤ چوہان، رکن پارلیمان رویندر چوہان اور رکن اسمبلی شری جیا چوہان کی خصوصی شرکت
عدالتی احاطے کو صاف ستھرا اور خوبصورت رکھنے کے لیے سب کی کوششیں ضروری
بھوکر میں ضلع و سیشن عدالت کی نئی عمارت کا افتتاح و رونمائی

ناندیڑ:9؍فروری ( نمائندہ اعتبار) جمہوریت کو مضبوط بنانے کے لیے عدالتی نظام کا مؤثر ہونا ضروری ہے۔ عدالتی نظام میں بنیادی سہولیات کی فراہمی لازمی ہے تاکہ یہ مزید مؤثر ہو سکے اور انصاف کی راہ میں ایک نئے دور کا آغاز ہو۔ بھوکر میں قائم ہونے والی ضلع و سیشن عدالت کی نئی اور وسیع عمارت سے عدالتی معاملات کے لیے ایک موزوں ماحول دستیاب ہوگا اور یہاں آنے والے افراد کو انصاف ملے گا۔ یہ اظہار خیال ممبئی ہائی کورٹ کے جسٹس اور ناندیڑ ضلع کے سرپرست جسٹس نیتن بھگوانت راؤ سوریونشی نے کیا۔بھوکر میں تقریباً 14 کروڑ 51 لاکھ 65 ہزار روپئے کی لاگت سے تعمیر شدہ اس ایڈیشنل ضلع و سیشن عدالت کی نئی اور وسیع عمارت کا افتتاح جسٹس نوتن بھگوانت راؤ سوریہ ونشی کے ہاتھوں انجام پایا۔ اس موقع پر ممبئی ہائی کورٹ کے جسٹس ایس۔ پی۔ برمہے، سابق وزیر اعلیٰ و رکن پارلیمان اشوک راؤ چوہان، رکن پارلیمان رویندر چوہان، رکن اسمبلی شری جیا چوہان، چیف ضلع جج سریکھا کوسمکر، بار کونسل آف مہاراشٹر اینڈ گوا کے رکن ایڈوکیٹ وی۔ ڈی۔ سالونکھے، ایڈوکیٹ ستیش دیشمکھ، بار کونسل آف انڈیا اینڈ گوا کے رکن ایڈوکیٹ آشیش دیشمکھ، ضلع عدالت بھوکر کے یونس خان، اسسٹنٹ کلکٹر میگھنا کاولی، ریلوے کے ڈویژنل منیجر نیتی سرکار، ایڈیشنل کلکٹر پانڈورنگ بورگاؤنکر، ایڈیشنل پولیس سپرنٹنڈنٹ سورج گروسمیت عدالتی افسران، وکلاء اور دیگر معززین موجود تھے۔سابق وزیر اعلیٰ اور رکن پارلیمان اشوک راؤ چوہان کے ہاتھوں پہلے اس عمارت کا سنگ بنیاد رکھا گیا تھا اور اب انہی کی موجودگی میں اس کا افتتاح کیا گیا۔ جسٹس نوتن بھگونت راؤ سوریہ نشی نے کہا کہ انہی کی کوششوں کی بدولت یہ عمارت مکمل ہوئی۔ انہوں نے مزید کہا کہ عدالتی عملے اور وکلاء کو اپنے فرائض ایمانداری سے انجام دینے چاہئیں تاکہ عدالتی کارروائی مزید مستحکم ہو۔ اس کے ساتھ ہی عدالتی احاطے کو صاف ستھرا اور خوبصورت رکھنے کے لیے بھی سب کو کوششیں کرنی ہوں گی۔ممبئی ہائی کورٹ کے جسٹس ایس۔ پی۔ برمہے نے کہا کہ کسی بھی عمارت کی تعمیر میں بہت سی جدوجہد اور مزدوروں کی محنت شامل ہوتی ہے۔ بھوکر میں اس عدالت کی تعمیر بھی سابق وزیر اعلیٰ اشوک راؤ چوہان کی خصوصی کوششوں کی بدولت ممکن ہوئی ہے۔ نئی عمارت کے ساتھ ساتھ دیگر سہولیات کو بھی آہستہ آہستہ بہتر کیا جائے گا۔ وکلاء اور عدالتی عملے کو چاہیے کہ وہ انصاف کے طلب گار عوام کو مرکز بنا کر کام کریں اور بدلتے حالات میں ایسے افراد کے لیے انصاف کی راہ ہموار کریں جو اس سے محروم ہیں۔بھوکر میں قائم یہ نئی اور پرانی عمارتیں تین مقامات پر منسلک ہیں، جن کا مجموعی رقبہ 27 ہزار مربع فٹ ہے اور یہ تین منزلوں پر مشتمل ہے۔ اس عمارت میں بزنس سینٹر، فرنٹ آفس، میڈیا سینٹر، ریکارڈ روم، بار روم، مرد و خواتین گواہان کے لیے علیحدہ کمرے، سرکاری وکیل کا دفتر، مرد و خواتین کے لیے اسٹاف روم، مشاورت کا کمرہ سمیت دیگر سہولیات دستیاب ہیں۔ اس کے علاوہ پارکنگ، کورٹ ہال، جج چیمبر، اینٹی چیمبر، کورٹ دفاتر وغیرہ بھی اس کا حصہ ہیں۔ماحولیاتی تحفظ کی اہمیت کو اجاگر کرنے کے لیے اس تقریب کا آغاز معززین کے ہاتھوں پودوں کو پانی دینے سے کیا گیا۔ اس موقع پر بار کونسل آف مہاراشٹر اینڈ گوا کے رکن ایڈوکیٹ وی۔ ڈی۔ سالونکھے، ایڈوکیٹ ستیش دیشمکھ، بار کونسل آف انڈیا اینڈ گوا کے رکن ایڈوکیٹ آشیش دیشمکھ، چیف ضلع جج سریکھا کوسمکر نے بھی اظہار خیال کیا۔پروگرام کا تعارف بھوکر وکلاء ایسوسی ایشن کے صدر ایڈوکیٹ سندیپ بھیم راؤ کمبھیکر نے دیا جبکہ شکریہ کی رسم ضلع عدالت بھوکر کے یونس خان نے ادا کی۔ پروگرام کی نظامت سینئر سول جج کے۔ پی۔ جین دیسرڈا اور سینئر سول جج بھوکر کے اے۔ پی۔ کراڈ نے انجام دی۔