غزہ کے دیر البلح میں اسرائیلی حملے میں 47 افراد ہلاک

غزہ: یکم؍ نومبر: فلسطینی خبر رساں ایجنسی وافا نے جمعے کو اطلاع دی کہ دیر البلح شہر، نصیرات کیمپ اور وسطی غزہ کی پٹی کے قصبے الزوایدۃ پر رات کو ہونے والی اسرائیلی بمباری میں 47 فلسطینی جاں بحق اور درجنوں زخمی ہو گئے جن میں زیادہ تر بچے اور خواتین ہیں۔انکلیو کے صحت کے حکام نے بتایا کہ جمعرات کو غزہ کی پٹی میں اسرائیلی فوج کے حملوں میں کم از کم 46 فلسطینی ہلاک ہو گئے۔ پٹی کے زیادہ تر شمال کو نشانہ بنایا گیا جہاں ایک ہسپتال پر حملے میں طبی سامان کو آگ لگ گئی اور آپریشن میں خلل پیدا ہوا۔اسرائیلی فوج نے حماس پر بیت لاہیا کے کمال عدوان ہسپتال کو فوجی مقاصد کے لیے استعمال کرنے کا الزام عائد کیا اور کہا ہے کہ وہاں "درجنوں دہشت گرد” چھپے ہوئے ہیں۔ صحت کے حکام اور حماس اس دعوے کی تردید کرتے ہیں۔غزہ کی پٹی میں وزارتِ صحت نے تمام بین الاقوامی اداروں سے مطالبہ کیا ہے کہ ہسپتالوں اور طبی عملے کو (اسرائیلی) قابض فوج کی بربریت سے بچائیں۔”طبی خیراتی ادارے میڈیسنز سانز فرنٹیئرز (ایم ایس ایف) نے جمعرات کو کہا کہ ہسپتال میں اس کے ایک ڈاکٹر محمد عبید کو اسرائیلی افواج نے گذشتہ ہفتے کے روز حراست میں لیا تھا۔ ادارے نے مذکورہ ڈاکٹر اور تمام طبی عملے کے تحفظ کا مطالبہ کیا جنہیں "خوفناک تشدد کا سامنا ہے کیونکہ وہ طبی نگہداشت فراہم کرنے کی کوشش کر رہے ہیں۔”