कया अप भी अपने न्यूज़ पेपर की वेब साईट बनाना चाहते है या फिर न्यूज़ पोर्टल बनाना चहाते है तो कॉल करें 9860450452 / 9028982166 /9595154683

نکاح کے مقدّس رشتے پر مسلکی تعصب کا سایہ!

The Shadow of Sectarian Prejudice Over the Sacred Bond of Marriage!

تحریر:مسعود محبوب خان (ممبئی)
09422724040

اسلام ایک ایسا دین ہے جس کی بنیاد توحید، اخوت، محبت، عدل، رحمت اور باہمی احترام پر استوار ہے۔ اس دین نے انسانوں کو رنگ، نسل، زبان، قبیلے اور گروہی وابستگیوں سے بلند ہو کر ایک دوسرے کے ساتھ اخوت و محبت کا رشتہ قائم کرنے کی تعلیم دی ہے۔ اسلام کی نگاہ میں کسی مسلمان کی اصل پہچان اس کا ایمان، اس کا تعلق تعالیٰ اور رسول ﷺ سے، اور اس کا عملی کردار ہے۔ اختلافِ رائے اور فقہی تنوع کو اسلامی علمی روایت میں ہمیشہ ایک حقیقت کے طور پر تسلیم کیا گیا ہے، لیکن جب یہی اختلاف تعصب، نفرت، تحقیر، تکفیر اور باہمی دوری کا ذریعہ بن جائے تو وہ اپنی علمی و اخلاقی حدود سے تجاوز کر جاتا ہے۔ افسوس کہ ہمارے معاشرے میں بعض اوقات مسلکی وابستگیاں اس قدر شدّت اختیار کر لیتی ہیں کہ دین کی اصل روح، اخلاقی اقدار اور انسانی رشتے بھی ان کے سامنے ثانوی حیثیت اختیار کر جاتے ہیں۔ بہار کے ضلع کشن گنج سے سامنے آنے والا ایک واقعہ اسی افسوس ناک صورتِ حال کی عکاسی کرتا ہے، جس نے ایک مرتبہ پھر ہمارے مذہبی و سماجی رویّوں پر سنجیدہ سوالات کھڑے کر دیے ہیں۔
موصولہ اطلاعات کے مطابق، بہار کے ضلع کشن گنج کے علاقے اراباڑی (آم گاچھ) میں ایک شادی کی تقریب مسلکی اختلافات کی نذر ہو گئی۔ بتایا جاتا ہے کہ شادی کی تمام تیاریاں مکمل تھیں، دونوں خاندان نکاح کی خوشیوں میں شریک ہونے کے لیے جمع تھے اور نکاح کی مجلس بھی سج چکی تھی۔ اسی دوران لڑکے والوں کی جانب سے لائے گئے ایک نکاح خواں، جن کا تعلق بریلوی مکتبِ فکر سے بتایا جاتا ہے، نے مبینہ طور پر نکاح پڑھانے سے قبل دلہن کے سامنے یہ شرط رکھ دی کہ وہ پہلے اپنے دیوبندی مسلک سے توبہ کرے اور باضابطہ طور پر سنی ہونے کا اعلان کرے، بصورتِ دیگر وہ نکاح نہیں پڑھائیں گے۔ دلہن نے اپنی مذہبی شناخت اور عزّتِ نفس کے حوالے سے اس مطالبے کو قبول کرنے سے انکار کر دیا۔ نتیجتاً نکاح کی مجلس میں تلخی پیدا ہوئی، معاملہ طول پکڑ گیا اور مقامی معززین و پنچایت کی کوششوں کے باوجود اختلاف ختم نہ ہو سکا۔ بالآخر ایک ایسا رشتہ، جسے محبت، اعتماد اور باہمی رضامندی کے ساتھ ایک نئے خاندانی سفر کا آغاز ہونا تھا، مسلکی کشمکش کی بھینٹ چڑھ گیا۔
اگر واقعے کی یہ تفصیلات درست ہیں تو یہ محض ایک شادی کا ٹوٹ جانا نہیں، بلکہ ہمارے مذہبی معاشرے کے فکری مزاج، مسلکی ترجیحات اور دینی ترجیحات کی ترتیب پر ایک گہرا سوالیہ نشان ہے۔ یہاں بنیادی سوال یہ نہیں کہ نکاح خواں کا تعلق کس مکتبِ فکر سے تھا یا دلہن کس فقہی و مسلکی روایت سے وابستہ تھی، بلکہ اصل سوال یہ ہے کہ کیا نکاح جیسے مقدّس اور سنجیدہ معاملے کو کسی ایسے غیر متعلقہ مسلکی مطالبے سے مشروط کرنا درست ہے جسے شریعت نے نکاح کی بنیادی شرط قرار نہیں دیا؟ کیا کسی مسلمان خاتون کو محض اس بنا پر اپنے مسلکی تشخص سے دست بردار ہونے پر مجبور کیا جا سکتا ہے کہ اس کا ہونے والا شوہر یا اس کے اہلِ خانہ کسی دوسرے مکتبِ فکر سے تعلق رکھتے ہیں؟ اور کیا دینی خدمت کا منصب رکھنے والے افراد کا فرض یہ نہیں کہ وہ اختلافات کو کم کریں، نہ کہ انہیں ایسے مواقع پر ہوا دیں جہاں محبت اور اعتماد کی بنیاد رکھی جانی چاہیے؟
اسلام میں نکاح محض ایک سماجی رسم یا دو خاندانوں کے درمیان تعلق قائم کرنے کا ذریعہ نہیں، بلکہ ایک مقدّس عہد، اخلاقی ذمّہ داری اور انسانی زندگی کے ایک اہم مرحلے کا نام ہے۔ قرآنِ مجید نے ازدواجی تعلق کو محض جسمانی یا معاشرتی ضرورت کے طور پر پیش نہیں کیا، بلکہ اسے سکون، محبت اور رحمت کا ذریعہ قرار دیا ہے۔ تعالیٰ ارشاد فرماتا ہے: "اور اس کی نشانیوں میں سے ہے کہ اس نے تمہارے لیے تم ہی میں سے جوڑے پیدا کیے تاکہ تم ان کے پاس سکون حاصل کرو، اور اس نے تمہارے درمیان محبت اور رحمت رکھ دی” (سورۃ الروم: 21)۔
اس آیتِ مبارکہ میں ازدواجی زندگی کا بنیادی فلسفہ تین الفاظ میں بیان کر دیا گیا ہے: سکون، محبت اور رحمت۔ یہ تینوں عناصر کسی بھی کامیاب ازدواجی تعلق کی بنیاد ہیں۔ نکاح کا مقصد دو انسانوں کو ایک دوسرے کے لیے باعثِ اطمینان بنانا، ان کے درمیان اعتماد پیدا کرنا اور ایک ایسا گھرانہ تشکیل دینا ہے جس میں احترام، شفقت، ذمّہ داری اور باہمی تعاون کا ماحول قائم ہو۔ اگر نکاح کے ابتدائی مرحلے ہی میں ایک فریق دوسرے فریق کی مذہبی شناخت کو مشروط طور پر قبول کرنے یا اس سے دست بردار ہونے کا مطالبہ کرنے لگے تو یہ طرزِ عمل ازدواجی زندگی کے بنیادی مقاصد سے مطابقت نہیں رکھتا۔
اسلام نے نکاح کے لیے واضح شرعی اصول اور شرائط متعین کیے ہیں۔ ایجاب و قبول، فریقین کی رضامندی، شرعی اہلیت، گواہوں اور دیگر متعلقہ فقہی تقاضوں کی اپنی اہمیت ہے۔ ان شرائط کی تفصیلات میں فقہی مذاہب کے درمیان بعض اختلافات بھی موجود ہیں، لیکن کسی مسلمان کے دیوبندی، بریلوی، اہلِ حدیث یا کسی دوسرے معروف فقہی مکتبِ فکر سے تعلق رکھنے کو بذاتِ خود نکاح کی صحت کے لیے لازمی شرط قرار نہیں دیا جا سکتا۔ کسی خاص مسلک سے وابستگی اختیار کرنے یا اس سے توبہ کرنے کو نکاح کی شرط بنانا ایک الگ نوعیت کا مطالبہ ہے، جس کے لیے واضح شرعی دلیل درکار ہوگی۔
یہاں ایک اہم فرق کو سمجھنا ضروری ہے کہ نکاح کی صحت، دینی و اعتقادی اختلافات اور ازدواجی زندگی کی باہمی موافقت تین الگ موضوعات ہیں۔ اگر کسی رشتے میں فریقین کے درمیان دینی ترجیحات، مذہبی معمولات یا بچّوں کی تربیت کے حوالے سے اختلافات موجود ہوں تو نکاح سے پہلے ان پر سنجیدہ گفتگو اور باہمی اتفاق پیدا کرنا دانش مندی ہے۔ لیکن کسی شخص کو اپنی مرضی کے خلاف مسلکی اعلان کرنے یا اپنے علمی و مذہبی پس منظر سے دست بردار ہونے پر مجبور کرنا اس کا مناسب متبادل نہیں ہو سکتا۔
برصغیر کی اسلامی تاریخ میں مختلف فقہی، علمی اور اصلاحی مکاتبِ فکر نے اپنے اپنے انداز میں دینی علوم کی ترویج، مدارس کے قیام، دعوت و اصلاح اور معاشرتی رہنمائی میں خدمات انجام دی ہیں۔ دیوبندی اور بریلوی مکاتبِ فکر بھی اسی وسیع مذہبی و علمی روایت کے مختلف رجحانات کی نمائندگی کرتے ہیں۔ ان کے درمیان بعض اعتقادی، فقہی اور عملی مسائل میں اختلافات پائے جاتے ہیں، جن پر اہلِ علم نے تفصیلی بحثیں کی ہیں۔ ان اختلافات کی علمی حیثیت سے انکار کرنا بھی درست نہیں، لیکن انہیں باہمی نفرت، تحقیر، سماجی بائیکاٹ اور رشتوں کی قطع و برید کا ذریعہ بنا دینا بھی دینی حکمت و اخلاق کے منافی ہے۔
علمی اختلاف اور مسلکی تعصب میں بنیادی فرق یہ ہے کہ علمی اختلاف دلیل، تحقیق، احترام اور مکالمے کے دائرے میں رہتا ہے، جب کہ تعصب انسان کو اپنے موقف کے سوا ہر دوسرے موقف کو حقیر سمجھنے پر آمادہ کرتا ہے۔ علمی اختلاف میں دوسرے کی بات سنی جاتی ہے، اس کے دلائل کا جائزہ لیا جاتا ہے اور اپنی رائے پر نظر ثانی کا امکان بھی باقی رکھا جاتا ہے۔ اس کے برعکس مسلکی تعصب میں پہلے ہی فیصلہ کر لیا جاتا ہے کہ ہمارا گروہ درست اور دوسرا گروہ ناقابلِ قبول ہے۔ یہی ذہنیت رفتہ رفتہ دینی اخوت کو کمزور کرتی اور معاشرے میں ایسی تقسیم پیدا کرتی ہے جس کا نقصان بالآخر پوری اُمّت کو اٹھانا پڑتا ہے۔
قرآنِ مجید نے مسلمانوں کو باہمی نزاع اور انتشار سے بچنے کی واضح ہدایت دی ہے: "اور اور اس کے رسول کی اطاعت کرو اور آپس میں جھگڑا نہ کرو، ورنہ تم کمزور پڑ جاؤ گے اور تمہاری ہوا اکھڑ جائے گی” (سورۃ الانفال: 46)۔ اس قرآنی ہدایت کا ایک اہم پہلو یہ ہے کہ اختلافات جب نزاع اور باہمی کشمکش کی شکل اختیار کر لیتے ہیں تو اجتماعی قوت کو کمزور کر دیتے ہیں۔ ایک ایسا معاشرہ جہاں لوگ معمولی فقہی و مسلکی اختلافات کی بنیاد پر ایک دوسرے کے خلاف صف آرا ہو جائیں، وہاں اجتماعی اصلاح، دینی تعلیم، اخلاقی تربیت اور اُمّت کی تعمیر جیسے بڑے مقاصد پس منظر میں چلے جاتے ہیں۔
رسول ﷺ نے مسلمانوں کے باہمی تعلق کو ایک جسم سے تشبیہ دیتے ہوئے فرمایا کہ اہلِ ایمان کی مثال باہمی محبت، رحمت اور شفقت میں ایک جسم کی مانند ہے؛ جب اس کے ایک عضو کو تکلیف پہنچتی ہے تو پورا جسم بے خوابی اور بخار میں مبتلا ہو جاتا ہے (صحیح بخاری و صحیح مسلم)۔ یہ نبوی تعلیم ہمیں بتاتی ہے کہ مسلمان کی تکلیف دوسرے مسلمان کے لیے بے حسی یا تماشے کا موضوع نہیں، بلکہ ہمدردی اور خیر خواہی کا تقاضا کرتی ہے۔ پھر یہ کس قدر افسوس ناک صورتِ حال ہے کہ جن لوگوں کو ایک دوسرے کے دکھ درد میں شریک ہونا چاہیے، وہ بعض اوقات مسلکی شناخت کی بنیاد پر ایک دوسرے کے لیے مشکلات پیدا کرنے لگتے ہیں۔
اس واقعے کا ایک نہایت اہم پہلو نکاح خواں کے کردار سے متعلق ہے۔ نکاح خواں محض نکاح کے الفاظ ادا کرنے والا شخص نہیں ہوتا، بلکہ وہ ایک دینی و سماجی ذمّہ داری انجام دیتا ہے۔ اس موقع پر اس کی گفتگو، رویّہ، الفاظ اور طرزِ عمل دونوں خاندانوں پر اثر انداز ہوتے ہیں۔ اس سے توقع کی جاتی ہے کہ وہ شریعت کے احکام سے واقف، اخلاقی طور پر متوازن، اختلافات کو سمجھنے والا اور لوگوں کے درمیان خیر و محبت پیدا کرنے کی صلاحیت رکھتا ہو۔
اگر کسی نکاح خواں کو کسی شرعی یا اعتقادی مسئلے پر حقیقی اشکال ہو تو اس کا حق ہے کہ وہ اہلِ علم سے رجوع کرے، متعلقہ مسئلے کی تحقیق کرے اور اپنی شرعی ذمّہ داری کے مطابق فیصلہ کرے۔ لیکن کسی مسلمان خاتون کو محض مسلکی شناخت کی بنیاد پر توبہ کرنے یا کسی دوسرے مسلک کا اعلان کرنے پر مجبور کرنا، اگر واقعی ایسا ہوا ہے، تو یہ ایک نہایت قابلِ افسوس طرزِ عمل ہے۔ دینی منصب انسان کو دوسروں پر اپنی مسلکی ترجیحات مسلّط کرنے کا اختیار نہیں دیتا، بلکہ اس منصب کے ساتھ زیادہ احتیاط، تحمل، حکمت اور جواب دہی وابستہ ہوتی ہے۔ قرآنِ مجید دعوت و اصلاح کے لیے جو اصول بیان کرتا ہے، وہ بھی اسی حکمت و اعتدال کی تعلیم دیتا ہے: "اپنے ربّ کے راستے کی طرف حکمت اور اچھی نصیحت کے ساتھ دعوت دو اور ان سے ایسے طریقے سے بحث کرو جو بہترین ہو” (سورۃ النحل: 125)
جب دعوت و اصلاح کے معاملے میں حکمت، نرمی اور بہترین اسلوب اختیار کرنے کا حکم ہے تو پھر نکاح جیسے خوشی اور باہمی اعتماد کے موقع پر سختی، تحکم اور غیر ضروری شرائط کا رویہ کس طرح قابلِ تحسین ہو سکتا ہے؟ دینی رہنمائی کا مقصد لوگوں کو تعالیٰ کے قریب کرنا، ان کے درمیان محبت پیدا کرنا اور شریعت کے صحیح فہم کی طرف رہنمائی کرنا ہے۔ اگر مذہبی وابستگی لوگوں کے لیے آسانی کے بجائے دشواری، محبت کے بجائے نفرت اور اتحاد کے بجائے انتشار کا سبب بننے لگے تو ہمیں اپنے طرزِ دعوت اور دینی ترجیحات کا سنجیدگی سے محاسبہ کرنا چاہیے۔
یہاں ایک عملی اور اہم سوال بھی سامنے آتا ہے کہ کیا مختلف مسالک سے تعلق رکھنے والے مسلمان خاندانوں کے درمیان نکاح نہیں ہو سکتا؟ اس سوال کا جواب اصولی طور پر واضح ہے کہ محض دیوبندی، بریلوی، اہلِ حدیث یا حنفی ہونے کی بنیاد پر کسی مسلمان کا نکاح دوسرے مسلمان سے ناجائز یا ممنوع قرار نہیں دیا جا سکتا۔ نکاح کے جواز اور صحت کا فیصلہ متعلقہ شرعی احکام، فریقین کی اہلیت اور دیگر ضروری شرائط کی روشنی میں کیا جائے گا، نہ کہ محض گروہی شناخت کی بنیاد پر۔ البتہ یہ بھی حقیقت ہے کہ ازدواجی زندگی صرف دو افراد کا تعلق نہیں، بلکہ اس میں دو خاندانوں، دو گھریلو ماحولوں، دینی ترجیحات اور آئندہ نسلوں کی تربیت کے معاملات بھی شامل ہوتے ہیں۔ اس لیے اگر لڑکا اور لڑکی مختلف مذہبی رجحانات سے تعلق رکھتے ہوں تو نکاح سے پہلے چند بنیادی امور پر واضح گفتگو ضروری ہے۔ مثلاً بچّوں کی دینی و اخلاقی تربیت کس انداز میں ہوگی؟ مذہبی تقریبات اور عبادات کے حوالے سے دونوں خاندانوں کا طرزِ عمل کیا ہوگا؟ ایک دوسرے کے علماء، دینی شخصیات اور مذہبی روایات کے بارے میں احترام کا رویہ کیسے برقرار رکھا جائے گا؟ کیا دونوں فریق ایک دوسرے کو اپنے مسلکی ماحول کے مطابق ڈھالنے کے بجائے باہمی احترام کے ساتھ زندگی گزارنے پر آمادہ ہیں؟ یہ گفتگو کسی فریق کو اپنے عقیدے سے دست بردار کرنے کے لیے نہیں، بلکہ مستقبل کی ممکنہ غلط فہمیوں اور تنازعات سے بچنے کے لیے ہونی چاہیے۔ نکاح سے پہلے پیدا ہونے والے اختلافات کو سنجیدگی سے سمجھنا دانش مندی ہے، لیکن انہیں انا، ضد اور مسلکی برتری کا مسئلہ بنا دینا ازدواجی زندگی کی بنیادوں کو کمزور کر سکتا ہے۔
اس واقعے میں دلہن کا مبینہ طور پر اپنی مذہبی شناخت سے دست بردار ہونے سے انکار کرنا بھی ایک قابلِ غور پہلو ہے۔ اسلام نے عورت کو نکاح کے معاملے میں محض ایک بے اختیار فریق نہیں بنایا، بلکہ اس کی رضامندی اور شخصیت کو بنیادی اہمیت دی ہے۔ رسول ﷺ نے عورت کی اجازت کے بغیر اس کا نکاح کرنے سے منع فرمایا ہے۔ (صحیح بخاری و صحیح مسلم)۔ اس تعلیم کا تقاضا ہے کہ نکاح میں عورت کی رائے، اس کی پسند، اس کے تحفّظات اور اس کی عزّتِ نفس کو پوری اہمیت دی جائے۔ کسی عورت کو کسی ایسے اعلان یا اعتراف پر مجبور کرنا جسے وہ اپنے عقیدے اور مذہبی تشخص کے خلاف سمجھتی ہو، اسلامی اخلاق اور رضامندی کے بنیادی اصولوں سے مطابقت نہیں رکھتا۔ دلہن کا انکار محض ایک مسلکی ضد کے طور پر نہیں دیکھا جانا چاہیے، بلکہ اس کے پس منظر میں اس کی شخصی آزادی، مذہبی وابستگی اور عزّتِ نفس کا پہلو بھی موجود ہے۔ کسی بھی رشتے کی کامیابی کا انحصار اس بات پر نہیں ہوتا کہ ایک فریق دوسرے کو کس حد تک اپنے رنگ میں رنگ سکتا ہے، بلکہ اس بات پر ہوتا ہے کہ دونوں ایک دوسرے کی شخصیت، وقار اور جائز اختلافات کو کس حد تک قبول کر سکتے ہیں۔
ہمارے معاشرے میں مسلکی اختلافات کا ایک افسوس ناک پہلو یہ بھی ہے کہ ان کا اثر صرف موجودہ نسل تک محدود نہیں رہتا، بلکہ آنے والی نسلوں کے ذہنوں میں بھی تقسیم اور نفرت کے بیج بو دیتا ہے۔ جب بچّے اپنے گھروں میں یہ سنتے اور دیکھتے ہیں کہ فلاں مسلک کے لوگ ہمارے نہیں، فلاں مکتبِ فکر کے علماء ناقابلِ احترام ہیں اور فلاں مذہبی شناخت کے حامل افراد سے تعلق رکھنا درست نہیں، تو ان کے ذہنوں میں اسلام کی وسیع اخوت کے بجائے گروہی شناخت کا محدود تصور پروان چڑھنے لگتا ہے۔ اس کا نتیجہ یہ نکلتا ہے کہ نوجوان نسل دین کے بنیادی مقاصد، قرآن و سنّت کی تعلیمات، اخلاقی تربیت، علم و تحقیق اور اُمّت کے اجتماعی مسائل سے زیادہ مسلکی مناظروں اور گروہی برتری کے مباحث میں الجھ جاتی ہے۔ حالاں کہ آج اُمّتِ مسلمہ کو جن چیلنجوں کا سامنا ہے، ان کا تقاضا باہمی اتحاد، علمی پختگی، اخلاقی استحکام اور اجتماعی بصیرت ہے، نہ کہ معمولی اختلافات کو بنیاد بنا کر ایک دوسرے سے دوری اختیار کرنا۔
ہمیں یہ سمجھنا ہوگا کہ مسلکی شناخت کسی مسلمان کی مکمل دینی شخصیت کا متبادل نہیں ہو سکتی۔ انسان کی اصل قدر و منزلت اس کے تقویٰ، کردار، علم، دیانت، حسنِ اخلاق اور تعالیٰ کے ساتھ تعلق سے متعین ہوتی ہے۔ قرآنِ مجید کا واضح اعلان ہے: "بے شک کے نزدیک تم میں سب سے زیادہ عزّت والا وہ ہے جو تم میں سب سے زیادہ تقویٰ والا ہے” (سورۃ الحجرات: 13)۔ یہ آیتِ مبارکہ ہمارے تمام گروہی، نسلی اور قبائلی تفاخر کے لیے ایک بنیادی معیار فراہم کرتی ہے۔ اگر تعالیٰ کے نزدیک فضیلت کا معیار تقویٰ ہے تو پھر کسی شخص کو محض اس کے مسلکی عنوان کی بنیاد پر کمتر سمجھنا یا اس کی تحقیر کرنا کس طرح درست ہو سکتا ہے؟
اس طرح کے واقعات کا حل محض مذمت اور افسوس کے اظہار میں نہیں، بلکہ اس کے لیے ایک وسیع تر فکری اور سماجی اصلاح کی ضرورت ہے۔ علماء، ائمہ مساجد، مدارس کے ذمہ داران، دینی تنظیموں اور سماجی رہنماؤں کو چاہیے کہ وہ اپنے خطابات اور تعلیمی مجالس میں مسلکی اختلافات کے آداب کو نمایاں کریں۔ عوام کو یہ سمجھایا جائے کہ ہر اختلاف گمراہی نہیں ہوتا، ہر فقہی مسئلہ ایمان و کفر کا مسئلہ نہیں ہوتا اور ہر علمی اختلاف کو سماجی دشمنی میں تبدیل کرنا ضروری نہیں۔
اسی طرح نکاح کے معاملات میں خاندانوں کو چاہیے کہ وہ رشتہ طے کرتے وقت مذہبی رجحانات اور گھریلو ترجیحات کے حوالے سے کھل کر گفتگو کریں۔ اگر کسی مسئلے پر اختلاف ہو تو اسے نکاح کی مجلس میں اچانک شرط کی صورت میں پیش کرنے کے بجائے پہلے ہی باوقار انداز میں حل کرنے کی کوشش کی جائے۔ نکاح خواں حضرات کو بھی چاہیے کہ وہ نکاح کی مجلس کو مسلکی مقابلے کا میدان نہ بنائیں، بلکہ اسے دو خاندانوں کے درمیان محبت، اعتماد اور خیر خواہی کے نئے عہد کے طور پر دیکھیں۔ ضرورت اس امر کی بھی ہے کہ مختلف مکاتبِ فکر کے معتبر علماء ایک دوسرے کے ساتھ علمی مکالمے اور سماجی تعاون کے مستقل مواقع پیدا کریں۔ اختلافی مسائل پر علمی گفتگو اپنی جگہ، لیکن مشترکہ دینی و سماجی مسائل، مثلاً نوجوان نسل کی اخلاقی تربیت، خاندانی نظام کا تحفّظ، تعلیم، معاشرتی اصلاح اور اُمّت کے اجتماعی مفادات کے لیے مشترکہ کوششیں بھی ناگزیر ہیں۔
کشن گنج کا یہ واقعہ اگر پیش آیا ہے، تو ہمارے مذہبی معاشرے کے لیے ایک لمحۂ فکریہ ہے۔ ایک طرف دو خاندان اپنی اولاد کے لیے نئی زندگی کے آغاز کی خوشیاں سمیٹنے کے لیے جمع تھے، دوسری طرف ایک ایسا اختلاف سامنے آیا جس نے چند لمحوں میں ان خوشیوں کو رنج و الم میں تبدیل کر دیا۔ ایک نکاح جو محبت، رحمت اور اعتماد کی بنیاد بن سکتا تھا، وہ مسلکی اصرار اور عدمِ برداشت کی نذر ہو گیا۔ اس واقعے میں سب سے زیادہ افسوس ناک پہلو یہ ہے کہ دین کے نام پر ایک ایسا مطالبہ سامنے آنے کا الزام ہے جس نے ایک مسلمان خاتون کو اپنی مذہبی شناخت اور عزّتِ نفس کے حوالے سے مشکل صورتِ حال میں ڈال دیا۔
ہمیں یہ بات فراموش نہیں کرنی چاہیے کہ اسلام نے ہمیں مسلک پرستی نہیں، بلکہ دین داری سکھائی ہے؛ گروہی تفاخر نہیں، بلکہ تقویٰ کی فضیلت بتائی ہے؛ نفرت اور تحقیر نہیں، بلکہ اخوت، محبت اور خیر خواہی کا درس دیا ہے۔ فقہی و علمی اختلافات اپنی جگہ، لیکن انہیں اس حد تک بڑھا دینا کہ نکاح جیسے مقدّس رشتے بھی ان کی زد میں آ جائیں، کسی طور دینی بصیرت کی علامت نہیں ہو سکتا۔ یہ بھی یاد رکھنا چاہیے کہ نکاح صرف دو افراد کا نہیں، بلکہ دو خاندانوں کے درمیان اعتماد اور تعلق کا ایک نیا باب ہوتا ہے۔ اس باب کی پہلی سطر ہی اگر ضد، تحکم، بے اعتمادی اور مسلکی برتری کے احساس سے لکھی جائے تو مستقبل کی زندگی میں سکون اور محبت کی توقع کیسے کی جا سکتی ہے؟
دین انسانوں کو جوڑنے آیا ہے، توڑنے نہیں؛ نکاح محبت اور رحمت کا عہد ہے، مسلکی وفاداری کا امتحان نہیں۔ مسلک کی علمی وابستگی اپنی جگہ محترم ہو سکتی ہے، لیکن جب وہ انسانی رشتوں، عزّتِ نفس اور اسلامی اخوت سے زیادہ اہم بنا دی جائے تو ہمیں رک کر اپنے دینی شعور اور ترجیحات کا محاسبہ کرنا چاہیے۔ آخر میں ہمیں یہی دعا کرنی چاہیے کہ تعالیٰ ہمارے دلوں کو تعصب، نفرت، ضد، مسلکی عصبیت اور گروہی تفاخر سے پاک فرمائے، ہمارے علماء کو حکمت و اعتدال کی توفیق عطا کرے، ہمارے معاشرے میں علمی اختلاف کے آداب کو فروغ دے اور ہمارے گھروں کو محبت، سکون، رحمت اور باہمی احترام کا گہوارہ بنائے۔ آمین یا ربّ العالمین!
✒️ Masood M. Khan (Mumbai)
📧masood.media4040@gmail.com

Misbah Cloth Center Advertisment

Shaikh Akram

Shaikh Akram S/O Shaikh Saleem Chief Editor Aitebar News, Nanded (Maharashtra) Mob: 9028167307 Email: akram.ned@gmail.com

Related Articles

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے