یومِ اساتذہ پر اکولہ میں ’’شکشک گن گورو پرسکار 2026‘‘، مظاہر اللہ خان مستجاب اللہ خان کی خدمات کا اعتراف

اکولہ: 6؍ستمبر(راست) یومِ اساتذہ 5 ستمبر کے موقع پر اکولہ مہانگر پالیکا کی جانب سے شہر کے معروف پرمیلا تائی اوک ہال میں ’’شکشک گن گورو پرسکار 2026‘‘ کا باوقار اور شاندار انعقاد عمل میں آیا۔ تقریب میں تعلیمی میدان میں نمایاں خدمات انجام دینے والے اساتذہ اور تعلیمی شخصیات کو ان کی طویل اور قابلِ قدر خدمات کے اعتراف میں اعزازات سے نوازا گیا۔اسی سلسلے میں نور نگر، اکوٹ فائل، اکولہ کے معروف معلم اور تعلیمی و سماجی شخصیت مظاہر اللہ خان مستجاب اللہ خان کو بھی ان کی گراں قدر خدمات کے اعتراف میں ’’شکشک گن گورو پرسکار 2026‘‘ سے سرفراز کیا گیا۔ مظاہر اللہ خان کا آبائی وطن گھوڑے گاؤں ہے۔مظاہر اللہ خان صاحب نے اکولہ مہانگر پالیکا کے زیرِ انتظام متعدد اسکولوں میں طویل عرصے تک معلم کے ساتھ صدرِ مدرس کے فرائض بھی انجام دیے۔ دورانِ خدمت انہوں نے تدریس کے ساتھ ادارہ جاتی نظم و نسق، طلبہ کی تربیت اور تعلیمی معیار کی بہتری کے لیے اپنی صلاحیتوں کو بروئے کار لایا اور اپنی منفرد شناخت قائم کی۔صدرِ مدرس کی حیثیت سے ان کی خدمات کا ایک قابلِ ذکر پہلو یہ بھی رہا کہ انہوں نے طلبہ کی دینی و اخلاقی تربیت کی اہمیت کو محسوس کرتے ہوئے اپنی ذاتی رقم سے ایک دینیات کے معلم کی تقرری کی، تاکہ اسکول میں رسمی تعلیم کے ساتھ طلبہ کی دینی، اخلاقی اور کردار سازی پر بھی خصوصی توجہ دی جا سکے۔ یہ اقدام ان کی تعلیمی فکر اور نئی نسل کی ہمہ جہت تربیت کے لیے ان کی ذاتی وابستگی کا نمایاں ثبوت ہے۔ان کی شخصیت کا نمایاں پہلو یہ ہے کہ ان کی سرگرمیاں صرف تعلیمی میدان تک محدود نہیں رہیں۔ آج بھی وہ تعلیمی، مذہبی، سماجی اور فائنانس کے شعبوں میں فعال کردار ادا کر رہے ہیں۔ خصوصاً مالیاتی معاملات اور پیچیدگیوں کو مہارت کے ساتھ سمجھنے اور انہیں مؤثر انداز میں حل کرنے کی ان کی صلاحیت قابلِ ذکر ہے۔ان کی ہمہ جہت خدمات اس بات کی عکاس ہیں کہ ایک استاد کا کردار صرف درس و تدریس تک محدود نہیں ہوتا، بلکہ وہ معاشرے کی فکری، اخلاقی اور سماجی تشکیل میں بھی مؤثر کردار ادا کر سکتا ہے۔ مظاہر اللہ خان صاحب کی عملی زندگی میں تعلیم، خدمت، رہنمائی اور سماجی ذمہ داری کا یہ امتزاج انہیں ایک منفرد مقام عطا کرتا ہے۔’’شکشک گن گورو پرسکار 2026‘‘ دراصل ان کی طویل تعلیمی خدمات، تدریسی وابستگی، انتظامی صلاحیت اور مسلسل سماجی و معاشرتی فعالیت کا اعتراف ہے۔ یہ اعزاز ان کے لیے باعثِ مسرت و افتخار ہونے کے ساتھ ساتھ دیگر اساتذہ کے لیے بھی حوصلہ افزائی کا باعث ہے۔تعلیمی و سماجی حلقوں نے اس اعزاز پر مظاہر اللہ خان مستجاب اللہ خان کو مبارک باد پیش کرتے ہوئے کہا کہ ایسے فعال اور ہمہ جہت اساتذہ کی خدمات کا اعتراف نئی نسل میں خدمت، علم اور ذمہ داری کا جذبہ پیدا کرتا ہے۔دعا ہے کہ اللہ تعالیٰ محترم مظاہر اللہ خان مستجاب اللہ خان کی تعلیمی، مذہبی، سماجی اور مالیاتی شعبوں میں انجام دی جانے والی خدمات کو شرفِ قبول عطا فرمائے، انہیں صحت، عافیت، علم و عمل میں برکت اور مزید خدمت کی توفیق عطا کرے، ان کی صلاحیتوں کو معاشرے کے لیے نفع بخش بنائے اور ان کی تمام مخلصانہ کاوشوں کو ان کے لیے صدقۂ جاریہ قرار دے۔ آمین۔