رمضان آرہا ہے

رمضان آرہا ہے

فصلِ بہار بن کر رمضان آرہا ہے
پھر جگمگائے منظر رمضان آرہا ہے

دے آگ سے خلاصی یہ ماہ برکتوں کا
رحمت خدا کی لے کر رمضان آرہا ہے

رب کے فضل کا زینہ بخشش کا یہ مہینہ
سب نیکیوں کا محور رمضان آرہا ہے

اجلی نوید لے کراک خیر کا سفینہ
قدرت کا رب کی مظہر رمضان آرہا ہے

ہر پل ثواب لے کر روزے لیے مبارک
بابِ فلک سے ہم پر رمضان آرہا ہے

ہر سمت روشنی ہے ہر دل میں شادمانی
خوش ہے زمین و امبر رمضان آرہا ہے

جس میں کئی فرشتےاتریں گےآسماں سے
دیکھو حسیں منّور رمضان آرہا ہے

دروازہ کھل گیا ہے رب کی نوازشوں کا
رحمت کا کھولے دفتر رمضان آرہا ہے

جاگی ہے یاد دل میں دربار مصطفی کی
جاگے گا پھر مقدر رمضان آرہا ہے

بدلی ہے رت فضا کی پنچھی چہک رہے ہیں
کہتا ہے ہر سخنور رمضان آرہا ہے

ہر دل میں شادمانی شاداب ہے زمانہ
سجنے لگا ہے گھر گھر رمضان آرہا ہے

روزے نماز برکت قرآن کی تلاوت
دامن میں اپنے بھر کر رمضان آرہا ہے

اسرار آؤ بڑھ کر ہم مرحبا کہیں سب
لے کر سحر معطر رمضان آرہا ہے