سیلو شہر کے کیشو راج مندر سوسائیٹی کے بے ضابطگیوں کی شکایت کا چار سال بعد نوٹس لیا گیا

سیلو :26؍اکتوبر(ابرار بیگ) سیلو شہر میں واقع ‘کیشو راج بابا صاحب مہاراج مندر سنستھان’ کے انتظام و انصرام میں مبینہ بے ضابطگیوں اور دھاندلیوں کے معاملے پر مئی 2022 میں درج کرائی گئی شکایت پر بلاآخر چار سال بعد اسسٹنٹ چیریٹی کمشنر آفس، پربھنی میں سماعت شروع ہونے کی خبر سامنے آئی ہے۔سیلو کے صحافی دلیپ ڈاسالکر نے سنستھان کی اس وقت کی ایگزیکٹیو باڈی کے مبینہ غیر مجاز اور غیر قانونی کام کاج کے خلاف یہ شکایت درج کرائی تھی۔ اس معاملے میں طویل عرصے تک کوئی پیش رفت نہ ہونے پر انہوں نے مسلسل تعاقب کا سلسلہ جاری رکھا، جس کے بعد اب متعلقہ شکایت کی بنیاد پر سماعت کا آغاز ہوا ہے۔شکایت میں سنستھان کی جائیدادوں میں مبینہ رد و بدل کرنے اور سونے چاندی کے زیورات کو ذاتی نام پر بینک میں رکھنے کے سنگین الزامات عائد کیے گئے ہیں۔ اس کے علاوہ سالانہ یاترا اتسو میلے کے نام پر رقم وصول کرنے اور اس کا صحیح حساب کتاب نہ رکھنے کے ساتھ ساتھ مالیاتی امور میں بے ضابطگیوں جیسے اہم مسائل بھی اٹھائے گئے ہیں۔سنستھان کے آڈٹ کے حوالے سے بھی سوالات کھڑے کیے گئے ہیں اور دعویٰ کیا گیا ہے کہ کچھ عرصے سے آڈٹ ہی انجام نہیں دیا گیا، جبکہ 2022 سے پہلے کے آڈٹ کے طریقوں پر بھی شدید اعتراضات جتائے گئے ہیں۔ اس کے علاوہ یاترا اتسو کے صدارتی عہدے کے فیصلے پر بھی شکایت کنندہ نے سوالات اٹھائے ہیں۔اس معاملے میں اگلی سماعت کے لیے 2 نومبر 2026 کی تاریخ مقرر کی گئی ہے، تاہم اس کے بعد کی کارروائی اور کیس کی موجودہ صورتحال سے متعلق سرکاری و قانونی موقف واضح ہونا باقی ہے۔ مقامی شہریوں اور عقیدت مندوں کی جانب سے یہ امید ظاہر کی جا رہی ہے کہ چار سال کی تاخیر کے بعد ہی سہی، اس شکایت کی غیر جانبدارانہ اور شفاف تحقیقات کر کے سنستھان کی جائیداد، مالیاتی امور اور آڈٹ کے سچ کو سامنے لایا جائے اور الزامات ثابت ہونے پر قصورواروں کے خلاف قانونی کارروائی کی جائے۔