واٹس ایپ کا ڈیجیٹل عاشق سماجی و نفسیاتی خاکہ

از قلم :محمود علی

علامہ اقبال نے کیا خوب کہا تھا
بڑھ جاتا ہے جب ذوق نظر اپنی حدوں سے
ہو جاتے ہيں افکار پراگندہ و ابتر
مرزا غالب کے اس شعر کو واٹس ایپ کا اضافہ کرکے دیکھتے ہیں
عاشقی صبر طلب اور تمنا بیتاب
واٹس ایپ کیا رنگ کروں خون جگر ہوتے تک
آج کے دور میں محبت کا انداز بھی بدل گیا ہے۔ کبھی خط لکھے جاتے تھے پھر فون کالز کا زمانہ آیا اور اب محبت نے WhatsApp پر ڈیرہ جما لیا ہے۔ یہی وہ جگہ ہے جہاں واٹس ایپ والا عاشق جنم لیتا ہے۔
یہ عاشق عجیب مخلوق ہوتا ہے۔ اس کی راتیں آن لائن گزرتی ہیں اور دن لاسٹ سین دیکھتے ہوئے۔ اسے نہ چاندنی راتوں کی ضرورت ہوتی ہے، نہ باغ و بہار کی بس ایک انٹرنیٹ کنکشن اور سبز بتی (online status) کافی ہوتی ہے۔ جب سامنے والے کا typing… ظاہر ہو جائے تو اس کے دل کی دھڑکنیں تیز ہو جاتی ہیں، گویا کوئی محبوب سامنے بیٹھا سرگوشی کر رہا ہو۔
واٹس ایپ والا عاشق بلیو ٹِک کا بڑا غلام ہوتا ہے۔ دو نیلے نشان اس کے لیے خوشی کی علامت ہیں، اور اگر صرف ایک ٹک رہ جائے تو بے چینی اس کا مقدر بن جاتی ہے۔ وہ ہر تھوڑی دیر بعد موبائل چیک کرتا ہے، شاید کوئی پیغام آیا ہو، شاید کسی نے اس کے دل کی دنیا میں جھانک لیا ہو۔
دلچسپ بات یہ ہے کہ اس عاشق کی محبت میں الفاظ کم اور ایموجیز زیادہ ہوتے ہیں۔ ایک ❤️، ایک 😊 یا ایک 😔 ہی اس کے جذبات کا مکمل اظہار بن جاتے ہیں۔ کبھی کبھار تو وہ پوری کہانی صرف ایک Good Night میں سمیٹ دیتا ہے مگر اس “Good Night” کے پیچھے کئی جاگی ہوئی راتیں چھپی ہوتی ہیں۔
مگر اس محبت کا ایک پہلو یہ بھی ہے کہ یہ بہت نازک ہوتی ہے۔ ایک Seen کا جواب نہ آئے تو دل ٹوٹ جاتا ہے، ایک Last Seen Hide ہو جائے تو شک جنم لیتا ہے۔ یوں محسوس ہوتا ہے جیسے محبت بھی اب ڈیجیٹل ہو گئی ہے جلدی جڑتی ہے اور کبھی کبھی اتنی ہی جلدی ٹوٹ بھی جاتی ہے۔
آخر میں یہی کہا جا سکتا ہے کہ واٹس ایپ والا عاشق ہمارے دور کی ایک خوبصورت مگر تھوڑی سی معصوم اور نادان حقیقت ہے۔ وہ محبت تو کرتا ہے، مگر اس کی دنیا اسکرین کے اندر سمٹی ہوتی ہے جہاں جذبات بھی ڈیٹا کی طرح آتے جاتے رہتے ہیں۔