پیپر لیک پر سخت شکنجہ، عوامی امتحانات ترمیمی بل 2026 لوک سبھا سے منظور

نئی دہلی، 29 جولائی: لوک سبھا نے آج "عوامی امتحانات (بدعنوان ذرائع کی روک تھام) ترمیمی بل، 2026” صوتی ووٹ سے منظور کر لیا۔ اس بل کا مقصد سرکاری بھرتیوں اور مسابقتی امتحانات میں پیپر لیک، نقل، امتحانی دھوکہ دہی اور منظم بدعنوانیوں پر مزید سخت قانونی کارروائی کو یقینی بنانا ہے۔بل کے تحت پیپر لیک یا امتحانی دھوکہ دہی میں ملوث افراد کے خلاف سزا مزید سخت کر دی گئی ہے۔ منظم جرائم میں ملوث افراد کو 10 سال تک قید اور 10 کروڑ روپے تک جرمانہ ہو سکتا ہے۔ اس کے علاوہ جرم ثابت ہونے پر ملزمان کی جائیداد ضبط کرنے کی بھی گنجائش رکھی گئی ہے تاکہ ایسے جرائم کی حوصلہ شکنی کی جا سکے۔ترمیمی بل میں امتحانات منعقد کرنے والی ایجنسیوں سے وابستہ ایسے سروس فراہم کنندگان (Service Providers) کے خلاف بھی سخت کارروائی کی تجویز دی گئی ہے جو امتحانی بدعنوانیوں میں ملوث پائے جائیں۔ ایسے اداروں یا کمپنیوں پر امتحانات کے انعقاد میں حصہ لینے کی پابندی کی مدت چار سال سے بڑھا کر آٹھ سال کر دی گئی ہے۔بل پر بحث کے دوران مرکزی وزیر مملکت ڈاکٹر جتیندر سنگھ نے کہا کہ حکومت نوجوانوں کے مستقبل سے کسی بھی قسم کا کھلواڑ برداشت نہیں کرے گی اور امتحانی نظام کو شفاف، محفوظ اور قابلِ اعتماد بنانے کے لیے یہ قانون ضروری ہے۔ اپوزیشن نے بل پر بحث کے دوران حکومت کو امتحانی نظام کی خامیوں پر تنقید کا نشانہ بنایا، تاہم ایوان نے آخرکار بل کو منظور کر لیا۔یہ ترمیمی بل اب راجیہ سبھا میں پیش کیا جائے گا۔ دونوں ایوانوں سے منظوری اور صدرِ جمہوریہ کی توثیق کے بعد یہ قانون نافذ ہوگا۔