ایشیا کے امیر ترین شخص مکیش امبانی کے بیٹے کی شادی کی تقریبات، جسٹن بیبر کی پرفارمنس

دہلی :7؍جولائی: کینیڈین پاپ سٹار جسٹن بیبر نے ایشیا کے امیر ترین شخص مکیش امبانی کے بیٹے کی شادی کی تقریبات کی تازہ ترین قسط میں ہندوستان کی بعض بڑی مشہور شخصیات کو اپنے فن کے مظاہرے سے محظوظ کیا۔ مہینوں سے جاری ان تقریبات کا اہتمام مکیش امبانی کرتے ہیں۔نوعمری میں ایک ہر دل عزیز فنکار کے طور پر شہرت حاصل کرنے والے بیبر کئی عالمی مشہور شخصیات میں شامل ہیں جو امبانی کے چھوٹے بیٹے اننت اور منگیتر رادھیکا مرچنٹ کی شادی کی تقریبات میں شرکت کے لیے ہندوستان پہنچے۔اننت اور مرچنٹ دونوں کی عمر 29 سال ہے۔ وہ بچپن کے دوست تھے اور 12 جولائی سے شروع ہونے والی تین روزہ ہندو تقریب میں شادی کرنے والے ہیں۔ مرچنٹ ممتاز فارماسیوٹیکل کی صنعت کے ایک امیر تاجر کی بیٹی ہیں۔لاس اینجلس سے ہندوستان کا سفر کرنے والے بیبر ایک بڑے سائز کی گلابی ٹی شرٹ اور بالٹی ہیٹ پہنے ہوئے جمعہ کی صبح ممبئی کے ہوائی اڈے پر اترے۔اس رات ہندوستان کے مالیاتی مرکز میں ان کے کنسرٹ کی فوٹیج سوشل میڈیا پر اپ لوڈ کی گئی جس میں انہیں ان کے 2015 کے ہٹ نغمے "سوری” کو سینکڑوں شائقین کے سامنے پیش کرتے ہوئے دکھایا گیا تھا۔جمعہ کے روز تقریب میں شریک مشہور شخصیات میں بالی ووڈ سٹار سلمان خان اور ہندوستانی کرکٹ ٹیم کے سابق کپتان ایم۔ایس۔ دھونی شامل تھے۔بھارتی میڈیا رپورٹس میں بتایا گیا کہ بیبر کو اس پرفارمنس کے لیے 10 ملین ڈالر تک معاوضہ ادا کیے جانے کی افواہ تھی۔اننت امبانی اور مرچنٹ پہلے ہی اس مہینے کے مرکزی پروگرام سے قبل دو وسیع اور ستاروں سے مزین تقریبات کا انعقاد کر چکے ہیں جس میں ریاست گجرات میں فروری میں منعقدہ تین روزہ گالا بھی شامل ہے۔وہاں ہالی ووڈ گلوکارہ ریانا نے گذشتہ سال کے سپر بال کے بعد سے اپنا پہلا کنسرٹ کیا تھا اور مہمانوں میں فیس بک کے بانی مارک زکربرگ اور سابق امریکی صدر ڈونلڈ ٹرمپ کی بیٹی ایوانکا شامل تھیں۔جون میں جوڑے نے بحیر روم کی چار روزہ سیر کا آغاز کیا جہاں گلوکارہ کیٹی پیری نے کانز کے ایک فرانسیسی شیٹو میں ماسکریڈ بال میں پرفارم کیا۔بیک سٹریٹ بوائز، امریکی ریپر پِٹ بل اور اطالوی فنکار آندرے بوسیلی نے بھی مہمانوں کو تفریح فراہم کی۔اننت کے ارب پتی ٹائیکون والد شادی کی مہنگی تقریبات منعقد کرنے کے حوالے سے شہرت رکھتے ہیں۔انہوں نے 2018 میں اپنی بیٹی کی ہندوستان میں اب تک کی مہنگی ترین شادی منعقد کی تھی جس پر مبینہ طور پر 100 ملین ڈالر کے اخراجات ہوئے اور امریکی گلوکارہ بیونسے نے فن کا مظاہرہ کیا۔ریلائنس انڈسٹریز کے چیئرمین 67 سالہ امبانی 113 بلین ڈالر سے زیادہ کی دولت کے مالک ہیں اور فوربس کی ارب پتیوں کی فہرست کے مطابق دنیا کے 11ویں امیر ترین شخص ہیں۔وہ ہندوستان کے دائیں بازو کے ہندو قوم پرست رہنما وزیرِ اعظم نریندر مودی کے اہم اتحادی بھی ہیں۔امبانی کو تیل، گیس اور پیٹرو کیمیکلز پر محیط ایک منافع بخش صنعتی ادارہ وراثت میں ملا اور انہوں نے اسے ترقی دے کر ایک عظیم تجارتی مرکز بنا دیا جس کے خوردہ، ٹیلی کمیونیکیشنز اور انڈین پریمیئر لیگ کرکٹ ٹیم کے شعبوں میں منافع بخش کاروبار ہیں۔
مکیش امبانی کے بیٹے کی شادی آئندہ ہفتے
دہلی :7؍جولائی: مقامی ذرائع ابلاغ کے مطابق مکیش امبانی کے بیٹے آننت امبانی کی شادی 29 سالہ رادھیکا مرچنٹ سے 12 جولائی کو ہو رہی ہے۔اس سال مارچ میں ایشیا کے امیر ترین شخص اور بھارت کی ریلائنس انڈسٹریز کے مالک مکیش امبانی کے بیٹے آننت امبانی کی شادی کی تقاریب کا پر تعیش آغاز ہوا تھا۔ مارچ کی تین روزہ تقاریب میں 1,200 افراد کو مدعو کیا گیا تھا، جن میں سابق عالمی رہنما، ٹیک ٹائیکونز اور بالی ووڈ کی مشہور شخصیات بھی شامل تھیں۔ اس کے علاوہ امریکی گلوکارہ ریحانہ نے بھی اس موقع پر پرفارم کیا تھا۔مئی میں اس شادی کی تقاریب کے ایک اور دور کا آغاز ہوا، جس میں مکیش امبانی اپنے مہمانوں کو ایک کروز شپ پر اٹلی سے فرانس کے تین روزہ سفر پر لے گئے۔اب بالآخر 29 سالہ آننت کی شادی 29 سالہ رادھیکا مرچنٹ سے آئندہ ہفتے ہو رہی ہے۔ مقامی ذرائع ابلاغ کے مطابق 12 جولائی کو ان کی شادی کے بعد 14 جولائی کو ایک اور پر تعیش تقریب منعقد کی جائے گی۔ان تاریخوں کا انتخاب مبینہ طور پر ہندو رسومات کے مطابق آننت اور رادھیکا کی ‘کنڈلیوں کی بنیاد پر کیا گیا ہے۔ان تقاریب سے قبل جمعہ پانچ جولائی کو ان دونوں کی سنگیت کی ویڈیوز کو سوشل میڈیا پر خوب شیئر کیا گیا۔ اس تقریب میں بالی ووڈ کے فنکار عالیہ بھٹ، رنویر سنگھ اور سلمان خان نے بھی شرکت کی۔ مقامی میڈیا کے مطابق امریکی گلوکار جسٹن بیبر بھی اس تقریب میں موجود تھے۔علاوہ ازیں، پچھلے ہفتے امبانی خاندان نے 50 غریب جوڑوں کی اجتماعی شادی کا انتظام بھی کیا تھا۔
آننت امبانی اور رادھیکا مرچنٹ کون ہیں؟
آننت مکیش امبانی کے تیسرے اور سب سے چھوٹے بیٹے ہیں۔ امریکی جریدے فوربز کے مطابق 66 سالہ مکیش امبانی اس وقت دنیا کے نویں امیر ترین شخص ہیں اور ان کے کل اثاثوں کی مالیت یا ‘نیٹ ورتھ’ 116 ارب ڈالر ہے۔ان کی ریلائنس انڈسٹریز کی ویب سائٹ پر موجود تفصیلات میں بتایا گیا ہے کہ آننت نے امریکہ کی بران یونیورسٹی سے تعلیم حاصل کی اور اب وہ ریلائنس میں قابل تجدید اور ماحول دوست توانائی کے آپریشنز کی توسیع کی نگرانی کر رہے ہیں۔ اس کے علاوہ وہ امبانی خاندان کے آبائی شہر جام نگر میں 3,000 ایکڑ پر بنایا گیا جانوروں کا ایک ریسکیو سینٹر بھی چلا رہے ہیں۔اسی طرح رادھیکا کے والد ورین مرچنٹ کا ادویات کا بہت بڑا کاروبار ہے اور امریکی جریدے ووگ کے مطابق رادھیکا بھی انہیں کی کمپنی اینکور ہیلتھ کیئر میں بطور مارکیٹنگ ڈائریکٹر کام کر رہی ہیں۔رادھیکا نے ووگ کو دیے گئے ایک انٹرویو کے دوران بتایا کہ ان کی آننت سے ملاقات 2017 میں ہوئی تھی اور اس پہلی ملاقات میں ہی ان کو کچھ ‘خاص محسوس ہوا تھا، جس کے بعد ان کی آننت سے ملاقاتوں کا سلسلہ چل نکلا۔