آئینہ خانہ :۱۵؍گرام کا ’تاریخی‘ چھاپہ، روما کی جاسوسی اور عادل آباد کا ’پابلو اسکوبار‘!

از : سید رشید اللہ حسینی ، اطہر کلیم احمد

آج صبح جب ہم کالم نگاروں کی نظر عادل آباد پولیس کی تازہ ترین کاروائی کی خبر پر پڑی، تو ہمارا تخیل فوراً ہالی ووڈ کی کسی سنسنی خیز اور ایکشن سے بھرپور فلم کے مناظر میں کھو گیا۔ ہم نے تصور کیا کہ سائرن بجاتی گاڑیاں دھنگر گلی کے اطراف کا محاصرہ کر رہی ہیں، چابک دست کمانڈوز پوزیشنیں سنبھال رہے ہیں اور ان کے آگے آگے ’نارکوٹک جاگیلام‘ یعنی منشیات کا سراغ لگانے والی ’’شاہی‘‘ کُتیا ’روما‘ اپنی تیز ترین حس بو کے ساتھ کسی خفیہ خانے کی طرف بڑھ رہی ہے۔ پس منظر میں سسپنس سے بھرپور موسیقی بج رہی ہے، روما بھونک کر اشارہ کرتی ہے اور پولیس ایک بین الاقوامی اسمگلنگ کارٹیل کا پردہ چاک کر دیتی ہے۔ لیکن جب ہم نے خبر کی تفصیلات میں برآمد ہونے والے مال کی مقدار پڑھی، تو ہمارے سنسنی خیز تخیل کی ساری ہوا ایک سیکنڈ میں نکل گئی۔ پتہ چلا کہ روما کی اس اعلیٰ ترین، سائنسی اور جاسوسانہ صلاحیت کے نتیجے میں کل ’’15 گرام گانجہ‘‘ برآمد ہوا ہے!
پندرہ گرام؟ خدا کی پناہ! یہ گانجہ پکڑا گیا ہے یا کشمیر کا خالص زعفران؟ پندرہ گرام سن کر تو ہمیں اپنے محلے کا وہ سبزی والایاد آ گیا جو ترس کھا کر اس سے زیادہ وزن کا دھنیا اور پودینہ تو یونہی مفت میں سبزی کے لفافے میں ڈال دیتا ہے۔ ہم تو حیران ہیں کہ اس ’تاریخی‘ برآمدگی کو تولنے کے لیے پولیس کو مال خانے کے بڑے کانٹے کے بجائے یقیناً کسی سنار کا ڈیجیٹل ترازو ادھار مانگ کر لانا پڑا ہوگا! ستم ظریفی دیکھیے کہ اس عظیم الشان چھاپے کے لیے دھنگر گلی تک جانے والی پولیس جیپ کا جتنا پٹرول جلا ہے، اس 15 گرام گانجے کی کل مالیت اس سے بھی کم نکلے گی۔ اور اگر تفتیش کے دوران کسی سپاہی کو ذرا زور سے چھینک آ جاتی، تو مالِ مقدمہ کا آدھا حصہ وہیں ہوا میں تحلیل ہو کر ’شہید‘ ہو چکا ہوتا!
سچ پوچھیں تو اس کاروائی کے بعد ہمیں سب سے زیادہ ہمدردی ملزم سے نہیں، بلکہ اس معصوم کُتیا ’روما‘ سے ہو رہی ہے۔ بیچاری نے پولیس اکیڈمی میں مہینوں کٹھن ٹریننگ لی ہوگی، خواب دیکھے ہوں گے کہ کسی دن سمندری جہاز بھر کر کوکین پکڑے گی، اور فیلڈ میں اتار کر اسے محلے کی ’پندرہ گرام‘ کی پڑیا پکڑوائی جا رہی ہے۔ روما بھی دل ہی دل میں کہتی ہوگی کہ ایک وقت میں جتنا ’’پیڈیگری‘‘ (Pedigree) وہ کھا جاتی ہے، یہ برآمد شدہ مال تو اس سے بھی کم ہے۔ ادھر حوالات میں بند ملزم شیخ واجد کا دکھ بھی کسی سے کم نہیں، وہ سلاخوں کے پیچھے بیٹھا یہی سوچ رہا ہوگا کہ جتنا مال مجھ سے پکڑا گیا ہے، اس سے دس گنا زیادہ وزن تو ان ہتھکڑیوں کا ہے جو مجھے پہنائی گئی ہیں!
ایس پی صاحب نے 15 گرام پر جس طمطراق سے پریس ریلیز جاری کی ہے، اسے دیکھ کر ایسا لگا جیسے کولمبیا کے ڈرگ لارڈ ’پابلو اسکوبار‘ کو عادل آباد کی دھنگر گلی سے زندہ گرفتار کر لیا گیا ہو۔ اگر خدانخواستہ پچاس گرام مل جاتا تو شاید عادل آباد میں عام تعطیل کا اعلان کرنا پڑ جاتا! اس ’بڑے پیمانے‘ پر ہونے والی برآمدگی کے بعد شہریوں میں ایسا خوف پھیلا ہے کہ لوگ پیزا کے ساتھ ملنے والے ’اوریگانو‘ (Oregano) کے پاؤچ بھی چھپا کر کھا رہے ہیں، کیا پتا روما کب سونگھتی ہوئی آ جائے۔ اوپر سے پولیس نے واٹس ایپ نمبر اور ڈائل 100 کی اپیل جاری کی ہے کہ عوام مشکوک ’حرکات و سکنات‘ پر نظر رکھیں۔ اب عوام بیچاری مائیکروسکوپ (Microscope) لے کر گلیوں میں گھومے گی تاکہ 15 گرام جیسی ’بھاری بھرکم‘ اور ’پہاڑ جیسی‘ منشیات ڈھونڈ کر ضلعے کو پاک کیا جا سکے۔ ہم بھی کنفیوژن کا شکار ہیں کہ اگر کسی کی جیب سے غلطی سے دو گرام سونف یا الائچی گر جائے، تو کیا اس کے لیے بھی ہیڈکوارٹر فون کر کے فوراً ’’روما‘‘ کو بلایا جائے؟
ہمارے ملک کا نظامِ انصاف بھی کمال کا ہے، بندرگاہوں پر ہزاروں کلو منشیات سے بھرے سمندری جہاز بغیر کسی کتے کے بھونکے خاموشی سے گزر جاتے ہیں، مگر گلی محلے کے 15 گرام پر پورا ویٹرنری، پولیس اور عدالتی نظام حرکت میں آ جاتا ہے! مذاق برطرف، منشیات کا خاتمہ واقعی ایک سنجیدہ مسئلہ ہے اور ایس پی صاحب نے بجا طور پر نوجوانوں سے اپیل کی ہے کہ وہ منشیات سے دور رہیں۔ تاہم، ہمارا مشورہ ہے کہ نوجوانوں کے ساتھ ساتھ روما کو بھی کچھ دن ’ڈپریشن‘ سے دور رکھنے کا انتظام کیا جائے، کیونکہ اس ریکوری کے بعد اس کے ’کیرئیر‘ اور ’سیلف ریسپیکٹ‘ کو جو شدید دھچکا لگا ہے، اس کا ازالہ آسان نہیں۔ قصہ مختصر، عادل آباد پولیس اور جاسوس کُتیا روما کی اس ’عظیم الشان‘ کامیابی پر ہم انہیں دل کی گہرائیوں سے مبارکباد پیش کرتے ہیں۔ بس دعا یہی ہے کہ اگلی بار جب روما کی خدمات حاصل کی جائیں، تو مال کم از کم اتنا ضرور ہو کہ پریس کانفرنس کی میز پر رکھنے کے بعد کیمرے کی آنکھ اسے زوم (Zoom) کیے بغیر بھی واضح طور پر دیکھ سکے!
٭٭٭٭٭