سيلو بس اسٹینڈ پر ایک ہی بس میں سونے کا ہار اور پرس چوری

سيلو:4؍نومبر (ابرار بیگ)دیوالی کے موقع پر سيلو بس اسسٹینڈ پر مسافروں کی بھیڑ دیکھی جا رہی ہے۔ اسی بھیڑ کا فائدہ اٹھاتے ہوئے چوروں نے دو الگ الگ وارداتوں میں ایک خاتون کا سونے کا ہار اور ایک شخص کا پرس غائب کر دیا۔ یہ واقعہ آج بروز بدھ 4 نومبر کو دوپہر پونے دو بجے کے قریب پیش آیا۔پاتھری سے بلڈانہ جانے والی بس نمبر MH 20 BL 4085 میں لونار جانے کے لیے سوار ہوتے وقت اشونی وٹھل پالوے کے گلے سے ایک تولہ وزنی سونے کا ہار چرا لیا گیا۔ اسی بھیڑ کا فائدہ اٹھاتے ہوئے چوروں نے شیخ مقصود نامی نوجوان کی جیب سے تین ہزار روپے نقد والا پرس بھی اڑا لیا۔ ایک ہی وقت میں دو مسافروں کو چوری کا یہ صدمہ پہنچنے کے بعد بس اسسٹینڈ کے احاطے میں افراتفری اور تشویش کا ماحول پیدا ہو گیا۔واضح رہے کہ بس اسسٹینڈ کے احاطے میں ایک پولیس چوکی بھی بنائی گئی ہے، تاہم گزشتہ آٹھ دنوں سے یہ چوکی بند پڑی ہے۔ دیوالی کے تہوار کے پیش نظر بس اسسٹینڈ پر مسافروں کی بھاری بھیڑ کے باوجود سیکورٹی کے لیے قائم اس پولیس چوکی کے بند رہنے کی وجہ سے چوروں کی بن آئی ہے۔ مسافرین کی جانب سے پرزور مطالبہ کیا جا رہا ہے کہ اس پولیس چوکی کو فوری طور پر شروع کیا جائے اور چوروں کا سختی سے سدباب کیا جائے۔