سیلو شہر کے کسان نے گوری-گنپتی کے موقع پر تیار کیا خشک سالی کا دکھاوا

سیلو :20؍ستمبر(ابرار بیگ)امسال برسات کا موسم ختم ہونے کے قریب ہے، لیکن اس کے باوجود سیلو شہر سمیت پورے تعلقہ میں برائے نام بارش ہوئی ہے۔ جولائی کے مہینے میں کچھ بارش ہوئی تھی، لیکن اگست کا مہینہ معمولی بوند باندی تک محدود رہا اور ستمبر کا مہینہ بھی اب تک مکمل طور پر سوکھا ہی گزرا ہے۔بارش نہ ہونے کی وجہ سے کھڑی فصلیں مرجھا گئی ہیں اور مویشیوں کے چارے نیز پینے کے پانی کا شدید بحران پیدا ہو گیا ہے۔ خشک سالی اور پریشان کن حالات کے باعث سبھی تہوار بغیر کسی جوش و خروش کے بلکل سادہ انداز میں منائے گئے۔عام طور پر مہالکشمی کے قیام کے بعد گھروں میں مختلف پرکشش اور خوبصورت نمائشیں (دکھاوے) سجائی جاتی ہیں۔ تاہم سیلو کے کسان وسنت (گوٹو) شیرے پاٹل کی پربھنی روڈ واقع رہائش گاہ پر مہالکشمی کے سامنے خشک سالی (سوکھا) کے دردناک منظر کو دکھاوے کے طور پر پیش کیا گیا ہے۔اس دکھاوے کو دیکھ کر بارش نہ ہونے کے سبب کسانوں کی زبوں حالی اور ان کے دل کا درد نمایاں طور پر ظاہر ہوتا ہے۔ سیلو تعلقہ میں خشک سالی کی شدید نوعیت کو مدنظر رکھتے ہوئے حکومت کو چاہیے کہ وہ سخت سرکاری قواعد و ضوابط کو بالائے طاق رکھتے ہوئے کسانوں کو فوری اور بنیادوں پر ضروری امداد فراہم کرے۔کسان وسنت (گوٹو) شیرے پاٹل اور ان کے خاندان کی جانب سے تیار کردہ اس منفرد اور دردمندانہ دکھاوے کی علاقے بھر میں کافی چرچا ہو رہی ہے۔