•اندھیری راتوں کے بعد طلوعِ سحر(تاریخ کے آئینے میں صبر، استقامت اور امید کی چند روشن داستانیں)

تحریر:مسعود محبوب خان (ممبئی)
09422724040

انسانی تاریخ دراصل آزمائش اور کامیابی، عروج اور زوال، تاریکی اور روشنی کی ایک مسلسل داستان ہے۔ اللّٰہ تعالیٰ نے اس دنیا کو دارالامتحان بنایا ہے، جہاں افراد اور اقوام دونوں کو مختلف حالات، مصائب، فتنوں اور چیلنجوں سے گزارا جاتا ہے تاکہ ان کے ایمان، صبر، استقامت اور کردار کا امتحان لیا جا سکے۔ قرآنِ حکیم بار بار اہلِ ایمان کو یہ حقیقت یاد دلاتا ہے کہ مشکلات وقتی ہوتی ہیں، جب کہ اللّٰہ تعالیٰ کی نصرت، رحمت اور کامیابی کا وعدہ دائمی اور اٹل ہے۔ یہی وجہ ہے کہ تاریخ کے ہر دور میں جب بھی اہلِ حق نے ظلم، جبر، ناانصافی اور محرومیوں کا سامنا کیا، تو انہوں نے مایوسی کے اندھیروں میں گم ہونے کے بجائے امید، یقین اور توکل کا چراغ روشن رکھا، اور بالآخر اللّٰہ تعالیٰ نے ان کے لیے کامیابی اور عزّت کے نئے دروازے کھول دیے۔
آج اُمّتِ مسلمہ بھی دنیا کے مختلف خطوں میں بے شمار آزمائشوں، سیاسی و سماجی چیلنجوں، فکری یلغاروں اور تہذیبی کشمکش کا سامنا کر رہی ہے۔ ایسے حالات میں ضرورت اس امر کی ہے کہ ہم وقتی حالات کی تلخیوں اور مشکلات کے بجائے تاریخ کے روشن ابواب سے سبق حاصل کریں، کیونکہ تاریخ صرف ماضی کا بیان نہیں بلکہ حال کی رہنمائی اور مستقبل کی بشارت بھی ہے۔ جب ہم انبیائے کرام علیہم السلام کی مبارک سیرتوں، اہلِ حق کی قربانیوں، مصلحین و مجاہدین کی جدوجہد اور اقوام کے عروج و زوال کا مطالعہ کرتے ہیں تو ہمیں یہ حقیقت واضح طور پر دکھائی دیتی ہے کہ صبر، استقامت، ایمان، علم، کردار اور مسلسل جدوجہد ہی وہ اوصاف ہیں جو تاریک ترین حالات میں بھی کامیابی کی راہیں ہموار کرتے ہیں۔
زیرِ نظر تحریر "اندھیری راتوں کے بعد طلوعِ سحر” اسی آفاقی حقیقت کو تاریخ کے چند روشن اور ایمان افروز واقعات کی روشنی میں اجاگر کرنے کی ایک ادنیٰ سی کوشش ہے۔ اس میں یہ واضح کرنے کی سعی کی گئی ہے کہ ظلم و جبر کا کوئی دور دائمی نہیں ہوتا، آزمائشوں کی کوئی رات ہمیشہ قائم نہیں رہتی، اور حق و صداقت کا چراغ کبھی بجھ نہیں سکتا۔ فاطمہ قاوقجی اور مروہ قاوقجی کی استقامت، حضرت یوسف علیہ السلام کی صبر آزما زندگی اور صلاح الدین ایوبیؒ کی تاریخی جدوجہد جیسے واقعات ہمیں یہ سبق دیتے ہیں کہ اللّٰہ تعالیٰ کی نصرت اپنے مقررہ وقت پر ضرور آتی ہے، اور جو لوگ حق، صبر اور توکل کے راستے پر ثابت قدم رہتے ہیں، تاریخ ان کے لیے عزّت و سربلندی کے نئے باب رقم کرتی ہے۔
دنیا کی تاریخ اس حقیقت کی گواہ ہے کہ ظلم، جبر اور ناانصافی کبھی دائمی نہیں ہوتے۔ وقت کا پہیہ مسلسل گردش میں رہتا ہے اور حالات ہمیشہ ایک جیسے نہیں رہتے۔ جو قومیں، تحریکیں اور افراد آزمائشوں کے طوفانوں میں صبر، استقامت اور توکل کا چراغ روشن رکھتے ہیں، بالآخر وہی تاریخ کے افق پر آفتاب بن کر ابھرتے ہیں۔ قرآنِ حکیم نے اسی ابدی حقیقت کو نہایت دل نشیں انداز میں یوں بیان فرمایا ہے: "فَإِنَّ مَعَ الْعُسْرِ يُسْرًا، إِنَّ مَعَ الْعُسْرِ يُسْرًا”۔ (بے شک تنگی کے ساتھ آسانی ہے، یقیناً تنگی کے ساتھ آسانی ہے)۔ یہ محض ایک روحانی تسلی یا اخلاقی درس نہیں، بلکہ تاریخ کے صفحات پر بارہا ثابت ہونے والا ایک آفاقی قانون ہے۔ حالات کتنے ہی نامساعد کیوں نہ ہوں، آزمائشیں کتنی ہی شدید کیوں نہ ہوں، صبر، استقامت اور حق پر ثابت قدمی آخرکار اپنے ثمرات ضرور دکھاتی ہے۔
فاطمہ قاوقجی اور ان کی والدہ مروہ قاوقجی کی داستان بھی اسی حقیقت کی ایک روشن اور زندہ مثال ہے۔ ایک وقت تھا جب مروہ قاوقجی، ترکی کی پہلی باحجاب خاتون رکنِ پارلیمنٹ ہونے کے باوجود، صرف اپنے اسلامی تشخص اور حجاب کی وجہ سے پارلیمنٹ میں کام کرنے سے محروم کر دی گئیں۔ نہ صرف یہ کہ انہیں شدید سیاسی اور سماجی دباؤ کا سامنا کرنا پڑا، بلکہ ان کی شہریت تک منسوخ کر دی گئی اور جلاوطنی ان کا مقدر بن گئی۔ بظاہر یہ ایک فرد کی شکست اور ایک نظریے کی پسپائی معلوم ہوتی تھی، لیکن تاریخ کا سفر یہیں ختم نہیں ہوا۔ وقت نے کروٹ لی، حالات بدلے اور وہی ترکی، جہاں کبھی حجاب ایک جرم سمجھا جاتا تھا، آج ایک نئی تصویر پیش کر رہا ہے۔ مروہ قاوقجی کی بیٹی فاطمہ قاوقجی اعلیٰ تعلیم، صلاحیت اور اعتماد کے ساتھ بین الاقوامی سفارتی حلقوں میں اپنے ملک کی نمائندگی کرتی نظر آتی ہیں اور صدرِ ترکی کے ساتھ اہم عالمی ملاقاتوں میں بطور مترجم خدمات انجام دیتی ہیں۔
یہ محض ایک خاندان کی کامیابی کی داستان نہیں، بلکہ اس حقیقت کا عملی ثبوت ہے کہ حق اور استقامت کی راہ میں آنے والی آزمائشیں دائمی نہیں ہوتیں۔ کبھی کبھی تاریخ کو انصاف کرنے میں وقت لگتا ہے، مگر جب وہ انصاف کرتی ہے تو نسلوں کے زخموں پر مرہم رکھ دیتی ہے اور یہ پیغام دیتی ہے کہ اللّٰہ تعالیٰ کے فیصلوں کے سامنے حالات کی سختیاں زیادہ دیر ٹھہر نہیں سکتیں۔ بارہویں صدی عیسوی میں مسلم دنیا سیاسی انتشار، باہمی کشمکش اور عسکری کمزوری کا شکار ہو چکی تھی۔ بیت المقدّس صلیبی افواج کے قبضے میں تھا، جب کہ اُمّتِ مسلمہ مایوسی، بے یقینی اور زوال کے اندھیروں میں بھٹک رہی تھی۔ بظاہر ایسا محسوس ہوتا تھا کہ مسلمانوں کی عظمت کا سورج غروب ہو چکا ہے اور اس کی روشنی دوبارہ طلوع نہ ہو سکے گی۔
مگر تاریخ کے انہی تاریک لمحات میں صلاح الدین ایوبیؒ ایک امید افزا رہنما کے طور پر ابھرے۔ انہوں نے محض تلوار کے زور پر نہیں، بلکہ برسوں کی فکری، اخلاقی اور عسکری تربیت، حکمتِ عملی، صبر اور استقامت کے ذریعے اُمّت کے منتشر شیرازے کو جوڑا۔ انہوں نے مختلف مسلم قوتوں کو ایک مقصد پر متحد کیا، قیادت کا حق ادا کیا اور اُمّت میں خود اعتمادی کی نئی روح پھونک دی۔ بالآخر 1187ء میں معرکۂ حطین کی تاریخی فتح کے بعد بیت المقدّس کو صلیبی قبضے سے آزاد کرا کے صلاح الدین ایوبیؒ نے یہ ثابت کر دیا کہ زوال کسی قوم کی دائمی تقدیر نہیں ہوتا۔ جب قومیں اپنی اصلاح، اتحاد، ایمان اور مسلسل جدوجہد کا راستہ اختیار کرتی ہیں تو تاریخ کا دھارا بدل جاتا ہے اور شکست خوردہ اُمّتیں بھی دوبارہ وقار، عزّت اور سربلندی کی منزل پا لیتی ہیں۔
جدید ترکی کی تاریخ میں ایک ایسا دور بھی گزرا ہے جب مذہبی شناخت کو ریاستی سیکولرازم کے نام پر محدود کرنے کی کوشش کی گئی۔ مذہبی شعائر، بالخصوص حجاب، کو محض ایک شخصی انتخاب نہیں بلکہ ایک سیاسی مسئلہ سمجھا جاتا تھا۔ جامعات، سرکاری اداروں اور بعض عوامی شعبوں میں حجاب پر مختلف نوعیت کی پابندیاں عائد تھیں، جس کے باعث بہت سی خواتین کو تعلیم، ملازمت اور سماجی شرکت کے میدان میں مشکلات کا سامنا کرنا پڑتا تھا۔ تاہم تاریخ کا پہیہ ہمیشہ ایک ہی سمت میں نہیں گھومتا۔ وقت کے ساتھ عوامی شعور میں تبدیلی آئی، عوامی عمل نے نئی راہیں کھولیں اور سیاسی منظرنامے میں ایسے تغیرات رونما ہوئے جنہوں نے معاشرے کی ترجیحات کو ازسرِنو متعین کیا۔ عوام کے مسلسل مطالبات، سماجی جدوجہد اور سیاسی تبدیلیوں نے اس بحث کو ایک نئے رخ پر ڈال دیا، جہاں مذہبی شناخت کو شہری حقوق اور شخصی آزادی کے تناظر میں دیکھا جانے لگا۔
آج ترکی میں وہی حجاب، جو کبھی پابندیوں اور تنازعات کا موضوع تھا، زندگی کے مختلف شعبوں میں باوقار اور پُراعتماد موجودگی کے ساتھ نظر آتا ہے۔ جامعات، پارلیمان، سرکاری اداروں، کاروباری مراکز اور سماجی میدانوں میں حجاب پہننے والی خواتین اپنی صلاحیتوں اور کردار کے ذریعے معاشرے کی تعمیر میں فعال حصّہ لے رہی ہیں۔ ترکی کا یہ سفر اس حقیقت کی یاد دہانی کراتا ہے کہ نظریات، اقدار اور شناختیں محض قانونی پابندیوں یا انتظامی فیصلوں سے ختم نہیں ہوتیں۔ انہیں وقتی طور پر محدود کیا جا سکتا ہے، لیکن اگر وہ عوام کے شعور، ثقافت اور اجتماعی احساس کا حصّہ بن جائیں تو وقت کے ساتھ دوبارہ ابھر کر اپنی جگہ بنا لیتی ہیں۔ یہی تاریخ کا سبق ہے کہ پائیدار تبدیلی جبر سے نہیں، بلکہ شعور، صبر اور مسلسل جدوجہد سے جنم لیتی ہے۔
انسانی تاریخ میں امید، صبر اور اللّٰہ تعالیٰ پر کامل بھروسا کی سب سے دلنشین اور ایمان افروز مثال حضرت یوسف علیہ السلام کی زندگی ہے۔ یہ ایک ایسی داستان ہے جو بتاتی ہے کہ آزمائشوں کی تاریک راتیں بھی اللّٰہ کی حکمت کے سامنے دائمی نہیں ہوتیں اور مصیبتوں کے پردے میں بھی کامیابیوں کے راز پوشیدہ ہوتے ہیں۔ حضرت یوسف علیہ السلام کو اپنے ہی بھائیوں کی حسد آمیز سازش کا سامنا کرنا پڑا۔ انہیں کنویں میں پھینک دیا گیا، پھر غلام بنا کر فروخت کر دیا گیا۔ جوانی میں ایک اور کڑی آزمائش آئی اور بے گناہ ہونے کے باوجود قید و بند کی صعوبتیں برداشت کرنا پڑیں۔ مگر ان تمام حالات میں انہوں نے صبر، استقامت، عفت، تقویٰ اور اللّٰہ تعالیٰ پر توکل کا دامن کبھی ہاتھ سے نہ چھوڑا۔
وقت گزرتا رہا، حالات بدلتے رہے اور اللّٰہ تعالیٰ کی حکمت اپنے مقررہ انداز میں جلوہ گر ہوتی رہی۔ بالآخر وہی شخص جو کبھی کنویں کی گہرائیوں میں تنہا چھوڑ دیا گیا تھا اور پھر قید خانے کی دیواروں میں محدود کر دیا گیا تھا، مصر کے اقتدار کے ایوانوں تک پہنچا اور ملک کے انتظام و انصرام میں ایک مرکزی اور بااختیار مقام کا حامل بنا۔ حضرت یوسف علیہ السلام کا یہ سفر اس ابدی حقیقت کی روشن دلیل ہے کہ اللّٰہ تعالیٰ کے فیصلے انسانی اندازوں اور ظاہری حالات کے پابند نہیں ہوتے۔ جب اس کی مشیت حرکت میں آتی ہے تو محرومی نعمت میں، آزمائش کامیابی میں اور قید آزادی و اقتدار میں بدل جاتی ہے۔ گویا اللّٰہ تعالیٰ دنیا کو یہ سبق دیتا ہے کہ اگر بندہ ایمان، صبر اور تقویٰ پر ثابت قدم رہے تو کنواں بھی تخت کی سیڑھی بن سکتا ہے اور مشکلات کی راہیں ہی عزّت و سربلندی کی منزل تک پہنچانے کا ذریعہ بن جاتی ہیں۔
حقیقت یہ ہے کہ اندھیرا کبھی روشنی کا دشمن نہیں ہوتا، بلکہ اس کی آمد کا پیش خیمہ بنتا ہے۔ رات جتنی گہری ہوتی ہے، صبح کی کرنیں اتنی ہی روشن اور امید افزاء محسوس ہوتی ہیں۔ یہی اصول انسانی زندگی پر بھی صادق آتا ہے۔ آزمائشیں انسان کو توڑنے، مایوس کرنے یا راستے سے ہٹانے کے لیے نہیں آتیں، بلکہ اسے نکھارنے، سنوارنے اور اس کی پوشیدہ صلاحیتوں کو بیدار کرنے کا ذریعہ بنتی ہیں۔ تاریخ گواہ ہے کہ ہر عظیم شخصیت نے مشکلات، محرومیوں اور آزمائشوں کی بھٹی میں جل کر ہی اپنی ذات کو کندن بنایا ہے۔ مصائب نے ان کے حوصلوں کو پختہ کیا، ناکامیوں نے انہیں تجربہ عطاء کیا اور رکاوٹوں نے ان کے عزم کو مزید مضبوط بنایا۔ یہی وجہ ہے کہ کامیابی کی بلندیاں اکثر ان لوگوں کا مقدر بنتی ہیں جو مشکلات کے سامنے ہار ماننے کے بجائے ان سے سیکھنے اور آگے بڑھنے کا ہنر جانتے ہیں۔
یہی اصول قوموں کی اجتماعی زندگی میں بھی کارفرما ہوتا ہے۔ قومیں صرف فتوحات سے نہیں بلکہ اپنی شکستوں سے بھی سبق حاصل کرتی ہیں۔ آزمائشیں انہیں غفلت سے جگاتی ہیں، بحران انہیں اپنی کمزوریوں کا احساس دلاتے ہیں اور قربانیاں ان کے اندر ایثار، وحدت اور جدوجہد کی نئی روح پیدا کرتی ہیں۔ چنانچہ تاریخ میں وہی قومیں دیرپا عظمت حاصل کرتی ہیں جو مصیبتوں کو اپنی تعمیر کا ذریعہ اور چیلنجوں کو اپنی ترقی کا زینہ بنا لیتی ہیں۔ اس اعتبار سے اندھیروں کا فلسفہ مایوسی کا نہیں بلکہ امید کا فلسفہ ہے۔ یہ انسان کو سکھاتا ہے کہ مشکلات کے بادل کتنے ہی گہرے کیوں نہ ہوں، ان کے پیچھے امید کا سورج ضرور موجود ہوتا ہے۔ شرط صرف یہ ہے کہ انسان اور قومیں صبر، استقامت اور مسلسل جدوجہد کا چراغ روشن رکھیں، کیونکہ تاریخ کا ہر روشن باب کسی نہ کسی تاریک رات کے بعد ہی رقم ہوا ہے۔
آج اگر دنیا کے مختلف خطوں میں مسلمان جنگوں، تعصبات، ظلم و جبر، سیاسی ناانصافیوں اور متعدد اجتماعی چیلنجوں کا سامنا کر رہے ہیں تو انہیں مایوسی، بے عملی اور احساسِ شکست کا شکار ہونے کے بجائے تاریخ کے روشن اسباق کو یاد رکھنا چاہیے۔ تاریخ بارہا یہ حقیقت آشکار کر چکی ہے کہ حالات خواہ کتنے ہی نامساعد کیوں نہ ہوں، ان کا دوام نہیں ہوتا اور آزمائشوں کے بعد آسانیوں کے دروازے ضرور کھلتے ہیں۔ یہ ایک ناقابلِ تردید حقیقت ہے کہ:
• ظلم ہمیشہ عارضی ہوتا ہے اور عدل کی روشنی بالآخر اپنا راستہ بنا لیتی ہے۔
• طاقت، اقتدار اور جبر کا غرور کبھی دائمی نہیں رہتا۔
• آزمائشوں اور مصیبتوں کی راتیں ہمیشہ کے لیے نہیں ہوتیں؛ ان کے بعد امید کی صبح ضرور طلوع ہوتی ہے۔
• صبر، استقامت اور حق پر ثابت قدمی کبھی رائیگاں نہیں جاتی، بلکہ وقت آنے پر اپنے بہترین نتائج ظاہر کرتی ہے۔
تاریخ کے صفحات گواہ ہیں کہ جن قوموں نے مشکلات کے سامنے ہتھیار ڈالنے کے بجائے اپنے ایمان، کردار، علم، اخلاق اور مسلسل جدوجہد سے وابستگی کو برقرار رکھا، وہ بالآخر دوبارہ عزت، وقار اور سربلندی کی منزل تک پہنچیں۔ زوال کے ادوار ان کے لیے خاتمہ نہیں بلکہ ایک نئے آغاز کا پیش خیمہ ثابت ہوئے۔ لہٰذا مسلمانوں کے لیے اصل پیغام یہ ہے کہ وہ مایوسی کے اندھیروں میں گم ہونے کے بجائے امید کا چراغ روشن رکھیں، اپنے عقیدے پر مضبوطی سے قائم رہیں، علم و عمل کے میدان میں آگے بڑھیں، اپنے کردار کو اپنی دعوت کا آئینہ بنائیں اور اجتماعی اصلاح و تعمیری جدوجہد کو اپنی ترجیح بنائیں۔ کیونکہ تاریخ کے دروازے انہی قوموں پر دوبارہ کھلتے ہیں جو حالات کی سختیوں کے باوجود اپنے مقصد، اپنی شناخت اور اپنے اصولوں سے وفاداری نبھاتی ہیں۔
اندھیری رات جتنی بھی طویل، خوفناک اور پرآشوب کیوں نہ ہو، وہ سحر کی آمد کو روک نہیں سکتی۔ یہ کائنات کا اٹل قانون ہے اور تاریخ کا مسلسل دہرایا جانے والا سبق بھی۔ زمانے کے نشیب و فراز، اقوام کے عروج و زوال اور اہلِ حق کی آزمائشوں کی داستانیں بار بار یہی پیغام دیتی ہیں کہ مایوسی اہلِ ایمان کا شیوہ نہیں، کیونکہ ان کا اعتماد حالات پر نہیں بلکہ اللّٰہ تعالیٰ کی قدرت، حکمت اور وعدوں پر ہوتا ہے۔ مروہ قاوقجی سے فاطمہ قاوقجی تک کا سفر، حضرت یوسف علیہ السلام کے کنویں سے مصر کے ایوانِ اقتدار تک پہنچنے کی داستان، اور صلاح الدین ایوبیؒ کے ہاتھوں بیت المقدّس کی آزادی کا تاریخی واقعہ! یہ سب ایک ہی حقیقت کے مختلف مظاہر ہیں۔ یہ واقعات ہمیں یاد دلاتے ہیں کہ تاریخ کا دھارا ہمیشہ طاقت ور نظر آنے والوں کے حق میں نہیں بہتا، بلکہ بالآخر حق، صبر اور استقامت کے لیے نئی راہیں کھلتی ہیں۔
ان تمام داستانوں کا مرکزی سبق یہ ہے کہ اللّٰہ تعالیٰ کی تدبیر انسانی اندازوں، ظاہری امکانات اور وقتی حالات سے کہیں بلند اور وسیع ہوتی ہے۔ انسان جب اخلاص، صبر، استقامت اور توکل کے ساتھ حق کے راستے پر ثابت قدم رہتا ہے تو بظاہر بند نظر آنے والے دروازے کھلنے لگتے ہیں، حالات کا رخ بدل جاتا ہے اور وقت ایک نئی تاریخ رقم کرتا ہے۔ چنانچہ ظلم کی رات کتنی ہی گہری کیوں نہ ہو، ناانصافی کے بادل کتنے ہی گھنے کیوں نہ ہوں اور مایوسی کے سائے کتنے ہی طویل کیوں نہ دکھائی دیں، صبح کا سورج طلوع ہو کر رہتا ہے۔ اور جب وہ طلوع ہوتا ہے تو اپنی پوری آب و تاب، پوری شان اور مکمل روشنی کے ساتھ افقِ عالم کو منور کر دیتا ہے۔ یہی امید، یہی یقین اور یہی توکل اہلِ ایمان کا سرمایہ ہے، جو انہیں ہر تاریکی میں روشنی اور ہر آزمائش میں کامیابی کی نوید سناتا ہے۔
دعا ہے کہ اللّٰہ تعالیٰ اس تحریر کو اُمّتِ مسلمہ کے لیے امید، حوصلے، فکری بیداری اور مثبت عمل کا ذریعہ بنائے، اور ہمیں ہر حال میں اپنے ربّ پر کامل اعتماد، حق پر استقامت اور خیر کی جدوجہد میں ثابت قدمی عطاء فرمائے۔ آمین یا ربّ العالمین۔
🗓 (10.06.2026)
✒️ Masood M. Khan (Mumbai)
📧masood.media4040@gmail.com