ناندیڑ کے 33 مراکز پر یکم دسمبر کو ایم پی ایس سی امتحان

ناندیڑ:28؍نومبر ( نامہ نگار) ریاستی حکومت نے بڑے پیمانے پر ملازمتوں کی بھرتی کا عمل شروع کیا ہے، جس کے تحت مہاراشٹر گزٹیڈ سول سروسز مشترکہ ابتدائی امتحان 2024 ء یکم دسمبر کو منعقد ہونے جا رہا ہے۔ ناندیڑ کے تمام بڑے اسکولوں اور کالجوں کو امتحانی مراکز بنایا گیا ہے، جہاں امتحان کے دوران ناکہ بندی اور 100 میٹر کے دائرے میں داخلے پر پابندی عائد کی جائے گی۔ شہریوں سے اپیل کی گئی ہے کہ وہ طلبہ کے اس اہم امتحان کو مدنظر رکھتے ہوئے تعاون کریں، یہ اپیل ضلع کلکٹر ابھیجیت راؤت نے کی ہے۔یہ امتحان دو نشستوں میں منعقد ہوگا۔ صبح 10 بجے سے دوپہر 12 بجے تک اور دوپہر 3 بجے سے شام 5 بجے تک۔ امتحان کے دن مراکز والے اسکولوں اور کالجوں کے ارد گرد شور شرابہ نہ ہو، اس کے لیے اقدامات کیے گئے ہیں۔ نہ تو کہیں ڈی جے بجے گا اور نہ ہی امتحانی مراکز کے 100 میٹر کے دائرے میں موبائل فون یا دیگر سامان استعمال کرنے کی اجازت ہوگی۔بھارتی شہری تحفظ قانون کی دفعہ 163 کے تحت یہ تمام پابندیاں نافذ کی گئی ہیں اور شہریوں سے تعاون کی اپیل کی گئی ہے۔