UGC-NET امتحان کے پیشِ نظر امتحانی مرکز کے اطراف امتناعی احکامات نافذ

ناندیڑ:7؍ستمبر(نمائندہ اعتبار)یونیورسٹی گرانٹس کمیشن (UGC) کا قومی اہلیتی امتحان UGC-NET-2026، 9 اور 10 ستمبر 2026 کو ناندیڑ دیہی پولیس اسٹیشن کی حدود میں واقع آئیون ڈیجیٹل زون، آئی ڈی زیڈ، وشنو پوری، ناندیڑ میں صبح 9 بجے سے شام 6 بجے تک منعقد کیا جائے گا۔ امتحان کو پُرامن، خوش اسلوبی اور بغیر کسی رکاوٹ کے مکمل کرنے کے مقصد سے امتحانی مرکز کے اطراف امتناعی احکامات نافذ کیے گئے ہیں۔ناندیڑ کے پولیس سپرنٹنڈنٹ ڈاکٹر نیلابھ روہن نے بھارتی شہری تحفظ سنہتا، 2023 کی دفعہ 163 کے تحت حاصل اختیارات کا استعمال کرتے ہوئے یہ حکم جاری کیا ہے۔ حکم کے مطابق 9 اور 10 ستمبر کو صبح 7 بجے سے رات 8 بجے تک امتحانی مرکز سے 300 میٹر کے دائرے میں امتحانی کام سے متعلق افسران اور ملازمین کے علاوہ کسی بھی شخص کو داخل ہونے کی اجازت نہیں ہوگی۔اس دوران امتحانی مرکز کے 300 میٹر کے علاقے میں موجود پبلک ٹیلی فون، STD، ISD، موبائل فون، فیکس، زیراکس، پیجر اور لاؤڈ اسپیکر کے استعمال پر پابندی عائد رہے گی۔اس کے علاوہ امتحانی مرکز کے احاطے میں امتحانی کام سے وابستہ افسران اور ملازمین کے علاوہ کسی بھی شخص کو کیلکولیٹر، ریڈیو، کمپیوٹر، لیپ ٹاپ یا اس نوعیت کا کوئی دوسرا سامان لے جانے یا استعمال کرنے کی اجازت نہیں ہوگی۔انتظامیہ کے مطابق امتحان کے دوران امتحانی مرکز کے اطراف کسی بھی قسم کی بدعنوانی، غیر مناسب سرگرمی یا امن و قانون کی صورتحال پیدا نہ ہو اور امیدواروں کو پُرسکون ماحول میں امتحان دینے کا موقع مل سکے، اسی مقصد سے یہ امتناعی احکامات نافذ کیے گئے ہیں۔امیدواروں، والدین، شہریوں اور متعلقہ افسران و ملازمین سے اپیل کی گئی ہے کہ وہ امتناعی احکامات پر سختی سے عمل کریں اور امتحان کو پُرامن اور کامیاب طریقے سے منعقد کرنے کے لیے انتظامیہ کے ساتھ تعاون کریں۔